കോതമംഗലം: കോതമംഗലം മാർ അത്തനേഷ്യസ് സ്ഥാപനങ്ങളുടെ ശില്പിയും, പ്രമുഖ വിദ്യാഭ്യാസ വിചക്ഷണനുമായിരുന്ന പ്രൊഫ. എം. പി. വർഗീസിന്റെ 103-ാമത് ജന്മവാർഷികവും, അനുസ്മരണ സമ്മേളനവും നടന്നു. കോളേജിലെ ബസേലിയോസ് പൗലോസ് ഇൻഡോർ സ്റ്റേഡിയത്തിൽ ചേർന്ന അനുസ്മരണ സമ്മേളനത്തിൽ എം. എ കോളേജ് അസോസിയേഷൻ ചെയർമാൻ ഡോ. മാത്യൂസ് മാർ അപ്രേം മെത്രാപ്പോലീത്ത അധ്യക്ഷത വഹിച്ചു.അർത്ഥ സമ്പുഷ്ടമായ ജീവിതമായിരുന്നു പ്രൊഫ. എം. പി. വർഗീസ് കാഴ്ചവെച്ചതെന്നും, വിദ്യാഭ്യാസ മേഖലയിൽ വലിയ മുന്നേറ്റം നടത്തുവാനായിട്ട് അദ്ദേഹത്തിനു സാധിച്ചു വെന്നും, എം. എ. കോളേജ് ലോകത്ത് അറിയപ്പെടുന്ന വലിയ കോളേജായി മാറിയെന്നും മെത്രാപ്പോലീത്ത പറഞ്ഞു.എം. എ. കോളേജ് ഇംഗ്ലീഷ് വിഭാഗം മുൻ അധ്യപകനും, എം. എ. കോളേജ് അസോസിയേഷൻ ഗവേർണിങ് ബോർഡ് അംഗവുമായ പ്രൊഫ. ബേബി എം വർഗീസ് അനുസ്മരണ പ്രഭാഷണം നടത്തി.
പ്രൊഫ. എം. പി. വർഗീസ് യുഗപ്രഭാവ നെന്നും, തന്നെപോലെ അനേകായിരം വിദ്യാർത്ഥികൾക്ക് ജീവിതത്തിൽ വഴികാട്ടിയും,മാർഗദർശിയും, അഭയ സങ്കേതവുമായത് പ്രിയപ്പെട്ട വർഗീസ് സാർ ആയിരുന്നുവെന്നും അദ്ദേഹം അനുസ്മരിച്ചു. എം.എ. കോളേജ് അസോസിയേഷൻ സെക്രട്ടറി ഡോ. വിന്നി വർഗീസ് ആമുഖ പ്രഭാഷണം നടത്തി. തന്റെ പിതാവിന്റെ ഏറ്റവും വലിയ സ്വപ്നവും, ആഗ്രഹവുമായിരുന്നു എം. എ. കോളേജ് ഒരു യൂണിവേഴ്സിറ്റിയായി മാറണമെന്നുള്ളതെന്നും, അതിലേക്കുള്ള പ്രയാണത്തിലാണ് നമ്മളെന്നും, അധികം വൈകാതെ തന്നെ മാർ അത്തനേഷ്യസ് യൂണിവേഴ്സിറ്റിയിലെ അധ്യാപകരും, അനധ്യാപകരുമെന്ന് അഭിമാനത്തോടെ പറയാൻ നിങ്ങൾക്ക് അവസരം ഉണ്ടാകട്ടെയെന്നും ഡോ. വിന്നി വർഗീസ് പറഞ്ഞു. എം. എ. കോളേജ് അസോസിയേഷൻ വൈസ് ചെയർമാൻ എ. ജി. ജോർജ്, പ്രിൻസിപ്പൽമാരായ ഡോ. മഞ്ജു കുര്യൻ, ഡോ. ബോസ് മാത്യു ജോസ് എന്നിവർ ചടങ്ങിൽ പ്രസംഗിച്ചു.കോളേജ് അസോസിയേഷൻ എക്സിക്യൂട്ടീവ് കമ്മിറ്റിയംഗങ്ങൾ, ഗവേർണിങ് ബോർഡ് അംഗങ്ങൾ,ഷെയർ ഹോൾഡേഴ്‌സ്,മാർ അത്തനേഷ്യസ് സ്ഥാപനങ്ങളിലെ അധ്യാപകർ, അനധ്യാപകർ, വിദ്യാർത്ഥികൾ എന്നിവർ പങ്കെടുത്തു.
