കോതമംഗലം : കലാലയങ്ങളുടെ രാജശില്പി പ്രൊഫ. എം.പി വർഗീസിന്റെ നൂറാമത് ജന്മദിന വാർഷികാഘോഷത്തിന് ഒരു വർഷം നീണ്ടുനിൽക്കുന്ന പരിപാടികളോടെ തുടക്കം കുറിച്ചു. എം.എ കോളേജ് അസോസ്സിയേഷൻ ചെയർമാൻ മാത്യൂസ് മാർ അപ്രേം തിരുമേനിയുടെ അദ്ധ്യക്ഷതയിൽ ബസേലിയോസ് പൗലോസ് ഇൻഡോർ സ്റ്റേഡിയത്തിൽ വച്ച് കൂടിയ യോഗത്തിൽ ശ്രേഷ്ഠ ബസേലിയോസ് തോമസ് പ്രഥമൻ കാതോലിക്ക ബാവ ദീപം കൊളുത്തി ആരംഭിച്ച ചടങ്ങിൽ മുൻ മുഖ്യമന്ത്രി ഉമ്മൻ ചാണ്ടി ഉദ്ഘാടന പ്രസംഗം നടത്തി. കോതമംഗലത്ത് ഇന്ന് നടപ്പായിരിക്കുന്ന വികസനം പ്രൊഫ. എം.പി. വർഗീസിന്റെ ദീർഘവീക്ഷണത്തിന്റെ ഫലമാണെന്നും ഉന്നത വിദ്യാഭ്യാസരംഗത്ത് അദ്ദേഹം നൽകിയ സംഭാവനകൾ അതുല്യമാണെന്നും ആ രംഗത്ത് കേരളം മുന്നേറാനുണ്ടെന്നും അദ്ദേഹം ചിന്തിച്ചിരുന്നു എന്നും, അതിന് വേണ്ടി അക്ഷീണം പ്രയത്നിച്ചിരുന്ന മഹത് വ്യക്തിത്വമായിരുന്നു അദ്ദേഹമെന്ന് തന്റെ ഉദ്ഘാടന പ്രസംഗത്തിൽ ഉമ്മൻചാണ്ടി സ്മരിച്ചു. അദ്ദേഹത്തിന്റെ ദീർഷവീക്ഷണം നടപ്പായിരുന്നു എങ്കിൽ ഇന്ന് നമ്മുടെ വിദ്യാർത്ഥികൾ യുക്രെയിനിൽ അനുഭവിച്ച ദുരവസ്ഥ ഉണ്ടാകുമായിരുന്നില്ലെന്ന് അദ്ദേഹം ഊന്നിപ്പറഞ്ഞു.
യു.ജി.സി. മുൻ വൈസ് ചെയർമാൻ ഡോ. വി.എൻ. രാജശേഖരപിള്ള മുഖ്യപ്രഭാഷക നായിരുന്നു. മികച്ച കോളേജുകളെല്ലാം സർവ്വകലാശാലകളാകണമെന്നും ഗുണനിലവാരമുള്ള കൽപ്പിത സർവ്വകലാശാലകൾ സ്വാശ്രയ മേഖലകളിൽ ഉണ്ടാകണമെന്നും, അതിനുവേണ്ടി പ്രവർത്തിക്കണമെന്നും ദീർഷവീക്ഷണമുണ്ടായിരുന്ന മഹത് വ്യക്തി ആയിരുന്നു പ്രൊഫ. എം.പി. വർഗീസ് എന്ന് അദ്ദേഹം തന്റെ ഭാഷണത്തിൽ അനുസ്മരിച്ചു. എം.എ കോളേജ് അസോസ്സിയേഷൻ സെക്രട്ടറി ഡോ. വിന്നി വർഗീസ് സ്വാഗതം ആശംസിക്കുകയും അടുത്ത ഒരു വർഷം കൊണ്ട് നടപ്പിലാക്കുന്ന വിവിധ പദ്ധതികളെക്കുറിച്ച് സമഗ്രമായ വിവരണം നൽകുകയും ചെയ്തു.
ആശംസാപ്രസംഗത്തിൽ അഡ്വ. ഡീൻ കുര്യാക്കോസ് എ.പി., പ്രൊഫ. എം.പി. വർഗീസ് വിദ്യാഭ്യാസ മേഖലക്ക് നൽകിയ സംഭാവനകളെക്കുറിച്ച് എടുത്ത് പറയുകയും അദ്ദേഹത്തോടുള്ള ആദരസൂചകമായി തപാൽ വകുപ്പുമായി ചേർന്ന് തപാൽ സ്റ്റാമ്പ് പുറത്തിറക്കാൻ ശ്രമിക്കുമെന്നും അറിയിച്ചു. വിദ്യാഭ്യാസ കാലഘട്ടം മുതൽ പ്രൊഫ. എം.പി. വർഗീസ് സാറുമായും, എം.എ കോളേജ് അസോസ്സിയേഷൻ സ്ഥാപനങ്ങളുമായും ഉണ്ടായിരുന്ന വ്യക്തിബന്ധങ്ങൾ തന്റെ വിജയങ്ങൾക്ക് ഒരു പ്രധാന പങ്കുവഹിച്ചുവെന്ന് ആന്റണി ജോൺ എം.എൽ.എ. ചടങ്ങിൽ അനുസ്മരിച്ചു. എം.എ കോളേജ് മുൻ പ്രിൻസിപ്പൽ പ്രൊഫ. എം.കെ. ബാബു നന്ദി പ്രകാശിപ്പിച്ചു.
