പിണ്ടിമന: പിണ്ടിമന പഞ്ചായത്തിലെ വേട്ടാമ്പാറയിൽ തുടർച്ചയായി കാട്ടാനയിറങ്ങി ഏത്തവാഴകളടക്കമുള്ള കാർഷിക വിളകൾ നശിപ്പിക്കുന്നതിനാൽ കർഷകർ പ്രതിസന്ധിയിലാകുന്നു.കഴിഞ്ഞ ഒരാഴ്ച്ചക്കിടെ രണ്ടാം പ്രാവശ്യമാണ് റ്റി.വി. ജോസ് തറമുട്ടത്ത് എന്ന കർഷകൻ്റെ കൃഷിയിടത്തിലെത്തി കാട്ടാനകൾ കൃഷി നശിപ്പിച്ചത്. പാട്ടത്തിനെടുത്ത് കൃഷി ചെയ്ത കുലച്ച നൂറോളം ഏത്തവാഴകളാണ് ഇത്തവണ നശിപ്പിച്ചത്.ഫെൻസിംഗ് ഇല്ലാത്ത ചെറിയ വിടവ് നോക്കി കൃഷിയിടത്തിൻ്റെ അകത്ത് കയറുകയും തിരിച്ച് ഇറങ്ങുമ്പോൾ കയ്യാലകളും, ഫെൻസിംഗും ഉൾപ്പെടെ തകർത്തുകൊണ്ടാണ് ആനകളുടെ രാത്രി കാല സഞ്ചാരം. നിത്യവും ആനകൾ വരുന്നത് പ്രദേശത്തെ ജനങ്ങളിൽ ആശങ്ക പരത്തിയിരിക്കുകയാണ്.
അധികൃതരുടെ ഇടപെടൽ കൂടുതൽ കാര്യക്ഷമമാക്കണ മെന്ന് നാശനഷ്ടം സംഭവിച്ച കൃഷിയിടങ്ങൾ സന്ദർശിച്ച ഗ്രാമ പഞ്ചായത്ത് പ്രസിഡൻ്റ് ജെസ്സി സാജു അഭിപ്രായപ്പെട്ടു. കാട്ടാന ശല്യം രൂക്ഷമാകുന്ന പഞ്ചായത്തുകളിൽ കാർഷിക വിളകൾക്കുണ്ടാകുന്ന നഷ്ടം കുറക്കുന്നതിനായി കർഷകരെ വിള ഇൻഷൂറൻസ് പദ്ധതിയിൽ അംഗമാക്കുന്നതിനും, പദ്ധതി ഈ പ്രദേശങ്ങളിൽ വ്യാപിപ്പിക്കുന്നതിനുള്ള ബോധവത്ക്കരണ ക്യാമ്പയിനുകൾ നടപ്പാക്കുന്നതിനുള്ള നടപടികൾ സ്വീകരിക്കുന്നതാണെന്നും സ്ഥലത്തെത്തിയ കോതമംഗലം കൃഷി അസിസ്റ്റൻ്റ് ഡയറക്ടർ വി.പി.സിന്ധു അറിയിച്ചു.പഞ്ചായത്ത് സ്ഥിരം സമിതി അദ്ധ്യക്ഷൻമാരായ സിബി പോൾ, സിജി ആൻ്റണി, കൃഷി ഓഫീസർ ഇ.എം ഹനീഫ, കൃഷി അസിസ്റ്റൻ്റ് വി.കെ ജിൻസ് എന്നിവരും സംഘത്തോടൊപ്പം ഉണ്ടായിരുന്നു.
