കോതമംഗലം : ജീവിതത്തിനായി ലഭിക്കുന്ന പെന്‍ഷന്‍ തുകയില്‍ നിന്നും ഒരു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കി ദമ്പതികള്‍ മാതൃകയായി. പല്ലാരിമംഗലം പിടവൂര്‍ സ്വദേശികളായ ശാന്തിഭവന്‍ വീട്ടില്‍ റിട്ടയർഡ് ജില്ലാ സപ്ലൈസ് ഓഫീസര്‍ എം എന്‍ ബാലഗോപാലനും ഭാര്യ കെ എസ് ഇ ബി റിട്ടയർഡ് അക്കൗണ്ട്‌സ് ഓഫീസർ എം കെ സുമതിയമ്മയുമാണ് പെന്‍ഷന്‍ തുകയില്‍ നിന്നും ഒരു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്കായി ആന്റണി ജോൺ എം എൽ എ യ്ക്ക് കൈമാറിയത്. 80 വയസുള്ള ബാലഗോപാലന്‍ 25 വര്‍ഷം മുമ്പും 75 വയസുള്ള സുമതിയമ്മ 20 വര്‍ഷം മുമ്പുമാണ് പെന്‍ഷനായത്. പ്രായാധിക്യം മൂലം കോവിഡ് പ്രതിരോധ പ്രവര്‍ത്തനങ്ങളില്‍ പങ്കാളിയാകാന്‍ കഴിയില്ലെങ്കിലും തങ്ങളാൽ കഴിയുന്ന ഒരു തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കാന്‍ കഴിഞ്ഞതില്‍ സന്തുഷ്ടരാണ് ഈ കുടുംബം.
ഫിലിം എഡിറ്റിങ്ങില്‍ ദേശീയ – സംസ്ഥാന അവാര്‍ഡുകള്‍ നേടിയ ബി അജിത്തിന്റെ മാതാപിതാക്കളാണ് ഇവര്‍. ബാലഗോപാലന്‍ നിലവില്‍ സി പി ഐ എം കാവുംപടി ബ്രാഞ്ച് സെക്രട്ടറിയാണ്. ചടങ്ങില്‍ സി പി ഐ എം കവളങ്ങാട് ഏരിയാ സെക്രട്ടറി ഷാജി മുഹമ്മദ്, വാരപ്പെട്ടി ലോക്കല്‍ സെക്രട്ടറി എം സി വര്‍ഗീസ്, കേരള ജേർണലിസ്റ്റ് യൂണിയന്‍ താലൂക്ക് പ്രസിഡന്റ് ലത്തീഫ് കുഞ്ചാട്ട്, സി പി ഐ എം വാരപ്പെട്ടി ലോക്കല്‍ കമ്മിറ്റിയംഗം കെ എം കരീം,ബ്രാഞ്ച് സെക്രട്ടറി കെ ഇ യൂനുസ്,എം പി പി നായര്‍ തുടങ്ങിയവര്‍ പങ്കെടുത്തു.
