കോതമംഗലം: യാക്കോബായ സുറിയാനി സഭയുടെ കീഴിലുള്ള മഴുവന്നൂർ, ഓടക്കാലി, പുളിന്താനം, എരിക്കുംചിറ,ചെറുകുന്ന്, മംഗലം ഡാം എന്നീ ആറ് പള്ളികൾ ജില്ലാ കളക്ടർമാർ ഏറ്റെടുത്ത് കോട്ടയം ആസ്ഥാനമായ ഓർത്തഡോക്സ് വിഭാഗത്തിന് നൽകണമെന്ന ഹൈക്കോടതി ഉത്തരവ് റദ്ദ് ചെയ്ത് സുപ്രീം കോടതി. സുപ്രീം കോടതി ഉത്തരവ് എങ്ങനെ നടപ്പാക്കാനാകുമെന്ന് സർക്കാർ അറിയിക്കണമെന്നും കോടതി നിർദ്ദേശിച്ചിരുന്നു. യാക്കോബായ സുറിയാനി സഭയുടെ വിശ്വാസത്തിൽ നിലനിൽക്കുന്ന പള്ളികൾ ഏറ്റെടുത്ത ശേഷം ന്യൂനപക്ഷമായ ഓർത്തഡോക്സ് വിഭാഗത്തിന് കൈമാറുന്നത് ശാശ്വത പരിഹാരമല്ലെന്നായിരുന്നു സർക്കാർ സുപ്രീം കോടതിയിൽ നൽകിയ മറുപടി.
ഓർത്തഡോക്സ്, യാക്കോബായ സഭാ പള്ളിത്തർക്കത്തിൽ ചീഫ് സെക്രട്ടറിക്കും രണ്ട് ജില്ലാ കളക്ടർമാർക്കുമെതിരെ ഒക്ടോബർ 21നായിരുന്നു ഹൈക്കോടതി കോടതിയലക്ഷ്യ നടപടി സ്വീകരിച്ചത്. ഹൈക്കോടതി സിംഗിൾ ബെഞ്ചിന്റേതായിരുന്നു തീരുമാനം. ആറ് പള്ളികൾ ഏറ്റെടുക്കണമെന്ന ഉത്തരവ് നടപ്പാക്കാത്തതിലായിരുന്നു ഉദ്യോഗസ്ഥർക്കെതിരെ കോടതിയലക്ഷ്യ നടപടി സ്വീകരിക്കാൻ ഹൈക്കോടതി ഉത്തരവിട്ടത്. ഇതിനെതിരെ നൽകിയ അപ്പീലിലാണ് സുപ്രീം കോടതി നിലപാട് വ്യക്തമാക്കിയത്. പള്ളി പിടിച്ചെടുക്കാൻ പോലീസിനെ ഉപയോഗിക്കുന്നതിനെയും ശക്തമായി കോടതി എതിർത്തു. ഓർത്തഡോക്സ് വിഭാഗം 2017 വിധി നടാക്കണമെന്ന ആവശ്യത്തിൽ ഉറച്ച് നിന്നെങ്കിലും ഫലമുണ്ടായില്ല. രണ്ട് സഭകളാണെന്ന സത്യവാങ്ങ് മൂലം പിൻവലിക്കുവാനും ഓർത്തഡോക്സ് സഭയെ കോടതി അനുവദിച്ചില്ല.
കോടതിയലക്ഷ്യ ഹർജി പുതിയതായി പരിഗണിച്ച് മെറിറ്റടിസ്ഥാനത്തിൽ ഹൈക്കോടതി ഡിവിഷൻ ബെഞ്ച് തീരുമാനമെടുക്കണമെന്ന് സുപ്രീം കോടതി ഉത്തരവിലുണ്ട്. പള്ളിത്തർക്കത്തിൽ സംസ്ഥാന സർക്കാർ പ്രായോഗിക പരിഹാരം കണ്ടെത്തണമെന്നും സുപ്രീം കോടതി നിർദ്ദേശിച്ചു. വിഷയത്തിൽ ആവശ്യമെങ്കിൽ ഇടപെടുമെന്നും സുപ്രീം കോടതി സംസ്ഥാന സർക്കാരിന് സൂചന നൽകിയിട്ടുണ്ട്.
സെമിത്തേരിയിലെ മൃതദേഹ സംസ്കാര പ്രശ്നം സർക്കാർ നിയമ നിർമ്മാണത്തിലൂടെ പരിഹരിച്ചു. തത്വത്തിൽ അതുപോലെ നിയമ നിർമ്മാണം നടത്തി സഭാ തർക്കം പരിഹരിക്കാൻ ഉള്ള അനുവാദമാണ് സർക്കാരിന് ഇന്ന് ലഭിച്ചതെന്നാണ് നിയമവിദഗ്ധരുടെ അഭിപ്രായം. പോലീസ് പ്രൊട്ടക്ഷനിലൂടെ ഇനി യാക്കോബായ സുറിയാനി സഭയുടെ ഒരു പള്ളിയും പിടിച്ചെടുക്കാൻ കഴിയില്ലെന്നതും ഓർത്തഡോക്സ് വിഭാഗത്തിന് വലിയ ആഘാതമാണ്. യാക്കോബായ സുറിയാനി സഭക്ക് എറെ ആശ്വാസം നൽകുന്ന ഒരു വിധിയാണ് സുപ്രീം കോടതിയിൽ നിന്നുണ്ടായതെന്നാണ് വിശ്വാസികളുടെ പ്രതികരണം.
