നേര്യമംഗലം: തലക്കോട് വനത്തില്‍ എക്സൈസ് നടത്തിയ പരിശോധനയില്‍ ചാരായവാറ്റുകേന്ദ്രം കണ്ടെത്തി തകർത്തു. കുട്ടമ്പുഴ റേഞ്ച് എക്സൈസ് എക്സൈസ് ഇൻസ്പെക്ടർ പി.രമേശിന്റെ നേതൃത്വത്തിലുള്ള പാർട്ടിയും എറണാകുളം എക്സൈസ് ഇൻറലിജൻസ് വിഭാഗവും വനപാലകരും രഹസ്യവിവരത്തിന്റെയടിസ്ഥാനത്തിൽ തലക്കോട് ചെക്ക് പോസ്റ്റിന്റെ തെക്ക് വശം മുള്ളരിങ്ങാട് പ്രദേശ അതിർത്തി ഉൾ വനത്തിനുള്ളിൽ നടത്തിയ മിന്നൽ പരിശോധനയിൽ ചാരായം വാറ്റുന്നതിനുള്ള 140 ലിറ്റർ വാഷും 5 ലിറ്റർ ചാരായവും പിടിച്ചെടുത്തു.
പാറക്കെട്ടുകൾക്കിടയിലുള്ള അള്ളിൽ രഹസ്യമായാണ് വാറ്റ് കേന്ദ്രം പ്രവർത്തിച്ചിരുന്നത്.
ഇലക്ഷനോടനുബന്ധിച്ച് മലയോര മേഖലകൾ കേന്ദ്രീകരിച്ച് ചാരായം വാറ്റ് വർദ്ധിക്കുന്നതിനുള്ള സാദ്ധ്യതയുണ്ടെന്ന് എക്സൈസ് ഇൻറലിജൻസിന് വിവരം ലഭിച്ചിച്ചിട്ടുണ്ട്‌. കൂടാതെ മുൻകുറ്റവാളികളായ അനധികൃത മദ്യവിൽപന സംഘങ്ങളേയും ചാരായ വാറ്റ് കേസിൽ പ്രതികളായിട്ടുള്ളവരുടെ നീക്കങ്ങളും നിരീക്ഷിച്ചു വരുന്നുണ്ട്. പ്രതികളെ കണ്ടെത്തുനതിന് തുടർ അന്വേഷണം ഊർജ്ജിതമാക്കി. റെയ്‌ഡിൽ പ്രിവൻറീവ് ഓഫീസർ സാജൻപോൾ, പ്രിവൻറീവ് ഓഫീസർ എൻ.എ മനോജ് (ഇന്റലിജൻസ് വിഭാഗം) സിവിൽ എക്സൈസ് ഓഫീസർമാരായ , ജെറിൻ പി ജോർജ്ജ്, ബേസിൽ തോമസ് എന്നിവരും പങ്കെടുത്തു
