കോതമംഗലം : കുട്ടമ്പുഴ പഞ്ചായത്തിലെ കുഞ്ചിപ്പാറ,തലവച്ചപാറ ആദിവാസി കോളനികളിലെ വൈദ്യുതീകരണം യുദ്ധകാല അടിസ്ഥാനത്തിൽ പൂർത്തീകരിക്കുമെന്ന് വൈദ്യുതി വകുപ്പ് മന്ത്രി കെ കൃഷ്ണൻകുട്ടി നിയമസഭയിൽ അറിയിച്ചു.പ്രസ്തുത കോളനികളിലെ വൈദ്യുതീകരണ പ്രവർത്തികൾ വേഗത്തിൽ പൂർത്തിയാക്കണമെന്ന് ആവശ്യപ്പെട്ട് ആന്റണി ജോൺ എം എൽ എ ഉന്നയിച്ച നിയമസഭ ചോദ്യത്തിന് മറുപടി പറയുമ്പോൾ ആണ് മന്ത്രി ഇക്കാര്യം വ്യക്തമാക്കിയത്.4,07,02,000 രൂപയുടെ ഭരണാനുമതി നല്കി ടെണ്ടർ നടപടി പൂർത്തീകരിച്ച് കോൺട്രാക്ട് എഗ്രിമെന്റ് വച്ചിട്ടുണ്ട്.13 കി.മീ 11 കെ.വി ഭൂഗർഭകേബിൾ വലിക്കുന്ന പ്രവർത്തി 0.15 കി.മീ 11 കെ.വി. ഓവർ ഹെഡ് ലൈൻ വലിക്കുന്ന പ്രവർത്തി,രണ്ട് 100 കെ.വി.എ. ട്രാൻസ്ഫോർമറുകൾ സ്ഥാപിക്കുന്ന പ്രവർത്തി 4.65 കി.മീ. ലോ ടെൻഷൻ ഏരിയൽ ബഞ്ച്ഡ് കണ്ടക്ടർ (ABC) ലൈൻ വലിക്കുന്ന പ്രവർത്തി എന്നിവ നടപ്പിലാക്കുവാനാണ് തീരുമാനിച്ചിട്ടുള്ളത്.

മേൽ പ്രവർത്തി ആറുമാസ കാലയളവിൽ പൂർത്തീകരിക്കാനാണ് ലക്ഷ്യമിടുന്നത്.പ്രസ്തുത ഗോത്രവർഗ്ഗ ഊരുകൾ വനാന്തർ ഭാഗത്ത് സ്ഥിതി ചെയ്യുന്ന വിദൂര കോളനികൾ ആയതിനാൽ ഈ പ്രദേശങ്ങളിലെ വൈദ്യുതീകരണത്തിന് ആവശ്യമായ സാധനസാമഗ്രികൾ എത്തിക്കുന്നതിന് കാലതാമസം നേരിടുന്നുണ്ട്. എന്നിരുന്നാലും കോളനികളുടെ വൈദ്യുതീകരണം യുദ്ധകാല അടിസ്ഥാനത്തിൽ പൂർത്തീകരിക്കുമെന്നും വൈദ്യുതി വകുപ്പ് മന്ത്രി കെ കൃഷ്ണൻകുട്ടി ആന്റണി ജോൺ എം എൽ എ യെ നിയമസഭയിൽ അറിയിച്ചു.

കോതമംഗലം : കാട്ടാന ശല്യവും, അവിചാരിതമായി ഉണ്ടായ കനത്ത കാറ്റിലും മഴയിലുമായി കവളങ്ങാട് പഞ്ചായത്തിലെ വാഴക്കർഷകർക്ക് കനത്ത നാശനഷ്ടം സംഭവിച്ചു. പതിനഞ്ചോളം കർഷകരുടെ മൂവായിരത്തിലധികം കുലച്ച ഏത്തവാഴകളാണ് പൂർണ്ണമായി നശിച്ചത്. ജോണി ലോപ്പസ്, പാലക്കാട്ട്, നീണ്ട പാറ എന്ന വ്യക്തിയുടെ നൂറോളം കുലച്ച ഏത്തവാഴകളാണ് കാട്ടാനകൾ പൂർണ്ണമായി നശിപ്പിച്ചത്. കപ്പലാം വീട്ടിൽ സാജുവിൻ്റെ കുലച്ച 1500 ഏത്തവാഴകളും ,എൽദോസ് ടി.കെ തോമ്പ്രയിൽ, തലക്കോട് എന്ന കർഷകൻ്റെ കുലച്ച 500 ഏത്തവാഴകളുമാണ് പ്രകൃതിക്ഷോഭം മൂലം പൂർണ്ണമായി നശിച്ചത്. ആകെ 15 ലക്ഷം രൂപയുടെ നാശനഷ്ടമാണ് പ്രാഥമികമായി വിലയിരുത്തുന്നത്.

നാശനഷ്ടമുണ്ടായ പ്രദേശങ്ങൾ കൃഷി അസിസ്റ്റൻ്റ് ഡയറക്ടർ വി.പി സിന്ധു, കൃഷി ഓഫീസർ കെ.എ സജി, അസിസ്റ്റൻ്റ് കൃഷി ഓഫീസർ കെ.സി സാജു, കൃഷി അസിസ്റ്റൻ്റ് ദീപ വി.കെ എന്നിവർ സന്ദർശിച്ചു.

ചിത്രം :1.കനത്ത മഴയിലും ചുഴലിക്കാറ്റിലും നാശനഷ്ടം സംഭവിച്ച നെല്ലിമറ്റം കപ്പിലാംവീട്ടിൽ സാജു കെ.ജിയുടെ വാഴത്തോട്ടം കോതമംഗലം കൃഷി അസിസ്റ്റൻ്റ് ഡയറക്ടർ വി.പി സിന്ധു ,കൃഷി ഓഫീസർ സജി കെ എ, അസിസ്റ്റൻ്റ് കൃഷി ഓഫീസർ സാജു കെ സി എന്നിവർ സന്ദർശിക്കുന്നു.

2. കാട്ടാനക്കൂട്ടം നശിപ്പിച്ച നീണ്ടപാറ പാലക്കാട്ട് ജോണി ലോപ്പസിൻ്റെ വാഴത്തോട്ടം കൃഷി ഓഫീസർ സജി കെ എ, കൃഷി അസിസ്റ്റൻ്റ് ദീപ വി കെ എന്നിവർ സന്ദർശിക്കുന്നു.

കോതമംഗലം : കോതമംഗലം താലൂക്ക് ആശുപത്രിയിൽ കിഫ്ബി വഴി 11 കോടി 15 ലക്ഷം രൂപയുടെ വികസന പദ്ധതികൾ നടപ്പിലാക്കുമെന്ന് ആരോഗ്യ വകുപ്പ് മന്ത്രി വീണാ ജോർജ് നിയമസഭയിൽ വ്യക്തമാക്കി. ആന്റണി ജോൺ എം എൽ എ യുടെ നിയമസഭ ചോദ്യത്തിന് മറുപടി പറയുമ്പോൾ ആണ് മന്ത്രി ഇക്കാര്യം അറിയിച്ചത്.എറണാകുളം ജില്ലയുടെ കിഴക്കൻ മേഖലയിൽ നിരവധിയായ ആദിവാസി സമൂഹമുൾപ്പെടെയുള്ള സാധാരണക്കാരായ നിരവധി രോഗികൾ നിത്യേന ആശ്രയിക്കുന്ന കോതമംഗലം താലൂക്ക് ആശുപത്രിയുടെ വികസനത്തിന് പുതിയ പദ്ധതികൾ ആവിഷ്കരിച്ച് നടപ്പിലാക്കണമെന്ന് എം എൽ എ നിയമസഭയിൽ ആവശ്യപ്പെട്ടു. ഇതിന്റെ ഭാഗമായി കിഫ്‌ബി വഴി നടപ്പിലാക്കുന്ന വികസന പ്രവർത്തനങ്ങൾ വേഗത്തിൽ നടപ്പിലാക്കണമെന്നും എം എൽ എ ആവശ്യപ്പെട്ടു.

കോതമംഗലം താലൂക്ക് ആശുപത്രിയുടെ വികസന പദ്ധതികൾക്കായി (സിവിൽ ഇൻഫ്രാസ്ട്രക്ചർ ആന്റ് മെഡിക്കൽ ഉപകരണങ്ങൾ) 11 കോടി 15 ലക്ഷം രൂപയുടെ ഭരണാനുമതി നല്കിയിട്ടുണ്ട്.ഇതിന്റെ ഭാഗമായി പ്രസവാനന്തര വാർഡ്,ഒഫ്താൽമോളജി ഒ റ്റി വാർഡ്,വാർഡുകൾ എന്നിവയുടെ നിർമ്മാണ പ്രവർത്തനങ്ങൾ കിഫ്ബി വഴി നടപ്പിലാക്കും.പ്രസ്തുത പദ്ധതിയുടെ ധനാനുമതിക്കായി പ്രൊപ്പോസൽ കിഫ്ബിക്ക് സമർപ്പിച്ചിട്ടുണ്ട്.ധനാനുമതി ലഭിക്കുന്ന മുറയ്ക്ക് ടെണ്ടർ നടപടികൾ ഉൾപ്പെടെയുള്ളവ സ്വീകരിച്ച് പ്രവർത്തി ആരംഭിക്കുമെന്നും ആരോഗ്യ വകുപ്പ് മന്ത്രി വീണാ ജോർജ് ആന്റണി ജോൺ എം എൽ എ യെ നിയമസഭയിൽ ആറിയിച്ചു.എം എൽ എ ആസ്തി വികസന ഫണ്ടിൽ നിന്നും 2 കോടി 50 ലക്ഷം രൂപ ചെലവഴിച്ച് നിർമ്മിക്കുന്ന ഡയാലിസിസ് സെന്റർ കം ക്യാഷ്വാലിറ്റി ബ്ലോക്കിന്റെ നിർമ്മാണ പ്രവർത്തനങ്ങൾ നടന്നുവരികയാണെന്നും, ഇതിന് പുറമെയാണ് കിഫ്ബി വഴി 11 കോടി 15 ലക്ഷം രൂപയുടെ വികസന പ്രവർത്തനങ്ങൾ കിഫ്ബി വഴി താലൂക്ക് ആശുപത്രിയിൽ നടപ്പിലാക്കുന്നതെന്നും എം എൽ എ പറഞ്ഞു.