തിരുവനന്തപുരം : എറണാകുളം ജില്ലയില്‍ രണ്ട് ആരോഗ്യ സ്ഥാപനങ്ങള്‍ക്ക് കൂടി ദേശീയാംഗീകാരം. നാഷണല്‍ ക്വാളിറ്റി അഷ്വറന്‍സ് സ്റ്റാന്‍ഡേര്‍ഡ്‌സ് അംഗീകാരം കോട്ടപ്പടി കുടുംബാരോഗ്യകേന്ദ്രത്തിനും പായിപ്ര പ്രാഥമികാരോഗ്യകേന്ദ്രത്തിനുമാണ് ലഭിച്ചത്. ഇതോടെ ജില്ലയില്‍ ഈ അംഗീകാരം നേടിയ സ്ഥാപനങ്ങളുടെ എണ്ണം എഴായി. രോഗികള്‍ക്കുള്ള സേവനങ്ങള്‍, മരുന്നുകളുടെ ലഭ്യതയും വിതരണവും, ക്ലിനിക്കല്‍ സേവനങ്ങള്‍, പകര്‍ച്ചവ്യാധി പ്രതിരോധപ്രവര്‍ത്തനങ്ങള്‍ തുടങ്ങി എട്ട് വിഭാഗങ്ങളെ അടിസ്ഥാനമാക്കിയാണ് നാഷണല്‍ ക്വാളിറ്റി അഷ്വറന്‍സ് സ്റ്റാന്‍ഡേര്‍ഡിന് പരിഗണിക്കുന്നത്. ഇവയില്‍ ഓരോ വിഭാഗത്തിലും എഴുപത് ശതമാനത്തില്‍ കൂടുതല്‍ മാര്‍ക്ക് നേടുന്ന സ്ഥാപനങ്ങളെയാണ് ഈ അംഗീകാരത്തിന് പരിഗണിക്കുന്നത്.
ജില്ലാതലത്തിലും സംസ്ഥാനതലത്തിലും നടക്കുന്ന പരിശോധനകള്‍ക്ക് ശേഷം ദേശീയതലത്തിലുള്ള സംഘത്തിന്റെ പരിശോധനയുടെ അടിസ്ഥാനത്തിലാണ് നാഷണല്‍ ക്വാളിറ്റി അഷ്വറന്‍സ് സ്റ്റാന്‍ഡേഡ്‌സിന് തെരഞ്ഞെടുക്കുന്നത്. സെപ്തംബറിലാണ് കേന്ദ്രസംഘത്തിന്റെ മൂല്യനിര്‍ണയം നടന്നത്. ഈ പരിശോധനയില്‍ കോട്ടപ്പടി പ്രാഥമികാരോഗ്യകേന്ദ്രത്തിന് 90 ശതമാനം മാര്‍ക്ക് ലഭിച്ചിരുന്നു. ഏറണാകുളം ജനറല്‍ ആശുപത്രി, തൃക്കാക്കര നഗരപ്രാഥമികാരോഗ്യകേന്ദ്രം, വാഴക്കുളം പ്രാഥമികാരോഗ്യകേന്ദ്രം, സാമൂഹികാരോഗ്യകേന്ദ്രങ്ങളായ പണ്ടപ്പിള്ളി, കീച്ചേരി എന്നിവയാണ് അംഗീകാരം നേടിയ മറ്റ് സ്ഥാപനങ്ങള്‍.
തിരുവനന്തപുരത്തു വച്ച് നടന്ന അവാർഡ് ദാന ചടങ്ങിൽ ആരോഗ്യമന്ത്രി കെ കെ ശൈലജ ടീച്ചറുടെ കൈയ്യിൽ നിന്നും കോട്ടപ്പടി ഗ്രാമ പഞ്ചായത്ത് പ്രസിഡന്റ് MK വേണു അവാർഡ് ഏറ്റുവാങ്ങി. വൈസ് പ്രസിഡന്റ് റംല മുഹമ്മദ്, വികസന കാര്യ സ്റാന്റിംഗ് കമ്മിറ്റി ചെയർമാൻ MK എൽദോസ്, പഞ്ചായത്ത് മെമ്പർ ഷൈമോൾ ബേബി, കോട്ടപ്പടി പ്രാഥമികാരോഗൃ കേന്ദ്രo മെഡിക്കൽ ഓഫീസർ ഡോക്ടർ ജെറാൾഡ് പി മാത്യു , കോട്ടപ്പടി പ്രാഥമികാരോഗൃ കേന്ദ്രത്തിലെ ജീവനക്കാർ , ആശാ വർക്കേഴ്‌സ് , ദേശീയാംഗീകാരത്തിനായി പ്രവർത്തിച്ച കോട്ടപ്പടി പ്രാഥമികാരോഗൃ കേന്ദ്രത്തിലെ മുൻ ജീവനക്കാർ തുടങ്ങിയവർ ചടങ്ങിൽ പങ്കെടുത്തു.
You must be logged in to post a comment Login