കോതമംഗലം : ഇന്നലെ വൈകുന്നേരം പെയ്ത മഴയിൽ ഭൂതത്താൻകെട്ടിൽ ഇടിമിന്നലിൽ ഒരു വീട് നശിച്ചു. വൈകിട്ട് ഏഴ് മണിക്കാണ് സംഭവം. ഭൂതത്താൻകെട്ട് ഓതോളിൽ ബേബിയുടെ വീടിനാണ് ഇടിമിന്നൽ ഏറ്റത്. മഴയോട് കൂടിയ ഇടിമിന്നലിൽ വീടിന് മുകളിലേക്ക് തീഗോളം പോലെ ഒരു വസ്തു ചാടുകയായിരുന്നെന്ന് വീട്ടുകാർ പറയുന്നു. തൊട്ടടുത്ത് നിന്ന മരവും പൂർണ്ണമായും കത്തിനശിച്ചു. പതിനഞ്ച് സെക്കൻ്റോളം മരത്തിൽ നിന്ന് തീ ഉണ്ടായതായും ബേബി പറഞ്ഞു.
വീടിനോട് ചേർന്നുള്ള തൊഴുത്തിൽ കെട്ടിയിരുന്ന രണ്ട് വയസ്സുള്ള പശുവിന് ഇടിമിന്നൽ ഏൽക്കുകയും ഉടൻ തന്നെ പശു ചാവുകയും ചെയ്തു. ബേബിയും ഭാര്യയും മകനും വീടിനുള്ളിൽ ഈ സമയം ഉണ്ടായിരുന്നു. വീട്ടിലെ വയറിംഗ് പൂർണ്ണമായും ഇടിമിന്നലിൽ നശിച്ചു. ബേബിയും കുടുംബവും വീടിനുള്ളിൽ നിന്ന് ഓടി രക്ഷപ്പെടുകയായിരുന്നു.
