കോട്ടപ്പടി : കാട്ടാനക്കൂട്ടം കോട്ടപ്പടിയിലെ ജനവാസ മേഖലയിൽ ഇറങ്ങുന്നത് പതിവാകുന്നു. ഇന്നലെ ഞായറാഴ്ച്ച രാത്രി പത്ത് മണിയോടുകൂടി കാട്ടാനകൾ കോട്ടപ്പടി പഞ്ചായത്തിലെ പ്രധാന പാതയായ കുറുപ്പംപടി – കൂട്ടിക്കൽ റോഡിലെ വാവേലി ഭാഗത്തെ റോഡ് മറികടന്ന് ജനവാസ മേഖലയിലേക്ക് ഇറങ്ങുകയായിരുന്നു. വാവേലി വെള്ളാംപറമ്പിൽ ഗംഗാധരന്റെ കൃഷിയിടത്തിലെ മുപ്പതോളം കുലച്ച വാഴകൾ പൂർണ്ണമായും ചവിട്ടി നശിപ്പിക്കുകയും, ഇരുപതോളം രണ്ടര വർഷം പഴക്കമുള്ള റബ്ബർ തൈകൾ നശിപ്പിക്കുകയും ചെയ്തു. ഏകദേശം എൺപതിനായിരത്തോളം രൂപയുടെ കൃഷി നാശമാണ് ഉണ്ടായിരിക്കുന്നത്. തുടർന്ന് നാട്ടുകാർ സംഘടിച്ചു കാട്ടാനകളെ തുരത്തി കാട്ടിലേക്ക് കയറ്റിവിടുകയായിരുന്നു.
വെള്ളിയാഴ്ച്ച രാത്രി കാട്ടാനകൾ ഇറങ്ങി മുട്ടത്തുപാറ മേഖലയിൽ ഇഞ്ചി , മഞ്ഞൾ , വാഴ , പൈനാപ്പിൾ കൃഷികൾ നശിപ്പിച്ചിരുന്നു. തുടർന്ന് വൈകാരികമായി പ്രകോപിതരായ നാട്ടുകാരും വനം വകുപ്പ് ജീവനക്കാരുമായി വാക്കേറ്റം ഉണ്ടാകുകയും ചെയ്തിരുന്നു. ശനിയാഴ്ച്ച ഈ ഭാഗത്ത് തന്നെ ഇറങ്ങിയ കാട്ടാനക്കൂട്ടത്തെ കണ്ട നാട്ടുകാർ അക്ഷരാർത്ഥത്തിൽ ഞെട്ടുകയും ചെയ്തു. ആറ് കൊമ്പൻമാറും ഒരു പിടിയാനയും ഉൾപ്പെട്ട കൂട്ടമായിരുന്നു ഇവിടെ ഇറങ്ങിയതെന്ന് പ്രദേശവാസികളായ സണ്ണിയും, അനിലും വെളിപ്പെടുത്തുന്നു. ഞായറാഴ്ച്ച രാത്രിയും കാട്ടാന നാട്ടിലേക്ക് ഇറങ്ങിയത് നാട്ടുകാരുടെ മനോവീര്യം ചോരുന്ന അവസ്ഥയാണുള്ളത്.
തുടർച്ചയായി കോട്ടപ്പടി പഞ്ചായത്തിലെ കോട്ടപ്പാറ വന മേഖലയോട് ചേർന്ന് കിടക്കുന്ന ജനവാസ മേഖലയിലേക്ക് കാട്ടാന ഇറങ്ങുന്നത് ജനങ്ങളുടെ സ്വസ്ഥ ജീവിതത്തിന് വിഹാതം സൃഷ്ഠിക്കുകയാണെന്ന് വാർഡ് മെമ്പർ സന്തോഷ് അയ്യപ്പൻ പറയുന്നു. കാട്ടാന കൃഷി നശിക്കുന്നത് കൂടാതെ വളർത്തു മൃഗങ്ങളെ ആക്രമിക്കുകയും കൊലപ്പെടുത്തുകയും വീടുകൾ കൂടി ആക്രമിക്കുകയും ചെയ്ത സംഭവങ്ങൾ അടുത്ത കാലത്ത് സംഭവിക്കുകയും ചെയ്തു. അടിയന്തരമായി ഫെൻസിങ് ശക്തമാക്കിയും, ഫെൻസിംഗിനോട് ചേർന്നുള്ള വനമേഖലയിലെ മരങ്ങൾ വെട്ടിമാറ്റുവാനുള്ള നടപടികൾ വേഗത്തിലാക്കണമെന്നും, കർഷകർക്ക് നേരിടുന്ന കൃഷി നാശത്തിനുള്ള നഷ്ടപരിഹാര തുക അടിയന്തിരമായി കൈമാറണമെന്നും മെമ്പർ സന്തോഷ് ആവശ്യപ്പെടുന്നു.
