കോതമംഗലം : തങ്കളം – കാക്കനാട് നാലുവരി പാതയുടെ സ്ഥലമേറ്റെടുപ്പുമായി ബന്ധപ്പെട്ട സർവ്വേ നടപടികൾ അവസാന ഘട്ടത്തിലാണെന്ന് റവന്യൂ വകുപ്പ് മന്ത്രി K രാജൻ നിയമസഭയെ അറിയിച്ചു.ആന്റണി ജോൺ MLA യുടെ നിയമസഭ ചോദ്യത്തിന് മറുപടി പറയുമ്പോൾ ആണ് മന്ത്രി ഇക്കാര്യം വ്യക്തമാക്കിയത്. തങ്കളം – കാക്കനാട് നാലുവരി പാതയുടെ സ്ഥലമേറ്റെടുപ്പ് നടപടികൾ വേഗത്തിലാക്കണമെന്ന് MLA നിയമസഭയിൽ ആവശ്യപ്പെട്ടു. 255 കോടി രൂപയുടെ DPR തയ്യാറാക്കിയിട്ടുള്ള കോതമംഗലം മണ്ഡലത്തിലെ പ്രസ്തുത പാതയുടെ സ്ഥലമേറ്റെടുപ്പ് നടപടികൾ സമയബന്ധിതമായി പൂർത്തീകരിക്കുന്നതിനായി സ്പെഷ്യൽ തഹസിൽദാർ ഓഫീസ് ആരംഭിക്കുന്ന കാര്യം സർക്കാർ പരിഗണിക്കണം എന്നും MLA ആവശ്യപ്പെട്ടു.
എറണാകുളം ജില്ലയുടെ കിഴക്കൻ മേഖലകളുടെ സമഗ്ര വികസനത്തിന് ഉതകുന്ന കോതമംഗലത്തിന്റെ സ്വപ്ന പദ്ധതിയായ പ്രസ്തുത നാലുവരിപ്പാതയുടെ സ്ഥലമേറ്റെടുപ്പുമായി ബന്ധപ്പെട്ട നടപടി ക്രമങ്ങൾ പൂർത്തിയാക്കി സ്ഥലമേറ്റെടുപ്പ് വേഗത്തിലാക്കണമെന്നും MLA നിയമസഭയിൽ ആവശ്യപ്പെട്ടു. കോതമംഗലം മണ്ഡലത്തിലെ തങ്കളം – കാക്കനാട് നാലുവരി പാതയുടെ നിർമ്മാണവുമായി ബന്ധപ്പെട്ട് എറണാകുളം ജില്ലയിലെ എരമല്ലൂർ വില്ലേജിലെ 5.9258 ഹെക്ടർ സ്ഥലം കാക്കനാട് – കോതമംഗലം റോഡ് വികസനത്തിനായി എൽ എ ആർ ആർ ആക്ട് 2013 പ്രകാരം ഏറ്റെടുക്കുന്നതിനുള്ള ഭരണാനുമതി പുറപ്പെടുവിപ്പിച്ചിട്ടുള്ളതും,സാമൂഹ്യാഘാത പഠനത്തിന്റെ അടിസ്ഥാനത്തിൽ വിദഗ്ദ്ധ സമിതിയുടെ പരിഗണനയ്ക്ക് സമർപ്പിച്ചിട്ടുള്ളതും വിദഗ്ദ്ധ സമിതി 30-07-2019 ന് ശുപാർശ സമർപ്പിച്ചിട്ടുള്ളതുമാണ്. പ്രസ്തുത ശുപാർശയുടെ അടിസ്ഥാനത്തിൽ എൽ എ ആർ ആർ ആക്ടിലെ സബ് സെക്ഷൻ 2 സെക്ഷൻ 8 പ്രകാരമുള്ള സമുചിത സർക്കാർ തീരുമാനം 27-11-2019 ലെ സ . ഉ ( കൈ) നമ്പർ 357/2019 റവ. പ്രകാരം പുറപ്പെടുവിച്ചിട്ടുള്ളതാണ്.
വിദഗ്ദധ സമിതി റിപ്പോർട്ട് നല്കുന്ന തീയതി മുതൽ ഒരു വർഷത്തിനുള്ളിൽ പ്രാഥമിക വിജ്ഞാപനം പുറപ്പെടുവിക്കേണ്ടതാണെന്ന് നിയമം അനുശാസിക്കുന്നു.എന്നാൽ പല കാരണങ്ങളാൽ ഈ കാലയളവിനുള്ളിൽ 11 (1) വിജ്ഞാപനം പുറപ്പെടുവിക്കുവാൻ സാധിച്ചിട്ടില്ലാത്തതും ആയതിനാൽ ഇത് സംബന്ധിച്ച് സർക്കാരിന്റെ വിവേചന അധികാരം ഉപയോഗിച്ച് സമയം ദീർഘിപ്പിച്ച് നല്കുന്നതിനുള്ള ശുപാർശ അംഗീകരിച്ച് 11 (1) വിജ്ഞാപനം പ്രസിദ്ധീകരിക്കുന്നതിനുള്ള കാലയളവ് 30-07-2020 മുതൽ ആറ് മാസത്തേക്ക് കൂടി ദീർഘിപ്പിച്ച് 13-11-2020 ലെ സ.ഉ. (അച്ചടി) നമ്പർ 90/2020/ റവ. പ്രകാരം ദീർഘിപ്പിച്ച് നല്കിയിട്ടുള്ളതുമാണ് തുടർന്ന് 11 (1) വിജ്ഞാപനം (പ്രാഥമിക വിജ്ഞാപനം) 30-01-2021 ലെ സ . ഉ : പ്രസിദ്ധീകരിച്ചിട്ടുള്ളതും ആയതിന്റെ സർവ്വേ നടപടികൾ അവസാന ഘട്ടത്തിലുമാണ്.
11 (1) വിജ്ഞാപനം പ്രസിദ്ധീകരിച്ച് 12 മാസത്തിനകം ആയത് 30-01-2022 നകം 19 (1) പ്രഖ്യാപനം പ്രസിദ്ധീകരിക്കുന്നതിനുള്ള നടപടികൾ സ്വീകരിച്ച് വരുന്നു.ഇതിനായി നിലവിൽ സ്പെഷ്യൽ തഹസിൽദാർ (എൽ എ) ജനറൽ കാക്കനാട് ഓഫീസ് മുഖാന്തിരം പൊന്നും വില നടപടികൾ നടന്നു വരുന്നതായും റവന്യൂ വകുപ്പ് മന്ത്രി K രാജൻ നിയമസഭയിൽ ആന്റണി ജോൺ MLAയെ അറിയിച്ചു.
