കോതമംഗലം: കാഴ്ചക്കാരിൽ വിജ്ഞാനവും വിനോദവും നിറച്ച് ടെക് ഒളിമ്പ്യാഡ് ’22 ന് എംബിറ്റ്‌സ് എഞ്ചിനീയറിംഗ് കോളേജിൽ തുടക്കമായി. ടെക്ക് ഒളിംപ്യാഡ് ’22 ന്റെ ഭാഗമായി സ്കൂൾ വിദ്യാർത്ഥികളുടെ പ്രതിഭയും സർഗാത്മകതയും ഉണർത്തുന്ന വിവിധ മത്സരങ്ങളും കേന്ദ്ര സംസ്ഥാന പൊതുമേഖല സ്ഥാപനങ്ങളും സ്വകാര്യ സ്ഥാപനങ്ങളും കൂടാതെ കോതമംഗലം മാർ തോമ ചെറിയപള്ളിയുടെ കീഴിലുള്ള മാർ ബേസിൽ ഗ്രൂപ്പ് ഓഫ് ഇൻസ്റ്റിറ്റ്യൂഷൻ ഉൾപ്പെട്ട സ്ഥാപനങ്ങളുടെ ശാസ്ത്ര സാങ്കേതിക പ്രദർശനവും നടക്കും. ഉത്‌ഘാടനദിനത്തിൽ വിവിധ സ്‌കൂളുകളിൽ നിന്നുമായി ആയിരക്കണക്കിന് വിദ്യാർത്ഥികളാണ് മത്സരങ്ങളിൽ പങ്കെടുക്കാനും പ്രദർശനം കാണുവാനായി എത്തുന്നത്.
മാർ തോമ ചെറിയപള്ളി വികാരി റവ. ഫാ ജോസ് പരത്തുവയലിന്റെ അധ്യക്ഷതയിൽ ചേർന്ന ഉത്‌ഘാടന സമ്മേളനം കൊച്ചി ഇൻകം ടാക്‌സ് വിഭാഗം ജോയിന്റ് കമ്മീഷണർ ജ്യോതിസ് മോഹൻ ഐ.ആർ.എസ്. ഉത്‌ഘാടനം ചെയ്തു. പെരിങ്ങളം എന്ന ഗ്രാമത്തിൽ ചായക്കക്കട നടത്തുന്ന അച്ഛനെയും അമ്മയെയും ആദ്യമായി വിമാനത്തിൽ കയറ്റിയതും ആദ്യമായി മറ്റ് സ്ഥലങ്ങൾ കാണിച്ചതുമാണ് തന്റെ ജീവിതത്തിലെ വിജയമായി താൻ കണക്കാക്കുന്നത് എന്ന് അദ്ദേഹം പറഞ്ഞു. അതുപോലെ ഓരോ വിദ്യാർത്ഥിയും വളർന്ന് വലുതാകുമ്പോൾ തങ്ങളുടെ മാതാപിതാക്കൾ സ്വപനം കണ്ട ജീവിതം നൽകാൻ കഴിയുന്ന ഒരു തലത്തിലേക്ക് ഉയർത്തുന്നതിനും അതിന് വേണ്ട കാഴ്ച്ചപ്പാടുകൾ ഉണ്ടാക്കുന്നതിനും എംബിറ്റ്‌സ് എഞ്ചിനീയറിംഗ് കോളേജ് നടത്തുന്ന ഈ പ്രദർശനവും മത്സരങ്ങളും ഉപകരിക്കുമാറാകട്ടെ എന്ന് അദ്ദേഹം ഉത്‌ഘാടന പ്രസംഗത്തിൽ പറഞ്ഞു.
ചടങ്ങിൽ ഫോറസ്റ്റ് ഇൻഡസ്ട്രീസ് ട്രാവൻകൂർ ചെയർമാൻ ആർ അനിൽകുമാർ മുഖ്യാതിഥിയായിരുന്നു, കേരളാ സാങ്കേതിക സർവകലാശാല സിൻഡിക്കേറ്റ് മെമ്പർ ഡോ. വിനോദ് കുമാർ ജേക്കബ് ആമുഖ പ്രഭാഷണം നടത്തി. കോളേജ് സെക്രട്ടറി സി എ കുഞ്ഞച്ചൻ ചുണ്ടാട്ട്‌, കവളങ്ങാട് ഗ്രാമ പഞ്ചായത്ത് പ്രസിഡന്റ് സൈജൻറ് ചാക്കോ, ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ ഷിബു പടപ്പറമ്പത്ത്, വാർഡ് മെമ്പർ സിബി മാത്യൂസ്, കോളേജ് ചെയർമാൻ പി വി പൗലോസ്, എന്നിവർ സംസാരിച്ചു. കോളേജ് പ്രിൻസിപ്പൽ ഡോ. പി സോജൻലാൽ സ്വാഗതവും ഒളിമ്പ്യാഡ് ’22 ജനറൽ കൺവീനർ പ്രഫ. നിധീഷ് എൽദോ ബേബി നന്ദിയും പറഞ്ഞു.
ഹൈസ്കൂൾ, വൊക്കേഷണൽ ഹയർ സെക്കൻഡറി സ്കൂൾ, ഹയർസെക്കൻഡറി സ്കൂൾ എന്നിവിടങ്ങളിലെ വിദ്യാർത്ഥികൾക്കായി ക്വിസ്, സ്റ്റിൽ മോഡൽ, വർക്കിംഗ് മോഡൽ എന്നീ രണ്ട് തലങ്ങളിൽ പ്രോജക്ട് മത്സരം, പാഴ്വസ്തുക്കളെ പുനരുപയോഗം ചെയ്യുന്ന വേസ്റ്റ് ക്രാഫ്റ്റ് , നൂതന ആശയങ്ങളെ പരിചയപ്പെടുത്തുന്ന ഐഡിയ തോൺ, ലെയത് മാസ്റ്റർ, പോസ്റ്റർ ഡിസൈൻ എന്നീ മത്സരങ്ങളാണ് സംഘടിപ്പിച്ചിരിക്കുന്നത്. ഓരോ വിഭാഗത്തിലും 25000 രൂപയുടെ ക്യാഷ് പ്രൈസും മൊത്തം മത്സരങ്ങളിൽ ഏറ്റവും കൂടുതൽ പോയിന്റ് കരസ്ഥമാക്കുന്ന നാല് സ്കൂളുകൾക്ക് അമ്പതിനായിരം രൂപ, 25000 രൂപ, 15000 രൂപ, 10000 രൂപ സമ്മാനവും ബസേലിയോസ് സ്മാർട്ട് സ്കൂൾ അവാർഡും നൽകുന്നതാണ്.
ടെക് ഒളിമ്പ്യാഡിന്റെ ഭാഗമായുള്ള പ്രദർശനത്തിൽ ഐഎസ്ആർഒ സ്പേസ് എക്സ്പോ, പ്രതിരോധ മന്ത്രാലയത്തിന് കീഴിലെ ഡിഫെൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷൻ (ഡി ആർ ഡി ഒ), കൊച്ചിൻ ഇന്റർനാഷണൽ എയർ പോർട്ട്, കെ എസ് ആർ ടി സി, കെ എസ് ഇ ബി, ബ്യുറോ ഓഫ് ഇന്ത്യൻ സ്റ്റാൻഡേർസ്, തോക്കുകളും ഡോഗ് സ്‌ക്വാഡിനെയും പരിചയപ്പെടുത്തുന്ന കേരളാ പോലീസ് പ്രദർശനം, കേരളാ ഫയർ ആൻഡ് റെസ്ക്യൂ വിന്റെ പ്രദർശനം, കെൽ, മെഡിക്കൽ ഉപകരണ നിർമ്മാതാക്കളായ കൺസേഡ് ഇന്റർനാഷണൽ, നേര്യമംഗലം കൃഷി ഫാം, റെൻവോൾട് എനർജി സൊല്യൂഷൻസ്, ബോഷ്, കാർച്ചർ തുടങ്ങി നിരവധി സ്ഥാപനങ്ങളുടെ പ്രദർശനം നടക്കുന്നുണ്ട്. ഇതോടൊപ്പം മാർ ബേസിൽ ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ഉൾപ്പെട്ട മാർ ബസേലിയോസ് മെഡിക്കൽ മിഷൻ ആശുപത്രി, മാർ ബസേലിയോസ് ഡെന്റൽ കോളേജ്, മാർ ബസേലിയോസ് സ്കൂൾ ഓഫ് നേഴ്സിങ്, മാർ ബസേലിയോസ് കോളേജ് ഓഫ് നേഴ്സിങ്, സെന്റ് മേരിസ് പബ്ലിക് സ്കൂൾ, എംബിറ്റ്‌സ് എൻജിനീയറിങ് കോളേജ് എന്നിവിടങ്ങളിലെ പ്രദർശനവും ഉണ്ട്. കൂടാതെ, ആധുനിക വാഹനങ്ങളെ പരിചയപ്പെടുത്തുന്ന ഓട്ടോ ഷോ, റിമോട് കണ്ട്രോൾ വാഹനങ്ങളുടെ പ്രദർശനവും, ഡ്രോൺ എക്സ്പോ, ദൃശ്യ മാധ്യമ രംഗത്തെ നൂതന ആശയമായ ഓഗ്മെന്റഡ് റിയാലിറ്റി, വിർച്യുൽ റിയാലിറ്റി, വിവിധ ഇനം തോക്കുകൾ പരിചയപ്പെടുത്തുന്ന വീനസ് ആർമറി, ഇലക്ട്രിക്ക് വാഹനങ്ങളുടെ പ്രദർശനവും ഉണ്ട്. പ്രദർശനം നവംബർ 19 ന് അവസാനിക്കും. സ്കൂൾ വിദ്യാർത്ഥികൾക്കും പൊതുജനങ്ങൾക്കും പ്രവേശനം സൗജന്യമാണ്.
