കോട്ടപ്പടി: തെരുവുനായ്ക്കളിൽ നിന്നും വന്യജീവികളിൽ നിന്നും മനുഷ്യരെ സംരക്ഷിക്കുന്നതിന് സർക്കാർ മുന്തിയ പരിഗണന നൽകണമെന്ന് എൻ്റെ നാട് ജനകീയ കൂട്ടായ്മ ചെയർമാൻ ഷിബു തെക്കുംപുറം. കാട്ടാന, തെരുവുനായ ശല്യത്തിനെതിരെ കോട്ടപ്പടിയിൽ എൻ്റെ നാട് കൂട്ടായ്മ സംഘടിപ്പിച്ച പ്രതിഷേധ ധർണ ഉദ്ഘാടനം ചെയ്യുകയായിരുന്നു അദ്ദേഹം.

കഴിഞ്ഞ സംസ്ഥാനത്ത് ആറുവർഷത്തിനിടെ തെരുവുനായ്ക്കളുടെ കടിയേറ്റ് ചികിത്സ തേടിയത് എട്ട് ലക്ഷം പേരാണ്. 42 മരണപ്പെട്ടു. ഇരുചക്ര വാഹനാപകടങ്ങൾക്ക് ഒരു പ്രധാന കാരണം തെരുവ് നായ്ക്കളാണ്.മൃഗസംരക്ഷണ വകുപ്പ് നടത്തിയ സെൻസസ് പ്രകാരം സംസ്ഥാനത്ത് രണ്ടര ലക്ഷം തെരുവു നായ്ക്കൾ ഉണ്ടെന്നാണ് കണക്ക്. ഇവയെ പിടികൂടി വന്ധ്യംകരണം നടത്തി വാക്സിൻ നൽകി വിട്ടയക്കുന്ന അനിമൽ ബർത്ത് കൺട്രോൾ പദ്ധതി നടപ്പാക്കാൻ ഒരു നായക്ക് 2100 രൂപ ചിലവു വരും. ഇത് പ്രായോഗികമല്ലെന്ന് ഷിബു പറഞ്ഞു.

കോതമംഗലം താലൂക്കിൽ 3 വർഷത്തിനിടെ 40 ഹെക്ടർ കൃഷിഭൂമിയാണ് വന്യമൃഗങ്ങൾ നശിപ്പിച്ചത്. തെങ്ങും കവുങ്ങും റബ്ബറും വാഴയും പൈനാപ്പിളും ഉൾപ്പെടെ എല്ലാ കൃഷിയിടങ്ങളിലും ആനയും കാട്ടുപന്നിയും കുരങ്ങും ഇറങ്ങി കർഷകരുടെ സ്വപ്നം തകർക്കുകയാണ്. മൃഗങ്ങളുടെ ആക്രമണത്തിൽ നൂറോളം പേർക്ക് പരുക്കേറ്റിട്ടുണ്ട്. പരുക്കേൽക്കുന്നവർക്കും കൃഷി നാശം സംഭവിക്കുന്നവർക്കും നഷ്ടപരിഹാരം നൽകാൻ നിയമ വ്യവസ്ഥയുണ്ടെങ്കിലും നഷ്ടത്തിൻ്റെ നാലിലൊന്നും പോലും അധികൃതർ കണക്കാക്കുന്നില്ല. നാമമാത്ര തുക അനുവദിച്ചാൽ പോലും പണം കിട്ടാൻ വർഷങ്ങൾ എടുക്കും. നാലു വർഷം മുൻപ് നടന്ന സംഭവങ്ങൾക്കു പോലും ഇതുവരെ നഷ്ടപരിഹാരം നൽകിയിട്ടില്ലെന്ന് ഷിബു ചൂണ്ടിക്കാട്ടി.

എൻ്റെ നാട് പഞ്ചായത്ത് തല പ്രസിഡൻ്റ് ഡി.കോര അധ്യക്ഷത വഹിച്ചു. എം.കെ.വേണു, കെ.കെ.സുരേഷ്, സി.കെ.സത്യൻ, സി.ജെ.എൽദോസ്, ഇ.എം.മൈക്കിൾ, ജെയിംസ് കോറമ്പേൽ, പി.പി.തങ്കപ്പൻ, ജോഷി പൊട്ടക്കൽ, ഷിജി ചന്ദ്രൻ, ഷൈമോൾ ബേബി, റംല മുഹമ്മദ്, ജിജി സാജു, എം.എസ്.ദേവരാജൻ,ജോസ് കൈതക്കൽ,ബിനോയ് ജോസഫ്, എൻ.ഐ.പൗലോസ്, ബിജു ചേന്നംകുടി എന്നിവർ പ്രസംഗിച്ചു.

കോതമംഗലം :കോതമംഗലം താലൂക്ക് വികസന സമിതി യോഗം ആന്റണി ജോൺ എം എൽ എ യുടെ അധ്യക്ഷതയിൽ മിനി സിവിൽ സ്റ്റേഷൻ ഹാളിൽ വച്ച് നടന്നു.കോതമംഗലം മാർ തോമ ചെറിയ പള്ളി പെരുന്നാളുമായി ബന്ധപ്പെട്ട് കോതമംഗലം ടൗണിന്റെയും പരിസര പ്രദേശങ്ങളുടെയും നവീകരണം വിവിധ വകുപ്പുകളുടെ ഏകോപനത്തോടെ മികച്ച രീതിയിൽ നടപ്പാക്കാൻ സാധിച്ചതായി യോഗം വിലയിരുത്തി.കോതമംഗലം താലൂക്ക് പരിധിയിലെ പി ഡബ്ല്യു ഡി റോഡ് സൈഡുകളിൽ മനുഷ്യ ജീവന് ഭീഷണിയായി നിൽക്കുന്ന മരങ്ങൾ മുറിച്ചു നീക്കാൻ പി ഡബ്ല്യു ഡി യുടെ ഭാഗത്ത് നിന്നും അടിയന്തര ഇടപെടൽ ഉണ്ടാകണമെന്ന് യോഗത്തിൽ ആവശ്യമുയർന്നു.വർദ്ധിച്ചു വരുന്ന ലഹരി മാഫിയക്കെതിരായി പോലീസ്,എക്സൈസ്അധികൃതർ ഇപ്പോൾ സ്വീകരിച്ചു വരുന്ന നടപടികൾ കൂടുതൽ ഊർജ്ജിതമായി മുന്നോട്ടു കൊണ്ടുപോകണമെന്നും ആവശ്യമുയർന്നു.സ്കൂൾ പ്രവർത്തി ദിനങ്ങളിൽ രാവിലെയും വൈകിട്ടും സ്‌കൂളുകൾക്ക് മുന്നിൽ പോലീസ് സാന്നിധ്യം ഉണ്ടെന്ന് ഉറപ്പു വരുത്തുക.കോതമംഗലം സബ് രജിസ്ട്രാർ ഓഫീസിന്റെ അവശേഷിക്കുന്ന നിർമ്മാണപ്രവർത്തനങ്ങൾ വേഗത്തിൽ പൂർത്തീകരിച്ച് ഓഫീസ് ഉടൻ പ്രവർത്തനം ആരംഭിക്കണമെന്നും നിർദ്ദേശം നൽകി.പെരിയാറിനോട് ചേർന്നുള്ള പമ്പ് ഹൗസുകളിൽ വെള്ളം പമ്പ് ചെയ്യാൻ ആവശ്യമായ ജലത്തിന്റെ അളവ് ഉറപ്പു വരുത്താൻ ഭൂതത്താൻകെട്ടിലെ ഷട്ടറുകളുടെ പ്രവർത്തനം അതിനനുസൃതമായി ക്രമീകരിക്കുമെന്ന് പെരിയാർവാലി അധികൃതർ ഉറപ്പു വരുത്തണമെന്നും യോഗം നിർദ്ദേശം നൽകി.യോഗത്തിൽ

കീരംപാറ പഞ്ചായത്ത് പ്രസിഡന്റ് വി സി ചാക്കോ,നഗരസഭ വികസന കാര്യ സ്റ്റാന്റിങ് കമ്മിറ്റി ചെയർമാൻ കെ എ നൗഷാദ്,വിവിധ രാഷ്ട്രീയ പാർട്ടി പ്രതിനിധികൾ, തഹസിൽദാർമാരായററേയ്ച്ചൽ കെ വർഗീസ്,നാസർ കെ എം,വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

കോതമംഗലം : കോതമംഗലം എം എ എൻജിനീയറിങ് കോളേജ് നാഷണൽ സർവ്വീസ് സ്കീം യൂണിറ്റുകളുടെ വാർഷിക സപ്ത ദിന ക്യാമ്പ് ദൃഷ്ടി 2022 ആരംഭിച്ചു.ക്യാമ്പിന്റെ ഉദ്ഘാടനം കോളേജ് അങ്കണത്തിൽ വച്ച് ആന്റണി ജോൺ എം എൽ എ നിർവ്വഹിച്ചു.പ്രിൻസിപ്പാൾ ഡോക്ടർ ബോസ് മാത്യു ജോസ് അധ്യക്ഷത വഹിച്ച ചടങ്ങിൽ ഡോക്ടർ ജെയ് എം പോൾ,പി റ്റി എ പ്രസിഡന്റ്‌ ബോബി പി കുര്യാക്കോസ്,എൻ എസ് എസ് പ്രോഗ്രാം ഓഫീസർമാരായ പ്രൊഫസർ എൽദോ രാജ്,ഡോക്ടർ ജിൻസാ കുരുവിള എന്നിവർ പങ്കെടുത്തു.എൻ എസ് എസ് പ്രോഗ്രാം ഓഫീസർ പ്രൊഫസർ ബൈബിൻ പോൾ സ്വാഗതവും ക്യാമ്പ് ഡയറക്ടർ ഡോക്ടർ ദർശൻ ലാൽ നന്ദിയും പറഞ്ഞു.സെപ്റ്റംബർ 30 മുതൽ ഒക്ടോബർ 6 വരെ വടാട്ടുപാറ പൊയ്ക ഗവൺമെന്റ് ഹൈസ്കൂൾ വച്ചാണ് ക്യാമ്പ്.