കോതമംഗലം : കോവിഡ് 19 വ്യാപനം കൂടി വരുന്ന സാഹചര്യത്തിൽ കോവിഡ് പ്രതിരോധം ശക്തിപ്പെടുത്തുന്നതിൻ്റെ ഭാഗമായി മണ്ഡലത്തിൽ കോവിഡ് പരിശോധനകൾ വർദ്ധിപ്പിക്കുന്നതുമായി ബന്ധപ്പെട്ട് വിവിധ പഞ്ചായത്ത് കേന്ദ്രങ്ങളിൽ കോവിഡ് പരിശോധനകൾ ആരംഭിച്ചതായി ആൻ്റണി ജോൺ എം എൽ എ അറിയിച്ചു.ഇതിൻ്റെ ഭാഗമായി കവളങ്ങാട് പഞ്ചായത്തിൽ എംബിറ്റ്സ് കോളേജിൽ 64 പേരുടെ കോവിഡ് പരിശോധന നടത്തിയതിൽ ഒരു പോസിറ്റീവ് കേസ് റിപ്പോർട്ട് ചെയ്തു. പല്ലാരിമംഗലം പഞ്ചായത്തിൽ അതിഥി തൊഴിലാളികൾക്കായി നാളെ (04 – 09 – 2020 വെള്ളി) അടിവാട് വച്ച് കോവിഡ് പരിശോധന ക്യാമ്പ് സംഘടിപ്പിച്ചിട്ടുണ്ട്. വാരപ്പെട്ടി പഞ്ചായത്തിൽ സി എച്ച് സി കേന്ദ്രീകരിച്ച് ശനിയാഴ്ച്ചയാണ് പരിശോധന ക്യാമ്പ് സംഘടിപ്പിച്ചിട്ടുള്ളത്.
കോവിഡുമായി ബന്ധപ്പെട്ട് പ്രൈമറി, സെക്കണ്ടറി സമ്പർക്ക പട്ടികയിൽ ഉള്ളവരെ കൂടാതെ ആശുപത്രികളിൽ ചികിത്സ തേടുന്ന (ഓ പി) രോഗികളിൽ നിന്ന് പനി,ചുമ,തൊണ്ടവേദന, വയറിളക്കം,ശ്വസന സംബന്ധമായ അസുഖങ്ങൾ എന്നീ രോഗ ലക്ഷണങ്ങൾ ഉള്ളവരെയും,മേൽ ലക്ഷണങ്ങൾ ഉള്ള മറ്റുള്ളവരെയുമാണ് പരിശോധനക്ക് വിധേയമാക്കുന്നത്. ഇതിനായി ഇത്തരം ലക്ഷണങ്ങൾ ഉള്ളവരുടെ ലിസ്റ്റ് തയ്യാറാക്കിയാണ് ക്യാമ്പുകൾ സംഘടിപ്പിക്കുന്നത്.ഇതിൻ്റെ ഭാഗമായി ടെസ്റ്റിങ്ങ് സമ്പ്രദായങ്ങൾ കൂടുതൽ വിപുലീകരിക്കുകയും അതുവഴി ടെസ്റ്റുകളുടെ എണ്ണം വർദ്ധിപ്പിച്ചും കോവിഡ് പ്രതിരോധം ശക്തമാക്കുകയാണ് ലക്ഷ്യമെന്ന് എം എൽ എ അറിയിച്ചു.
