കോതമംഗലം :കോതമംഗലത്ത് നിന്ന് കാണാതായ കുട്ടിയെ കണ്ടെത്തുന്നതിൽ മാതൃകയായി കെ എസ് ആർ ടി സി കണ്ടക്ടർ.കോട്ടയത്തു നിന്നും തിരുവനന്തപുരത്തേക്ക് സർവീസ് പോവുകയായിരുന്ന ബസ്സിൽ കുട്ടിക്ക് ടിക്കറ്റ് നൽകുന്നതിനിടയിൽ അസ്വാഭാവികത തോന്നിയ കണ്ടക്ടർ ദിലീപ് കെ രവി കുട്ടിയോട് വിവരങ്ങൾ വിശദമായി ചോദിച്ചു മനസ്സിലാക്കുന്നു.കോതമംഗലം വാരപ്പെട്ടിയിൽ നിന്ന് കാണാതായ 13 വയസുകാരിആണ് ഈ ബസിലുള്ള കുട്ടിയെന്ന് തിരിച്ചറിയുകയും ഉടൻതന്നെ പോലീസ് കൺട്രോൾ റൂമുമായി ബന്ധപ്പെടുകയും ചങ്ങനാശ്ശേരി പോലീസ് എത്തി കുട്ടിയെ കൂട്ടിക്കൊണ്ടു പോവുകയും ആയിരുന്നു.കോതമംഗലം
വാരപ്പെട്ടിയിലെ വീട്ടിൽ ആറ് വയസുകാരനായ അനുജനെ തനിച്ചാക്കിയാണ് പെൺകുട്ടി വീട്ടിൽ നിന്ന് പോയത്. തോളത്ത് ഒരു ബാഗും തൂക്കി റോഡരികിലൂടെ കുട്ടി നടന്നുപോകുന്നതിന്റെ സിസിടിവി ദൃശ്യങ്ങൾ കണ്ടെത്തിയിരുന്നു. കുട്ടിയെ കാണാതായെന്ന് ബന്ധുക്കൾ പൊലീസിൽ വിവരം അറിയിച്ചതിന് പിന്നാലെ നാടൊട്ടുക്ക് തിരച്ചിൽ ആരംഭിച്ചിരുന്നു. ഇതോടെയാണ് ആറ് മണിക്കൂറിന് ശേഷം കുട്ടിയെ കണ്ടക്ടർ ദിലീപ് കെ രവിയുടെ സഹായത്തോടെ കണ്ടെത്തിയത്.കർത്തവ്യ നിർവഹണത്തിനിടെ സമയോചിതവും, ബുദ്ധിപരവുമായ ഇടപെടലിലൂടെ കോതമംഗലത്തു നിന്ന് കാണാതായ കുട്ടിയേക്കണ്ടെത്തുന്നതിന് കാരണക്കാരനായ ദിലീപിന് അഭിനന്ദനപ്രവാഹമാണ്…
