കോതമംഗലം : ആഗോള സർവ്വമത തീർത്ഥാടന കേന്ദ്രമായ കോതമംഗലം മാർ തോമ ചെറിയ പള്ളിയിൽ പരിശുദ്ധ യാക്കോബായ സുറിയാനി സഭയുടെ സ്തുതി ചൊവ്വാക്കപ്പെട്ട സത്യവിശ്വാസവും , അന്ത്യോഖ്യൻ പാരമ്പര്യവും പൈതൃകവും നിലനിർത്തുന്നതിനു വേണ്ടി 2019 ഒക്ടോബർ മാസം 6 – )o തീയതി നടത്തപ്പെട്ട രണ്ടാം കൂനൻ കുരിശ് സത്യത്തിന്റെ മൂന്നാം വാർഷികം വിപുലമായ പരിപാടികളോടെ ആഘോഷിച്ചു.
എ.ഡി 1653 ൽ ആണ് കൂനൻ കുരിശ് സത്യം നടന്നത്; സുറിയാനിക്കാരുടെ നേതാവായ തോമ അർക്കദിയാക്കോന്റെ ശ്രമഫലമായി എ.ഡി. 1653 ൽ മോർ അഹത്തള്ള പാത്രിയാർക്കീസ് ബാവ ഇന്ത്യയിലെത്തി. സൂററ്റിൽ കപ്പലിറങ്ങിയ അദ്ദേഹത്തെ പോർത്തുഗീസുകാർ ബന്ധനസ്ഥനാക്കി മൈലാപ്പൂരിൽ പാർപ്പിച്ചു. ഇദ്ദേഹത്തെ ഗോവയിലെ ദണ്ഡനസ്ഥലത്തേക്ക് കൊണ്ടുപോകുന്ന വഴി കൊച്ചിയിലെത്തിച്ച വിവരം അറിഞ്ഞ് അർക്കദിയാക്കോന്റെ നേതൃത്വത്തിൽ 25000 ത്തോളം സുറിയാനിക്കാർ കൊച്ചിയിൽ തടിച്ചു കൂടി. ഭയചകിതരായ പോർത്തുഗീസുകാർ മാർ അഹത്തള്ളാ ബാവയെ കഴുത്തിൽ കല്ലുകെട്ടി കടലിൽ താഴ്ത്തി കൊന്നുകളഞ്ഞു. ഇതിൽ രോക്ഷാകുലരായ സുറിയാനിക്കാർ എ.ഡി 1653 മകര മാസം മൂന്നാം തീയതി വെള്ളിയാഴ്ച ആഞ്ഞിലിമൂട്ടിൽ ഇട്ടിത്തൊമ്മൻ കത്തനാരുടെ നേതൃത്വത്തിൽ മട്ടാഞ്ചേരിയിലെ കൂനൻ കുരിശിങ്കൽ ആലാത്തുകെട്ടി അതിൽ പിടിച്ചു കൊണ്ട് ഇപ്രകാരം സത്യം ചെയ്തു.

ഞങ്ങളും ഞങ്ങളുടെ സന്തതി പരമ്പരകളും സൂര്യ ചന്ദ്രന്മാരുള്ളിടത്തോളം കാലം പരി. അന്ത്യോഖ്യാ സിംഹാസനത്തെ മറക്കുകയില്ല എന്നും റോമാനുകത്തെ ഞങ്ങളുടെ ചുമലിൽ നിന്നും എടുത്തുകളയുമെന്നും ഇതിനാൽ സത്യം ചെയ്യുന്നു. 2019 ഒക്ടോബർ 6 ന് കോതമംഗലം മാർ തോമ ചെറിയ പള്ളിയിൽ തടിച്ചു കൂടിയ ജന ലക്ഷങ്ങൾ പരി.ബസേലിയോസ് യൽ ദോ ബാവായുടെ ദേഹവിയോഗ സമയത്ത് ദിവ്യപ്രകാശം കണ്ട കൽക്കുരിശിൽ ആലാത്ത് കെട്ടി അതിൽ പിടിച്ച് എ.ഡി 1653 ൽ നമ്മുടെ പൂർവ്വികർ നടത്തിയ സത്യവിശ്വാസ പ്രഖ്യാപനത്തെ അനുസ്മരിച്ചു കൊണ്ട് രണ്ടാം കൂനൻ കുരിശ് സത്യം നടത്തി പൈതൃക വിശ്വാസത്തെ ആവർത്തിച്ച് ഉറപ്പിച്ച് ഇപ്രകാരം ഏറ്റുചൊല്ലി. ഞങ്ങളും ഞങ്ങളുടെ സന്തതി പരമ്പരകളും ഞങ്ങൾക്ക് ജീവനുള്ളിടത്തോളം കാലം പരിശുദ്ധ അന്ത്യോഖ്യാ സിംഹാസനത്തെ മറക്കുകയില്ല എന്നും … പരി.ബസേലിയോസ് യൽ ദോ ബാവ തന്റെ വാർദ്ധക്യത്തിൽ ചൊല്ലിത്തന്ന സ്തുതി ചൊവ്വാക്കപ്പെട്ട സത്യവിശ്വാസത്തിൽ നിന്നും ഞങ്ങൾ അണുവിട പോലും വ്യതിചലിക്കുകയില്ല എന്നും ഞങ്ങളുടെ പൂർവ്വ പിതാക്കന്മാർ ഞങ്ങൾക്ക് പകർന്നു തന്ന സത്യവിശ്വാസത്തിന്റെ തിരിനാളം കെടാതെ ഞങ്ങൾ സൂക്ഷിക്കുമെന്നും ഞങ്ങളുടെ പിൻതലമുറകൾക്ക് അത് പകർന്നു നൽകുമെന്നും ഇതിനാൽ സത്യം ചെയ്യുന്നു.
രണ്ടാം കൂനൻ കുരിശ് സത്യം പരിശുദ്ധ യാക്കോബായ സുറിയാനി സഭയ്ക്ക് പുത്തനുണർവ്വേകിയ ചരിത്ര സംഭവമായിരുന്നു എന്ന് ശ്രേഷ്ഠ കാതോലിക്ക ആബൂൻ മോർ ബസേലിയോസ് തോമസ് പ്രഥമൻ ബാവ പ്രഖ്യാപിച്ചു. രണ്ടാം കൂനൻ കുരിശ് സത്യത്തിന്റെ മൂന്നാം വാർഷിക സമ്മേളനം ഉദ്ഘാടനം ചെയ്യുകയായിരുന്നു ശ്രേഷ്ഠ ബാവാ തിരുമേനി.

കോതമംഗലം എം. എൻ.എ ആന്റണി ജോൺ , ചെറിയ പള്ളി വികാരി ഫാ.ജോസ് പരത്തുവയലിൽ, സഹ വികാരിമാരായ ഫാ.ജോസ് തച്ചേത്ത്കുടി, ഫാ.ഏലിയാസ് പൂമറ്റത്തിൽ, ഫാ.ബിജോ കാവാട്ട് , ഫാ. ബേസിൽ ഇട്ടിയാണിയ്ക്കൽ, വലിയ പള്ളി സഹ വികാരി ഫാ.എബ്രഹാം കിളിയൻ കുന്നത്ത് , ചെറിയ പള്ളി ട്രസ്റ്റിമാരായ അഡ്വേ.സി.ഐ. ബേബി, ബിനോയി മണ്ണംഞ്ചേരി, വർക്കിംഗ് കമ്മിറ്റി , മാനേജിംഗ് കമ്മറ്റി അംഗങ്ങൾ, മതമൈത്രി സംരക്ഷണ സമിതി ചെയർമാൻ എ.ജി.ജോർജ്ജ്, കൊല്ലം പണിക്കർ, ലിസി ജോസ് , ബ്ലോക്ക് പഞ്ചായത്ത് മെമ്പർ ജെയിംസ് കോറമ്പേൽ ….. തുടങ്ങിയവർ സംബന്ധിച്ചു.

പിണ്ടിമന : കാർഷിക വികസന വകുപ്പുന്റെ ഞങ്ങളും കൃഷിയിലേക്ക് പദ്ധതി പ്രകാരം പിണ്ടിമന കൃഷിഭവന്റെ നേതൃത്വത്തിൽ കിസാൻ മിത്ര വനിതാ ഗ്രൂപ്പ് നടത്തിയ കര നെൽകൃഷിയിൽ നൂറ് മേനി വിളവ്.  പതിനൊന്നാം വാർഡിലെ മുത്തംകുഴി മാലിയിൽ എം.ജെ ഐസക്കിന്റെ ഒരേക്കർ സ്ഥലം പാട്ടത്തിനെടുത്താണ് കൃഷിയിറക്കിയത്. കൃഷിഭവനിൽ നിന്നും നൽകിയ ഉമ നെൽ വിത്താണ് കൃഷിക്കായി ഉപയോഗിച്ചത്. പിണ്ടിമനയിലെ കാർഷിക മേഖലയിൽ നിരവധി പ്രവർത്തനങ്ങൾ ഏറ്റെടുത്തു വിജയിപ്പിക്കുന്ന കാർഷിക ഗ്രൂപ്പാണ് കിസാൻമിത്ര വനിതാ ഗ്രൂപ്പ് . മുത്തംകുഴിയിൽ നടന്ന കൊയ്ത്തുത്സവം പിണ്ടിമന പഞ്ചായത്ത് പ്രസിഡന്റ് ജെസ്സി സാജു ഉത്ഘാടനം ചെയ്തു. കൃഷി അസിസ്റ്റന്റ് ഡയറക്ടർ വി.പി.സിന്ധു പദ്ധതി വിശദീകരിച്ചു. കൃഷി വകുപ്പിന്റെ സുസ്ഥിര നെൽകൃഷി പദ്ധതി പ്രകാരം ആനുകൂല്യം നൽകും.

ഗ്രാമപഞ്ചായത്തംഗങ്ങളായ ലാലി ജോയി, എസ്.എം. അലിയാർ, റ്റി.കെ കുമാരി , സിജി ആന്റണി, കൃഷി ഓഫീസർമാരായ ഇ.എം അനീഫ, സി.എം.ഷൈല കൃഷി അസിസ്റ്റന്റുമാരായ വി.കെ. ജിൻസ്, രാജേഷ് ഖന്ന, എം.ജെ.കുര്യൻ ,കെ.പി. ഷിജോ, രഞ്ജിത്ത് തോമസ്സ് , ആദില യൂസഫ് , ഹരിപ്രിയ കിസാൻ മിത്ര വനിതാ ഗ്രൂപ്പ് അംഗങ്ങളായ രാധാ മോഹനൻ ,സാറാക്കുട്ടി ജോർജ് , കുമാരി രാജപ്പൻ , വത്സല ഗോപാലകൃഷ്ണൻ , ജെമിനി കുര്യൻ, സാലി ജോസ് ,അത്താണിക്കൽ എൽ.പി സ്കൂളിലെ അദ്ധ്യാപകരായ സുബൈദ, മിന്റു, ബിനി, അമൃത ശശി, ഡോണ, ജെസ്സാന, ഷിംന എന്നിവർ പങ്കെടുത്തു. കർഷക വേഷമണിഞ്ഞ കുട്ടികളുടെ കൊയ്ത്തുപാട്ടുകൾ കൊയ്ത്തുത്സവത്തിന് കൊഴുപ്പേകി.
അടുത്ത വർഷം മുതൽ പഞ്ചായത്തിലെ സ്കൂളുകൾ ഉൾപ്പെടെയുള്ള മുഴുവൻ സ്ഥാപനങ്ങളിലും കര നെൽകൃഷി വ്യാപിപ്പിക്കുമെന്ന് കൃഷി വകുപ്പ് അധികൃതർ വ്യക്തമാക്കി.

കോതമംഗലം: കോതമംഗലം രൂപത വൈദികനായ ഫാ. തോമസ് മുണ്ടയ്ക്കൽ (82) അന്തരിച്ചു. സംസ്കാര ശുശ്രൂഷ നാളെ ( 7/10 വെള്ളിയാഴ്ച) കോതമംഗലം സെന്റ് ജോർജ് കത്തീഡ്രലിൽ. ഇന്ന് (6/10 വ്യാഴാഴ്ച) വൈകിട്ട് 4.30 ന് കോതമംഗലത്ത് മുണ്ടക്കൽതരകൻ കുടുംബയോഗ മന്ദിരത്തിൽ പൊതുദർശനത്തിന് വയ്ക്കും. തുടർന്ന് 5 മുതൽ സഹോദരി പുത്രൻ സണ്ണി കളമ്പാടന്റെ കോതമംഗലത്തുള്ള വസതിയിൽ പൊതു ദർശനത്തിന് വയ്ക്കുന്നതാണ്. സംസ്കാര ശുശ്രൂഷയുടെ ആദ്യഭാഗം നാളെ (7/10 വെള്ളി) രാവിലെ10.30 ന് സണ്ണിയുടെ ഭവനത്തിൽ ആരംഭിക്കുന്നതാണ്. 11 മുതൽ 2 വരെ സെൻ്റ് ജോർജ് കത്തീഡ്രലിൽ പൊതുദർശനത്തിന് ശേഷം സംസ്കാര ശുശ്രൂഷയുടെ അവസാനഭാഗം ഉച്ചകഴിഞ്ഞ് 2 ന് കോതമംഗലം രൂപതാദ്ധ്യക്ഷൻ മാർ ജോർജ് മഠത്തിക്കണ്ടത്തിലിന്റെ മുഖ്യ കാർമികത്വത്തിൽ വിശുദ്ധ കുർബാനയോടെ കോതമംഗലം സെന്റ് ജോർജ് കത്തീഡ്രലിൽ നടത്തും.

1940 മെയ്‌ 9 ന് മുണ്ടയ്ക്കൽ ദേവസി ഇട്ടിയവര- റോസ ദമ്പതികളുടെ മകനായി ജനിച്ചു. 1967 മാർച്ച് 10 ന് അഭിവന്ദ്യ മാർ മാത്യു പോത്തനാമുഴി പിതാവിന്റെ കൈവയ്പ്പു ശുശ്രൂഷ വഴി തിരുപ്പട്ടം സ്വീകരിച്ചു. , രാജാക്കാട്, മുതലക്കോടം പള്ളികളുടെ അസ്തേന്തിയായി പൗരോഹിത്യ ശുശ്രൂഷ ആരംഭിച്ച അച്ചൻ മരിയാപുരം, പുറപ്പുഴ, ഉപ്പ്തോട്, കോട്ടപ്പടി, കുത്തുങ്കൽ, ഇഞ്ചൂർ പള്ളികളിൽ വികാരിയായും മുതലക്കോടം അക്വിനാസ് കോളേജിലെ പ്രിൻസിപ്പാളായും ജർമനിയിലെ ഔസ്ബുർഗ് രൂപതയിലും ശുശ്രൂഷ ചെയ്തു.കോതമംഗലം രൂപതയിലും ജർമ്മനിയിലെ ഔസ്ബുർഗ് രൂപതയിലും ദീർഘകാലം സേവനം ചെയ്ത ശേഷം സജീവ ശുശ്രൂഷയിൽ നിന്ന് വിരമിച്ച് വിശ്രമജീവിതം നയിക്കുകയായിരുന്നു. അന്നക്കുട്ടി കളമ്പാടൻ,ജോസഫ് മുണ്ടക്കൽ,പരേതരായ റോസ കുട്ടി പീച്ചാട്ട്, ദേവസി കുട്ടി മുണ്ടക്കൽ , മേരി പേടിക്കാട്ട് കുന്നേൽ, ജേക്കബ് മുണ്ടക്കൽ, കൊച്ചുത്രേസ്യ കല്ലട എന്നിവർ സഹോദരങ്ങളാണ്.