കോതമംഗലം : അന്തർദേശീയ സംഘടനയായ ഇൻസ്റ്റിറ്റ്യൂ്ട് ഓഫ് ഇലക്ട്രിക്കൽ ആൻഡ് ഇലക്ട്രോണിക്സ് (ഐ ട്രിപ്പിൾ ഈ) ഏഷ്യ പസഫിക് തലത്തിൽ നടത്തപ്പെട്ട റോബോട്ടിക് മത്സരത്തിൽ കോതമംഗലം മാർ അത്തനേഷ്യസ് എൻജിനീയറിങ് കോളജ് ഒന്നാം സ്ഥാനം കരസ്ഥമാക്കി. കോളേജിലെ വിദ്യാർത്ഥികളായ മൊഹമ്മദ് സെയ്ൻ, വിഷ്ണുരാജ് അനിൽകുമാറും ഉപദേശകനും കോളേജ് പ്രിൻസിപ്പാളുമായ ഡോ. ബോസ് മാത്യു ജോസും അടങ്ങുന്ന ‘ലേറ്റൻസി സീറോ ‘ എന്ന ടീം, കുഴി ബോംബുകളും ഉപരിതല ബോംബുകളും സ്വയം കണ്ടെത്തുന്ന റോബോട്ടുകൾ വികസിപ്പെടുത്തത് ജപ്പാനിലെ ടോക്യോയിൽ വച്ച് നടന്ന മത്സരത്തിൽ അവതരിപ്പിച്ചാണ് ഒന്നാം സ്ഥാനം കരസ്ഥമാക്കിയത്. ജപ്പാൻ, ഓസ്ട്രേലിയ, ഇന്തോനേഷ്യ, പാകിസ്ഥാൻ തുടങ്ങിയ പല രാജ്യങ്ങളിൽ നിന്നുമുള്ള ഒൻപത് ടീമുകളെ പിന്തള്ളിയാണ് എം എ എൻജിനീയറിങ് കോളജ് ടീം ഒന്നാം സ്ഥാനം കരസ്ഥമാക്കിയത്.
ഏഷ്യാ പസഫിക് മേഖലകളിലെ വിവിധ സെക്ഷനുകൾ പ്രാരംഭ മത്സരങ്ങൾ നടത്തി നിർദേശിച്ച ടീമുകൾ ഓൺലൈനിലൂടെ തങ്ങളുടെ പ്രോജക്ടുകൾ അവതരിപ്പിച്ചു. അർഹരായവരെ തിരഞ്ഞെടുത്തു യാത്രാ ചിലവുകൾ ഉൾപ്പടെ നൽകി തങ്ങളുടെ പ്രോജക്ടുകൾ അവതരിപ്പിക്കാൻ അവസരം നൽകിയാണ് മത്സരങ്ങൾ സംഘടിപ്പിച്ചത്.
സമ്മാന ദാനം ഐ ട്രിപ്പിൾ ഇ പ്രസിഡൻ്റ് തോമസ് കഫ്ലിൻ്റെയും റോബോട്ടിക് മത്സരത്തിൻ്റെ ലീഡ് ഡോ. സിയ അഹമ്മദിൻ്റെയും സാന്നിധ്യത്തിൽ ഐ ട്രിപ്പിൾ ഇ പ്രസിഡൻ്റ് – ഇലക്ട് 2024, കാതലീൻ ക്രാമർ നിർവഹിച്ചു. രാജ്യാന്തര തലത്തിൽ വിജയം കൈവരിച്ച വിദ്യാർത്ഥികളെയും ഉപദേശകനെയും ഐ ട്രിപ്പിൾ ഇ കോളജ് ബ്രാഞ്ച് കൗൺസിലർ പ്രൊഫ. നീതു സലീമും കോളജിലെ വിവിധ ഡിപ്പാർട്ട്മെൻ്റ് കളിലെ തലവന്മാരും കോളജ് ചെയർമാൻ ഡോ. വിന്നി വർഗീസും ചേർന്ന് ആദരിച്ചു.
