കോതമംഗലം: കുട്ടമ്പുഴ പഞ്ചായത്തിലെ മാമലക്കണ്ടത്ത് വീടിനു നേരെ കാട്ടാനയാക്രമണം; വീട്ടുപകരണങ്ങളും, കൃഷികളും നശിപ്പിച്ചു.പത്താം വാർഡായ മാമലക്കണ്ടം, ചാമപ്പാറയിൽ മാവും ചുവട് ഭാഗത്ത് താമസിക്കുന്ന ഡെനിഷ് ജോസഫിൻ്റെ വീടിനു നേരെ ഇന്ന് പുലർച്ചെയോടെയെത്തിയ കാട്ടാനക്കൂട്ടമണ് ആക്രമണം നടത്തിയത്.
വീടിൻ്റെ ജനാലകളും, വാതിലും തകർത്ത കാട്ടാനക്കൂട്ടം വീട്ടുപകരണങ്ങളും, വീട്ടിൽ സൂക്ഷിച്ചിരുന്ന പണവും, രേഖകളും നശിപ്പിക്കുകയായിരുന്നു. വീടിനോട് ചേർന്നുള്ള മെഷീൻ പുര തകർത്ത് നിരവധി ഡിഷുകളും മറ്റ് ഉപകരണങ്ങളും നശിപ്പിച്ചിട്ടുണ്ട്. ആക്രമണം നടക്കുമ്പോൾ വീട്ടിൽ ആളുണ്ടായിരുന്നില്ല.
തെങ്ങ്, കമുക് ഉൾപ്പെടെയുള്ള കൃഷികൾക്കും നാശനഷ്ടം സംഭവിച്ചിട്ടുണ്ട്. ഒരാഴ്ചക്കിടെ ഇത് മൂന്നാം തവണയാണ് കാട്ടാനക്കൂട്ടമെത്തുന്നതെന്ന് പ്രദേശവാസികൾ അറിയിച്ചു.
