കോതമംഗലം : കാട്ടാന ഭീതിയിൽ ഒരു നാട് മുഴുവൻ വിറങ്ങലിച്ചു നിൽക്കുവാൻ തുടങ്ങിയിട്ട് നാളുകൾ ഏറെയായി. കോട്ടപ്പടി പഞ്ചായത്തിലെ വടക്കുംഭാഗം, വാവേലി നിവാസികളുടെ ഉറക്കം കെടുത്തുന്നത് കാട്ടാനയുടെ ശല്യമാണ്. കാട്ടാനകളുടെ വിഹാര കേന്ദ്രമായി മാറിയിരിക്കുകയാണ് ഈ മേഖല. ഒരു ആയുസ് മുഴുവൻ അധ്വാനിച്ചു ഉണ്ടാക്കിയ കൃഷി വിളകൾ ഒറ്റ രാത്രി കൊണ്ട് ചവിട്ടി മെതിച്ചു കളയുന്ന കാട്ടാനകൾ. പ്രശ്ന പരിഹാരത്തിനായി ആ വേദനകൾ അധികാരികളോട് പറഞ്ഞിട്ടും പരിഹാര മില്ലാതെ അനന്തമായി നീളുകയാണ്.
ഇപ്പോൾ തങ്ങളുടെ ജീവനും സ്വത്തിനും വലിയ ഭീഷണിയാണ് ഈ കാട്ടാനക്കൂട്ടം വരുത്തുന്നത്. ഇന്ന് പുലർച്ചെ വാവേലി വീപ്പനാട്ട് വർഗീസിന്റെ പുരയിടത്തിൽ ആയിരുന്നു കാട്ടാനയുടെ തേരോട്ടം. കപ്പ, വാഴ എന്നീ കാർഷിക വിളകൾ നശിപ്പിച്ചതിനു പുറമെ വീടിന്റെ കാർ പോർച്ചിൽ കിടന്ന കാറിനെ വരെ വെറുതെ വിട്ടില്ല. കാറിനെ കുത്തി നശിപ്പിച്ചു തള്ളി നീക്കി. നാളെ തങ്ങളുടെ വീട് വരെ ആക്രമിച്ചു നശിപ്പിക്കും എന്ന ഉൾഭയത്താൽ രാത്രി കിടന്നുറങ്ങാൻ കഴിയാതെ നേരം ഇരുട്ടി വെളുപ്പിക്കുകയാണ് വറുഗീസും കുടുംബവും.
