കോതമംഗലം : കൂട്ടായ്മയിലൂടെ നമ്മുക്ക് പലതും നേടാൻ കഴിയുമെന്നും അതിനാൽ നാം കൂട്ടായ്മയിലൂടെ വളരണമെന്നും കോതമംഗലം രൂപത അധ്യക്ഷൻ ബിഷപ്പ് മാർ ജോർജ് മഠത്തിക്കണ്ടത്തിൽ. കീരംപാറ ഇടവകയിലെ വിശ്വാസ പരിശീലകേന്ദ്രത്തിന്റെയും ഇടവക കാര്യലയത്തിന്റെയും വെഞ്ചിരിപ്പ് കർമ്മം നിർവ്വഹിച്ച ശേഷം ചേർന്ന പൊതുസമ്മേളനത്തിൽ
വച്ച് കീരംപാറ പള്ളിയുടെ സുവർണ്ണ ജൂബിലി ആഘോഷങ്ങൾ ഉദ്ഘാടനം ചെയ്ത് സംസാരിക്കുകയായിരുന്നു ബിഷപ്പ്. കീരംപറ ഇടവകയുടെ വിശ്വാസ പരിശീലന കേന്ദ്രവും ഇടവകാര്യാലയവും വളരെ വേഗത്തിൽ പൂർത്തിയാക്കിയത് ഇടവകയുടെ കൂട്ടായ്മയുടെ വിജയമാണന്ന് ബിഷപ്പ് ചൂണ്ടികാണിച്ചു. നിർമ്മാണം അതിവേഗം പൂർത്തിയാക്കിയ വികാരി ഫാ. മാത്യു കൊച്ചുപുരയ്ക്കലിനെയും നിർമ്മാണ കമ്മിറ്റിയെയും ഇടവക സമൂഹത്തെയും പിതാവ് അഭിനന്ദിച്ചു. ഇടവകയിലെ ഭക്തസംഘടനകളുടെ ഓഫീസ് കീ പിതാവ് സംഘടന പ്രസിഡൻറുമാർക്ക് കൈമാറി.
വികാരി ജനറാൾ മോൺ. പയസ് മലേക്കണ്ടത്തിൽ അധ്യക്ഷത വഹിച്ചു. ആന്റണി ജോൺ എം എൽ എ സുവർണ്ണ ജൂബിലിയുടെ ഭാഗമായുള്ള സ്നേഹസ്പർശം ഭവന നിർമ്മാണ പദ്ധതിയുടെ കല്ല് ബിഷപ്പ് വെഞ്ചിരിച്ചത് മാതൃവേദിക്ക് കൈമാറി. യോഗത്തിൽവച്ച് നിർമ്മാണ പ്രവർത്തനങ്ങളിൽ വിവിധ മേഖലകളിൽ സഹകരിച്ച വ്യക്തികളെ ആദരിച്ചു. ജോൺസൻ കറുകപ്പിള്ളിൽ ആമുഖ സന്ദേശം നൽകി. സൺണ്ടേ സ്കൂൾ ഹെഡ്മിസ്ട്രസ് ജിൻസി ജോമോൻ സ്വാഗതവും പിതൃവേദി പ്രസിഡൻറ് ജിജി പുളിക്കൽ നന്ദിയും പറഞ്ഞു. വെഞ്ചിരിപ്പിന് മുന്നോടിയായി ബിഷപ്പിൻറെ മുഖ്യ കാർമ്മികത്വത്തിൽ കൃതജ്ഞതാ ബലി അർപ്പിച്ചു. ജനറാൾ മോൺ. പയസ് മലേകണ്ടത്തിൽ, ഫോറോന വികാരി ഫാ. തോമസ് പറയിടം, ഇടവക വികാരി ഫാ. മാത്യു കൊച്ചുപുരയ്ക്കൽ , എന്നിവർ സഹകാർമ്മികരായിരുന്നു. ന്നമ്മേളനാനന്തരം സ്നേഹവിരുന്നും ചൈനീസ് കരിമരുന്ന് പ്രകടനവും ഉണ്ടായിരുന്നു.
