കോതമംഗലം: സ്‌പേസ് ടെക്‌നോളജിയില്‍ യുവ എഞ്ചിനീയര്‍മാര്‍ക്ക് അനന്ത സാധ്യതകള്‍ ആണുള്ളതെന്ന് വി.എസ്.എസ്.സി. ഡയറക്ടര്‍ ഡോ. എസ്. ഉണ്ണികൃഷ്ണന്‍ നായര്‍. ബഹിരാകാശ മേഖല സ്വകാര്യമേഖലയ്ക്ക് തുറന്നു കൊടുത്ത് രണ്ട് വര്‍ഷങ്ങള്‍ക്കുള്ളില്‍ 150 ഓളം സ്റ്റാര്‍ട്ട് അപ്പുകള്‍ ആണ് ഇന്ത്യയില്‍ ആരംഭിച്ചത്. വിദ്യാര്‍ത്ഥികള്‍ കാണാതെ പഠിക്കുന്നതിലല്ല മറിച്ച് കാര്യങ്ങള്‍ ചോദിച്ചു മനസ്സിലാക്കി അറിവ് നേടുന്നതിലാണ് പ്രാധാന്യം കൊടുക്കേണ്ടത് എന്നും അദ്ദേഹം അഭിപ്രായപ്പെട്ടു. കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജിന്റെ വജ്രജൂബിലിയോടനുബന്ധിച്ച് നടക്കുന്ന ശാസ്ത്ര സാങ്കേതിക എക്‌സിബിഷന്‍ ‘വജ്ര മേസ്’ ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജിലെ പൂര്‍വ്വ വിദ്യാര്‍ത്ഥിയായിരുന്ന വി.എസ്.എസ്.സി. ഡയറക്ടര്‍ അന്ന് തന്റെ ഗുരുനാഥന്‍ ആയിരുന്ന ഡോ. ജെ.ഐസക് സാര്‍ പഠിപ്പിച്ച മെട്രോളജി എന്ന വിഷയത്തിലെ ചോദ്യം തന്റെ വി.എസ്.എസ്.സി.യിലെ ഇന്റര്‍വ്യൂവിന് ചോദിക്കുകയും അതിന് നന്നായി ഉത്തരം പറയാന്‍ കഴിയുകയും ചെയ്തതിനാലാണ് തനിക്ക് അവിടെ ജോലി കിട്ടാന്‍ കാരണമെന്നും അതിനാല്‍ തന്റെ ഗുരുനാഥനോടും ഈ കോളേജിനോടും ഏറെ കടപ്പെട്ടിരിക്കുന്നു എന്നും വേദിയില്‍ ഇരുന്ന മുന്‍ പ്രിന്‍സിപ്പല്‍ കൂടിയായ ഐസക് സാറിനെ നോക്കി അദ്ദേഹം അറിയിച്ചു.
ഉത്ഘാടന സമ്മേളനത്തില്‍ അഡ്വ. ഡീന്‍ കുര്യാക്കോസ് എം.പി., ആന്റണി ജോണ്‍ എം.എല്‍.എ., അലക്‌സാണ്ടര്‍ ജേക്കബ് ഐ.പി.എസ്., എം.എ.കോളേജ് അസ്സോസ്സിയേഷന്‍ സെക്രട്ടറി ഡോ. വിന്നി വര്‍ഗീസ്, വൈസ് ചെയര്‍മാന്‍ എ ജി ജോര്‍ജ്ജ്, മുന്‍ പ്രിന്‍സിപ്പല്‍മാരായ കുര്യന്‍ മാത്യു, ഡോ. ജെ ഐസക്, പ്രിന്‍സിപ്പല്‍ ഡോ. ബോസ് മാത്യു ജോസ്, സംഘാടക സമിതി ജനറല്‍ കോര്‍ഡിനേറ്റര്‍ ഡോ. സോണി കുര്യാക്കോസ് എന്നിവര്‍ ആശംസകള്‍ അറിയിച്ചു. തുടര്‍ന്ന് നടന്ന സെമിനാറില്‍ അലക്‌സാണ്ടര്‍ ജേക്കബ് ഐ.പി.എസ്. ക്ലാസ്സെടുത്തു.
കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജിന്റെ വജ്രജൂബിലിയോടനുബന്ധിച്ച് നടക്കുന്ന ശാസ്ത്ര സാങ്കേതിക എക്‌സിബിഷന്‍ ‘വജ്ര മേസ്’കാണുവാന്‍ വിദ്യാര്‍ത്ഥികള്‍ ഉള്‍പ്പെടെ ആയിരങ്ങളാണ് മാര്‍ അത്തനേഷ്യസ് എഞ്ചിനീയറിംഗ് കോളേജിലേക്കെത്തിയത്. നാടിന്റെ നാനാ ഭാഗങ്ങളില്‍ നിന്നെത്തിയ ജനങ്ങള്‍ക്ക് ഈ പ്രദര്‍ശനങ്ങള്‍ ഒരു അത്ഭുതം തന്നെയായിരുന്നു. ‘വജ്ര മേസ്’ ഡിസംബര്‍ 3 വരെ നീണ്ടു നില്‍ക്കും.
ചിത്രം :1.
കോതമംഗലം മാര്‍ അത്തനേഷ്യസ് എഞ്ചിനീയറിംഗ് കോളേജിന്റെ വജ്രജൂബിലിയോടനുബന്ധിച്ച് നടക്കുന്ന ‘വജ്ര മേസ്’ ശാസ്ത്ര സാങ്കേതിക എക്‌സിബിഷനിലെ 3 ഡി പ്രി്ന്റിംഗ് മെഷീനില്‍ നിന്നും ലഭിച്ച തന്റെ തന്നെ ഫോട്ടോ തന്റെ ഗുരാനാഥന്‍ ആയ ഡോ. ജെ ഐസക്കിനോടും ഡോ. വിന്നി വറുഗീസിനോടും ഒപ്പം നോക്കി കാണുന്ന വി. എസ് എസ് സി ഡയറക്ടർ ഡോ. എസ്. ഉണ്ണികൃഷ്ണൻ നായർ
2. കോതമംഗലം മാർ അത്തനേഷ്യസ് എഞ്ചി. കോളേജിലെ വജ്ര ജൂബിലിയോട് അനുബന്ധിച്ച് നടക്കുന്ന ശാസ്ത്ര – സാങ്കേതിക പ്രദർശനമായ വജ്ര മേസ് വി. എസ്.എസ്. സി ഡയറക്ടർ ഡോ. ഉണ്ണികൃഷ്ണൻ നായർ ഉത്ഘാടനം ചെയ്യുന്നു. കോളേജ് അസോസിയേഷൻ സെക്രട്ടറി ഡോ. വിന്നി വർഗീസ്, കോളേജ് പ്രിൻസിപ്പൽ ഡോ. ബോസ് മാത്യു ജോസ്, ആന്റണി ജോൺ എം എൽ എ, അലക്സാണ്ടർ ജേക്കബ് ഐ. പി എസ്, അഡ്വ. ഡീൻ കുര്യാക്കോസ് എം. പി, അസോസിയേഷൻ വൈസ് ചെയർമാൻ എ. ജി. ജോർജ്, മുൻ കോളേജ് പ്രിൻസിപ്പൽമാരായ കുര്യൻ മാത്യു, ഡോ. ജെ. ഐസക്, സംഘാടക സമിതി ജനറൽ കോ. ഓർഡിനേറ്റർ ഡോ. സോണി കുര്യാക്കോസ് എന്നിവർ സമീപം
