കോതമംഗലം : കൃഷിയുടെ നല്ല പാഠം രചിച്ച്, പുത്തൻ കാർഷിക സംസ്കാരത്തിന് തുടക്കമിടുകയാണ് കോതമംഗലം മാർ അത്തനേഷ്യസ് കോളേജ്.കലാലയങ്ങളിൽ കൃഷി പ്രോത്സാഹിപ്പിക്കുന്നതിനായി കേരള സർക്കാർ കാർഷിക വികസന കർഷകക്ഷേമ വകുപ്പ് നടപ്പിലാക്കുന്ന ‘വിളവ് ‘ പദ്ധതിയുടെ ഉദ്‌ഘാടനം കോതമംഗലം മാർ അത്തനേഷ്യസ് കോളേജിൽ മുൻ കൃഷിവകുപ്പ് മന്ത്രി അഡ്വ.വി എസ് സുനിൽകുമാർ നിർവഹിച്ചു.

കൃഷി സാമൂഹിക ഉത്തര വാദിത്വമായി പൊതു സമൂഹം ഏറ്റെടുക്കണമെന്ന് സുനിൽ കുമാർ പറഞ്ഞു. വരും തലമുറകൾക്കുകൂടിയായി വിദ്യാർത്ഥികൾ ഈ ദൗത്യം ഏറ്റെടുക്കണമെന്നും അദ്ദേഹം കൂട്ടിച്ചേർത്തു.എം. എ കോളേജിലെ നേച്ചർ ക്ലബും , എൻ എസ് എസ് യൂണിറ്റും, കൃഷി വകുപ്പും സംയുക്തമായാണ് ഒരേക്കർ സ്ഥലത്തു പച്ചക്കറി കൃഷി നടത്തുന്നത് .വെണ്ട, വഴുതന, പാവൽ, പയർ, പടവലം, ചീര, തക്കാളി, മുളക് തുടങ്ങിയവയാണ് കൃഷി ചെയ്യുന്നത്.

കോതമംഗലം എം എൽ എ . ആന്റണി ജോൺ ചടങ്ങിൽ മുഖ്യ പ്രഭാഷണം നടത്തി .എം. എ കോളേജ് അസോസിയേഷൻ സെക്രട്ടറി ഡോ വിന്നി വര്ഗീസ് , കോളേജ് പ്രിൻസിപ്പൽ ഡോ. ഡെൻസിലി ജോസ് , കോതമംഗലം കൃഷി അസ്സി. ഡയറക്ടർ സിന്ധു വി പി , കോളേജ് അസോസിയേഷൻ വൈസ് ചെയർമാൻ എ.ജി. ജോർജ് , നേച്ചർ ക്ലബ്‌ കോ. ഓർഡിനേറ്റർ ഡോ. മേരിമോൾ മൂത്തേടൻ, എൻ എസ് എസ് കോ. ഓർഡിനേറ്റർമാരായ ഡോ. അൽഫോസാ സി. എ, ഡോ. എൽദോസ് എ വൈ, കോതമംഗലം അസിസ്റ്റന്റ് കൃഷി ഫീൽഡ് ഓഫീസർ ഇ. പി. സാജു തുടങ്ങിയവർ പ്രസ്തുത ചടങ്ങിൽ പങ്കെടുത്തു .

കവളങ്ങാട്: നേര്യമംഗലം കൃഷിഫാമിൽ നെടുനേന്ത്രൻ ടിഷ്യൂ കൾച്ചർ വാഴ വിതരണത്തിനൊരുങ്ങി. 25000 വാഴ തൈകളാണ് തയ്യാറാക്കിയിരിക്കുന്നത്. ഒരു കോടി ഫലവൃക്ഷത്തൈ വിതരണത്തിന്റെ ഭാഗമായാണ് ടിഷ്യു കൾച്ചർ ഇനം വാഴയും പരീക്ഷിക്കുന്നത്. വലിയ കുലകൾ ലഭിക്കുമെന്നതും പിന്നീടുണ്ടാകുന്ന വാഴ കന്നുകൾക്ക് ഇതേ ഗുണനിലവാരമുണ്ടാകുമെന്നതും ഇതിന്റെ പ്രത്യേകതയാണ്.

കാർഷിക സർവകലാശാല വൈറ്റില ഗവേഷണ കേന്ദ്രത്തിൽ നിന്നും ടിഷ്യൂ കൾച്ചർ ബോട്ടിലിൽ എക്‌സ് അഗർ പ്ലാന്റ്‌സ് കൊണ്ടുവന്നശേഷം ഇതിൽ നിന്നും വിത്തുകൾ അടർത്തിയെടുത്ത് അണുവിമുക്തമാക്കിയ മണലിൽ പോളിത്തീൻ കവറിലാണ്് ഇവകൾ പാകുന്നത്. മൂന്നാഴ്ച വളർച്ചയെത്തിയ ശേഷമാണ് വിതരണത്തിനെടുക്കുക. ഫാമിലെ കൗണ്ടർ വഴിയും ജില്ലയിലെ എല്ലാ കൃഷിഫാമുകൾ വഴിയും വിതരണം ചെയ്യും. വളർച്ചയെത്തിയ തൈകൾ വിതരണം ആരംഭിച്ചതായും നേര്യമംഗലം ഫാമിൽ രണ്ടുവർഷത്തിനുള്ളിൽ ടിഷ്യു കൾച്ചർ ലാബ് പ്രവർത്തനമാരംഭിക്കുമെന്ന് പ്രതീക്ഷിക്കുന്നതായി ഫാം സൂപ്രണ്ട് സൂസൻ ലീ തോമസ് പറഞ്ഞു.

Caption : നേര്യമംഗലം ഫാമില്‍ ടിഷ്യു കള്‍ച്ചര്‍ വാഴ വിതരണത്തിനൊരുക്കുന്നു

കോതമംഗലം: സെപ്റ്റംബർ 4 മുതൽ 7വരെ കൃഷി വകുപ്പിൻ്റെ ഓണവിപണികൾ പ്രവർത്തനം ആരംഭിക്കുന്നു. കോതമംഗലത്ത് 12 ഓണവിപണികളാണുള്ളത്. മുനിസിപ്പൽ കൃഷിഭവൻ പരിധിയിൽ രണ്ടു വിപണികളും, മറ്റു പഞ്ചായത്തുകളിൽ ഓരോന്നു വീതവും വിപണികൾ പ്രവർത്തിക്കും.

കർഷകരുടെ ഉൽപ്പന്നങ്ങൾ കൂടാതെ വട്ടവടയിൽ നിന്നും, ഹോർട്ടികോർപ്പു മുഖേന സംഭരിച്ചതുമായ പച്ചക്കറികൾ വിപണികളിലുണ്ടാവും. കർഷകർക്ക് വിപണി വിലയെക്കാർ പത്തു ശതമാനം വില അധികം നൽകിയാണ് സംഭരിക്കുക. പൊതുവിപണിയെക്കാൾ മുപ്പതു ശതമാനം വില കുറച്ച് കൃഷിവകുപ്പ് മാർക്കറ്റിൽ നിന്ന് ഉപഭോക്താക്കൾക്ക് ലഭിക്കുന്നു. പൈങ്ങോട്ടൂരിൽ നിന്നു മാത്രമായി മൂന്നു ടൺ ഉൽപ്പന്നങ്ങളാണ് വിവിധ ഓണച്ചന്തകളിലേക്ക് നൽകുന്നത്. വട്ടവടയിൽ നിന്ന് കാബേജ്, കാരറ്റ്, ഉരുളക്കിഴങ്ങ്, ബീറ്റ്റൂട്ട്, എന്നിവ കൃഷി ഉദ്യോഗസ്ഥരുടെ നേതൃത്വത്തിൽ ശനിയാഴ്ച വെളുപ്പിനു തന്നെ എത്തിച്ചിട്ടുണ്ട്.

പൈങ്ങോട്ടൂരിലെ കർഷകരുടെ ഉൽപ്പന്നങ്ങളായ പാവൽ, പടവലം, മത്തൻ, വെള്ളരി, സാലഡ് വെള്ളരി, ചുരയ്ക്ക എന്നിവയും തയ്യാറായിട്ടുണ്ട്. കനത്ത മഴക്കെടുതിയിൽ ഒട്ടേറെ കർഷകരുടെ പച്ചക്കറികൾ നഷ്ടമായെങ്കിലും ബാക്കിയുള്ള ഉൽപ്പന്നങ്ങൾ കൃത്യമായി സംഭരിക്കാനുള്ള നടപടികൾ അതാതു കൃഷിഭവൻ ഉദ്യോഗസ്ഥർ നടത്തിയിട്ടുണ്ട്. എല്ലാ വിപണികളിലേക്കു മുള്ള പച്ചക്കറികൾ ശനിയാഴ്ച ഉച്ചതിരിഞ്ഞ് കൃഷി ഉദ്യോഗസ്ഥർ ഏറ്റെടുക്കും. 12 വിപണികളും ഞായറാഴ്‌ച 11 മണി മുതൽ പ്രവർത്തനമാരംഭിക്കുമെന്ന് കൃഷി അസിസ്റ്റൻ്റ് ഡയറക്ടർ അറിയിച്ചു.