കോതമംഗലം : തൊഴിലുറപ്പ് തൊഴിലാളികളുടെ മുന്നിൽ പ്രത്യക്ഷപ്പെട്ട കൂറ്റൻ രാജവെമ്പാലയെ ഇന്ന് വനപാലകർ വടാട്ടുപാറയിൽ നിന്ന് പിടികൂടി. കോതമംഗലം വടാട്ടുപാറ പനം ചുവട് തോട്ടിലും പരിസരങ്ങളിലുമായി ജോലി ചെയ്തുകൊണ്ടിരുന്ന തൊഴിലുറപ്പ് തൊഴിലാളികൾ ആണ് ഇന്ന് ഉച്ചയോടെ കൂറ്റൻ രാജവെമ്പാലയെ കണ്ടത്. തൊഴിലാളികളുടെ സാന്നിധ്യം തിരിച്ചറിഞ്ഞ രാജവെമ്പാല സമീപത്തെ തോട്ടിലെ കുറ്റിക്കാട്ടിൽ ഒളിക്കുകയായിരുന്നു. തൊഴിലുറപ്പ് തൊഴിലാളികൾ അറിയിച്ചതിനെത്തുടർന്ന് വടാട്ടുപാറ ഫോറസ്റ്റ് സ്റ്റേഷനിലെ ഡെപ്യൂട്ടി റെയ്ഞ്ച് ഫോറസ്റ്റ് ഓഫീസർ മുരളീധരൻ്റെ നേതൃത്വത്തിൽ വനപാലകർ സംഭവസ്ഥലത്തെത്തി.
തുടർന്ന് വിവരമറിയിച്ചതിനെ തുടർന്ന് കോടനാട് വൈൽഡ് ലൈഫ് റെസ്ക്യൂ ടീം എത്തി കൂറ്റൻ രാജവെമ്പാലയെ പിടികൂടുകയായിരുന്നു. വൈൽഡ് ലൈഫ് റെസ്ക്യു സംഘാംഗങ്ങളായ അൻവർ സാദിക്ക്, തേജസ് കെ രാജൻ, ബീറ്റ് ഫോറസ്റ്റ് ഓഫീസർ ഇബ്നുഷ എം അബ്ദുള്ള, വാച്ചർ ബെന്നി എന്നിവർ അതിസാഹസികമായ ആണ് തോട്ടിലിറങ്ങി വെള്ളത്തിലൂടെ ഇഴഞ്ഞ രാജവെമ്പാലയെ വലയിലാക്കിയത്.
