പെരുമ്പാവൂർ : എം.സി. റോഡിൽ പുല്ലുവഴിയിലുള്ള ഡബിൾ പാലം ഒറ്റപ്പാലമാക്കുന്നതിന് വേണ്ട നടപടികൾ പൂർത്തിയായതായി എൽദോസ് കുന്നപ്പിള്ളി എംഎൽഎ അറിയിച്ചു. പാലം നിർമ്മാണവുമായി ബന്ധപ്പെട്ട യോഗം രായമംഗലം പഞ്ചായത്ത് ഹാളിൽ വച്ച് ചേർന്നു.
പെരുമ്പാവൂർ നിയോജക മണ്ഡലത്തിലെ രായമംഗലം ഗ്രാമപഞ്ചായത്തിലൂടെ കടന്നുപോകുന്ന M.C റോഡിൽ തായ്ക്കര ഭാഗത്തുള്ള തായ്ക്കരച്ചിറ പാലം രണ്ട് പ്രത്യേക പാലങ്ങളായാണ് പണിതിട്ടുള്ളത്. അതിൽ പഴയ പാലത്തിന്റെ സ്പാൻ 7.70മീറ്ററും, വീതി 7.60 മീറ്ററും ആണ്. പഴയ പാലം പുനർ നിർമ്മിക്കുന്നതിനായി 28.11.2023 തീയതിയിലെ GO (Rt) No. 1562/2023/PWD പ്രകാരം 200 ലക്ഷം രൂപയുടെ ഭരണാനുമതി ലഭ്യമായിരുന്നു. സാങ്കേതികാനുമതി ലഭ്യമാക്കി 182.64 ലക്ഷം രൂപയ്ക്ക് 01/10/2024 തീയതിയിൽ, SE(BK) 09/2024-25 എഗ്രീമെന്റ് നമ്പറായി. ഒന്നര വർഷത്തെ കാലാവധിയോടുകൂടി അലക്സാണ്ടർ സേവിയർ എന്ന കരാറുകാരനുമായി കരാർ ഒപ്പുവച്ചിട്ടുണ്ട്. 08/10/2024 തീയതിയിൽ സൈറ്റ് കരാറുകാരനു പ്രവൃത്തിക്കായി കൈമാറിയിട്ടുമുണ്ട്.
13.2 മീറ്റർ നീളത്തിലും, 10.35 മീറ്റര് വീതിയിലുമുള്ള പാലമാണ് കെഎസ്ടിപി പണികഴിപ്പിച്ച പുതിയ പാലത്തോട് ചേർത്തു നിർമ്മിക്കാന് ഉദ്ദേശിക്കുന്നത് ഇരു വശത്തെയും 30മീറ്റർ നീളത്തില് അപ്രോച്ച് റോഡുകളും പുനർ നിർമ്മിക്കുന്നതിന് പ്രൊപോസല് ഉണ്ടെന്ന് എൽദോസ് കുന്നപ്പിള്ളി എംഎൽഎ അറിയിച്ചു.
കേരള സ്റ്റേറ്റ് ട്രാൻസ്പോർട്ട് പ്രോജക്ടിന്റെ (കെ.എസ്.ടി.പി.) ഭാഗമായി നടന്ന എം.സി. റോഡ് വികസനത്തെ തുടർന്ന് 20 കൊല്ലം മുമ്പാണ് പുല്ലുവഴിയിലെ വലിയതോടിനു കുറുകെ നിലവിലുണ്ടായിരുന്ന പഴയ പാലത്തോടു ചേർന്ന് പുതിയൊരു പാലംകൂടി നിർമിച്ച് റോഡിന്റെ വീതി വർധിപ്പിച്ചത്. എന്നാൽ, ഇരു പാലങ്ങളും തമ്മിൽ നാല് അടിയിലേറെ വിടവും രണ്ട് അടി ഉയര വ്യത്യാസവുമുണ്ട്. പാലത്തിന്റെ നിർമ്മാണം ആരംഭിക്കുന്ന ഘട്ടത്തിൽ എം സി റോഡിൽ ഗതാഗതക്കുരുക്ക് രൂക്ഷമാകുവാൻ സാധ്യതയുള്ളതിനാൽ മറ്റു റോഡുകൾ ഗതാഗതത്തിനായി തുറന്നുകൊടുക്കുന്ന കാര്യം യോഗത്തിൽ ചർച്ച ചെയ്തു തീരുമാനമായതായി എംഎൽഎ അറിയിച്ചു.
പാലത്തിന്റെ ഇടതുവശത്തെ പുതിയ പാലത്തിലൂടെ പെരുമ്പാവൂരിൽ നിന്നും മൂവാറ്റുപുഴക്കുള്ള റോഡിന്റെ ഗതാഗതം സാധാരണ നിലയിൽ തുറന്നുകൊടുക്കുകയും, മൂവാറ്റുപുഴയിൽ നിന്ന് വരുന്ന വാഹനങ്ങൾ മണ്ണൂർ ജംഗ്ഷനിൽ നിന്നും പോഞ്ഞാശ്ശേരി റോഡിലേക്ക് തിരിഞ്ഞ് കർത്താവും പടിയിൽ എത്തി വലത്തോട്ട് വീണ്ടും പുല്ലുവഴിയിലേക്ക് യാത്ര തുടരാവുന്നതാണ്. ഗതാഗതം സുഗമമാക്കുന്നതിനായി റോഡിന്റെ പ്രധാന ഭാഗങ്ങളിൽ എല്ലാം ദിശ ബോർഡുകൾ സ്ഥാപിക്കുവാൻ ധാരണയായി. കാലത്തിന്റെ ഇരുവശങ്ങളിലുമുള്ള ഭൂമി അളന്നപ്പെടുത്തുവാൻ രായമെങ്കിലും വില്ലേജ് ഓഫീസറെ ചുമതലപ്പെടുത്തി. പ്രധാന ജംഗ്ഷനുകളിൽ ഗതാഗതം ക്രമീകരിക്കുന്നതിന് പോലീസ്, ട്രാഫിക് പോലീസ്, മോട്ടോർ വെഹിക്കിൾ ഉദ്യോഗസ്ഥർ എന്നിവരുടെ സേവനം ലഭ്യമാക്കും. ശബരിമല സീസൺ കണക്കിലെടുത്ത് പാലം നിർമ്മാണം വൈകിപ്പിച്ചാൽ നിലവിൽ അനുകൂലമായ കാലാവസ്ഥ പ്രയോജനപ്പെടുത്താൻ സാധിക്കില്ല എന്ന വിവരം യോഗത്തിൽ വിലയിരുത്തി. ആയതിനാൽ പഴയ പാലം പൊളിച്ച് നിർമ്മാണം നവംബർ 15 ഓടുകൂടി ആരംഭിക്കുമെന്ന് എൽദോസ് കുന്നപ്പിള്ളി എംഎൽഎ അറിയിച്ചു.
യോഗത്തിൽ രായമംഗലം ഗ്രാമപഞ്ചായത്ത് പ്രസിഡന്റ് എൻ പി അജയകുമാർ, ജില്ലാ പഞ്ചായത്ത് അംഗം ഷൈമീ വർഗീസ്, ബ്ലോക്ക് വൈസ് പ്രസിഡന്റ് അംബിക മുരളീധരൻ, ബ്ലോക്ക് അംഗം ബീന ഗോപിനാഥ്, പഞ്ചായത്ത് അംഗങ്ങളായ ജോയ് പൂണേലി, ബിജു കുര്യാക്കോസ്, മാത്യൂസ് തരകൻ, കുര്യൻ പോൾ, മൂവാറ്റുപുഴ ആർടിഒ സുരേഷ് കുമാർ കെ കെ, അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ ഷിബു വി എസ്, കുറുപ്പുംപടി എസ് ഐ എൽദോ പോൾ, കുന്നത്തുനാട് എസ് ഐ നിസാർ കെ വി, പെരുമ്പാവൂർ ട്രാഫിക് എസ് ഐ കെ പി അജയകുമാർ, പൊതുമരാമത്ത് പാലങ്ങൾ വിഭാഗം അസിസ്റ്റന്റ് എക്സിക്യൂട്ടീവ് എഞ്ചിനീയർ സജിന എസ് ജെ, കുറുപ്പുംപടി റോഡ്സ് അസിസ്റ്റന്റ് എൻജിനീയർ അഞ്ജലി ഷാജി, കരാറുകാരൻ അലക്സാണ്ടർ സേവിയർ തുടങ്ങിയവർ പങ്കെടുത്തു.
