കോതമംഗലം:കഴിഞ്ഞ നവംബർ മാസത്തിൽ കൊച്ചിയിൽ സംഘടിപ്പിച്ച സംസ്ഥാന സ്കൂൾ കായികമേള ചാമ്പ്യൻഷിപ്പ് പട്ടം നിശ്ചയിച്ചതുമായി ബന്ധപ്പെട്ട പരസ്യ പ്രതിഷേധം ഉയർത്തിയതിനെ തുടർന്ന് മാർ ബേസിൽ സ്കൂളിനെ അടുത്തവർഷത്തെ സ്കൂൾ കായികമേളയിൽ പങ്കെടുപ്പിക്കില്ല എന്ന പൊതു വിദ്യാഭ്യാസ വകുപ്പിന്റെ കടുത്ത നടപടി പിൻവലിക്കണമെന്ന് ആവശ്യപ്പെട്ടുകൊണ്ട് ആന്റണി ജോൺ എം എൽ എ പൊതുവിദ്യാഭ്യാസ വകുപ്പ് മന്ത്രി വി ശിവൻകുട്ടിക്ക് കത്ത് നൽകി .
കായിക കേരളത്തിന്റെ തലസ്ഥാനമായ കോതമംഗലത്ത് ഒട്ടേറെ ദേശീയ -അന്തർദേശീയ താരങ്ങളെ വളർത്തിയെടുത്ത മാതൃക വിദ്യാലയമാണ് മാർ ബേസിൽ. വിലക്കേർപ്പെടുത്തിയ നടപടിയുമായി ബന്ധപ്പെട്ട് മുന്നോട്ട് പോയാൽ ഒട്ടേറെ കായിക താരങ്ങളുടെ അവസരം നഷ്ടമാകുന്നത് മാത്രമല്ല കുട്ടികളെ സംബന്ധിച്ച് കടുത്ത മാനസിക സംഘർഷത്തിനും ഇത് കാരണമാകും .പൊതു വിദ്യാഭ്യാസ വകുപ്പ് നിയോഗിച്ച അന്വേഷണ സമിതിയ്ക്ക് മുൻപാകെ സ്കൂൾ അധികൃതർ ക്ഷമാപണം നടത്തിയതായി അറിഞ്ഞു . ചാമ്പ്യൻഷിപ്പ് പട്ടവുമായി ബന്ധപ്പെട്ട് ഉണ്ടായ വിദ്യാർത്ഥികളുടേത് വൈകാരിക പ്രതിഷേധം മാത്രമായിരുന്നു എന്ന് കണക്കാക്കി ഇപ്പോൾ എടുത്ത തീരുമാനം പൊതു വിദ്യാഭ്യാസ വകുപ്പ് പിൻവലിക്കണമെന്ന് പൊതു വിദ്യാഭ്യാസ വകുപ്പ് മന്ത്രി വി ശിവൻകുട്ടിക്ക് നൽകിയ കത്തിൽ എം എൽ എ ആവശ്യപ്പെട്ടു .
