കോതമംഗലം : ഓസ്ട്രേലിയൻ ഉന്നത വിദ്യാഭ്യാസ സ്ഥാപനമായ ഐ-കറി യുടെ കൊച്ചി ശാഖയും കോതമംഗലം മാർ ബേസിൽ ഹയർ സെക്കൻഡറി സ്ക്കൂളും സംയുക്തമായി സംഘടിപ്പിക്കുന്ന അന്താരാഷ്ട്ര സമഗ്ര കായിക വിദ്യാഭ്യാസ പരിപാടിയായ സ്പോർട്സ് എഡ് 2023 നാളെ (29- ശനിയാഴ്ച) കോതമംഗലത്ത് നടക്കും. മാർ ബേസിൽ സ്കൂളിൽ നടക്കുന്ന ഏകദിന സ്പോർട്സ് ക്ലിനിക്കിൽ കായികതാരങ്ങളുടെ പ്രകടന പുരോഗതിക്കായി ആവിഷ്കരിച്ച നൂതന പരിശീലന പരിപാടിയായ സ്റ്റെം-ഫിറ്റ് പ്രോഗ്രാമിന്റെ അവതരണവും അന്താരാഷ്ട്ര സ്പോർട്സ് സയൻസ് വിദഗ്ധരുടെ പ്രഭാഷണങ്ങളും നടത്തും.
മാർ ബേസിൽ സ്ക്കൂളിലെ സെന്റ് തോമസ് ഹാളിൽ നാളെ രാവിലെ 8 മുതൽ വൈകിട്ട് 5 വരെ നീളുന്ന സ്പോർട്സ് എഡ് മഹാസമ്മേളനത്തിൽ കേരളത്തിലെ വിവിധ സ്ക്കൂൾ-കോളേജുകളിൽ നിന്നായി തിരഞ്ഞെടുക്കപ്പെട്ട അഞ്ഞൂറിലേറെ കായികതാരങ്ങളും കായിക അധ്യാപകരും പങ്കെടുക്കും. പ്രശസ്ത സ്പോർട്സ് കമന്റേറ്ററും മുതിർന്ന കായിക പത്രപ്രവർത്തകനുമായ ഷൈജു ദാമോദരൻ സമ്മേളനം ഉദ്ഘാടനം ചെയ്യും.
സമഗ്ര കായിക വികസനവും മെച്ചപ്പെട്ട പ്രകടനവും എന്ന വിഷയത്തിൽ ഓസ്ട്രേലിയയിലെ ചാൾസ് ഡാർവിൻ സർവകലാശാല മുൻ പ്രൊഫസറും ഒളിമ്പിക്സ് ടീം പരിശീലകനുമായ ഡോ.ജിം ലീ ക്ലാസെടുക്കും. സ്റ്റെം ഫിറ്റ് പ്രോഗ്രാമിന്റെ ഔദ്യോഗിക അവതരണവും അദ്ദേഹം നിർവഹിക്കും. സ്പോർട്സ് ക്ലിനിക്കിനും ഡോ.ജിം ലീ നേതൃത്വം നൽകും.
സ്പോർട്സ് സയൻസ് മേഖലയിലെ ഉന്നത വിദ്യാഭ്യാസ അവസരങ്ങളെക്കുറിച്ചും സാധ്യതകളെപ്പറ്റിയും ഐ-ക്വറി ഓസ്ട്രേലിയ സിഇഒ യും ടാസ്മാനിയ സർവകലാശാല പ്രൊഫസറുമായ ഡോ.ഗണേഷ് കോരമണ്ണിൽ സംസാരിക്കും. സ്റ്റുഡന്റ് കൗൺസലിംഗിനായി പ്രസ് എന്ന പദ്ധതിയുടെ വിശദീകരണവുംനടത്തും. ആരോഗ്യകരമായ ജീവിതശൈലി എങ്ങിനെയെന്ന് ‘ വേക്കപ്പ് ‘ സെഷനിൽ ജോയ് തോമസ് പരിചയപ്പെടുത്തും. ഐ-ക്വറി കൊച്ചി മാനേജിംഗ് ഡയറക്ടർ പ്രിൻസി ബിജു ആമുഖ പ്രഭാഷണം നിർവഹിക്കും.
ആന്റണി ജോൺ എംഎൽഎ, കോതമംഗലം ചെറിയപള്ളി വികാരി ഫാ.ജോസ് പരത്തുവയലിൽ, കാർഷിക ഉല്പന്ന കയറ്റുമതി അഥോറിറ്റി അംഗം തോമസ് പാറക്കൽ, അത്ലറ്റിക്സ് ഫെഡറേഷൻ ഓഫ് ഇന്ത്യ ജോയന്റ് സെക്രട്ടറിയും കേരള അത്ലറ്റിക്സ് അസോസിയേഷൻ സെക്രട്ടറിയും സ്പോർട്സ് കൗൺസിൽ സ്റ്റാന്റിംഗ് കമ്മിറ്റിയംഗവുമായ ഡോ.പി.ഐ.ബാബു, മാർ ബേസിൽ സ്ക്കൂൾ മാനേജർ കെ.പി.ജോർജ്, സ്പോർട്സ് അക്കാദമി പ്രതിനിധി ബിനോയ് മണ്ണഞ്ചേരി, സ്ക്കൂൾ കായികവിഭാഗം മേധാവി ഷിബി മാത്യു എന്നിവരും പങ്കെടുക്കും.
കായികതാരങ്ങളുടെ ചലന വൈവിധ്യങ്ങളെ ശാസ്ത്ര സാങ്കേതിക ഗണിത എഞ്ചിനീയറിംഗ് വൈദഗ്ധ്യത്തിന്റെ സഹായത്തോടെ മെച്ചപ്പെടുത്താനുള്ള ഗവേഷണ പദ്ധതിയാണ് സ്റ്റെം ഫിറ്റ്, ഓട്ടം, ചാട്ടം, നടത്തം തുടങ്ങി അത്ലറ്റുകളുടെ ശരീര ചലനവുമായി ബന്ധപ്പെട്ട എല്ലാ ഗവേഷണ കാര്യങ്ങളിലും മൈക്രോ ടെക്നോളജി ഉപയോഗപ്പെടുത്തിയുള്ള വിശകലനങ്ങൾ സ്റ്റെം ഫിറ്റിലൂടെ സാധ്യമാവും. ഇന്ത്യൻ സ്കൂളുകളിലെ പാഠ്യ പദ്ധതിയുടെ ഭാഗമായി സ്റ്റെം ഫിറ്റും വെസ്റ്റേൺ ഓസ്ട്രേലിയൻ കരിക്കുലവും ഉൾപ്പെടുത്താനുള്ള അംഗീകാരം ലഭിച്ച സ്ഥാപനമാണ് ഐ-ക്വറി ഓസ്ട്രേലിയ, ഇന്ത്യയ്ക്കു പുറമെ ഗൾഫ് രാജ്യങ്ങളിലെയും കെനിയ, മലേഷ്യ, സിംഗപ്പൂർ എന്നിവിടങ്ങളിലെ വിദ്യാഭ്യാസ സ്ഥാപനങ്ങളുമായും സർവകലാശാലകളുമായും ചേർന്ന് സംയുക്ത പദ്ധതികൾ ആവിഷ്കരിച്ചു നടപ്പാക്കുകയും ചെയ്യുന്നു.
