പോത്താനിക്കാട് : മുന്നൂറ് ഗ്രാം എംഡിഎംഎയുമായി യുവാവ് പിടിയില്‍. പോത്താനിക്കാട് ഞാറക്കാട് കണ്ണന്തറയില്‍ അഭിരാജ് (29)നെയാണ് റൂറല്‍ ജില്ലാ ഡാന്‍സാഫ് സംഘവും കാലടി പോലീസും ചേര്‍ന്ന് പിടികൂടിയത്. ജില്ലാ പോലീസ് മേധാവി ഡോ.വൈഭവ് സക്‌സേനയ്ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ ചന്ദ്രപ്പുര ഭാഗത്ത് നിന്നുമാണ് പ്രതിയെ പോലീസ് കസ്റ്റഡിയിലെടുത്തത്. ബംഗലൂരുവില്‍ നിന്ന് കാറിലാണ് രാസലഹരികടത്തിയത്. പോലീസ് കൈകാണിച്ചെങ്കിലും വാഹനം നിര്‍ത്താതെ അമിത വേഗത്തില്‍ ഓടിച്ചു പോകുകയും ഇടയ്ക്ക് വാഹനം ഉപേക്ഷിച്ച് രക്ഷപ്പെടാന്‍ ശ്രമിച്ച പ്രതിയെ പിന്തുടര്‍ന്നെത്തിയ പോലീസ് പിടികൂടുകയായിരുന്നു.
ധരിച്ചിരുന്ന ജാക്കറ്റിനുള്ളിലെ പ്രത്യേക അറയിലാണ് എംഡിഎംഎ ഒളിപ്പിച്ചിരുന്നത്. ഇരുപത് ലക്ഷത്തോളം രൂപ വില വരും പിടികൂടിയ രാസ ലഹരിയ്ക്ക്. 2023 ല്‍ പോത്താനിക്കാട് നിന്ന് 20 കിലോ കഞ്ചാവ് പിടികൂടിയ കേസിലെ പ്രതിയാണ് അഭിരാജ്. നര്‍ക്കോട്ടിക്ക് സെല്‍ ഡിവൈഎസ്പി പി.പി ഷംസ്, എസ്.ഐമാരായ ജോസി.എം ജോണ്‍സന്‍, ടി.വി സുധീര്‍, സീനിയര്‍ സിപിഒമാരായ എം.പി ജിന്‍സന്‍, ഷിജോ പോള്‍, ഷിബു അയ്യപ്പന്‍ എന്നിവരാണ് അന്വേഷണ സംഘത്തിലുള്ളത്.
