പെരുമ്പാവൂർ : കേരള അതിഥി തൊഴിലാളി ക്ഷേമനിധി ബോർഡ് രൂപീകരണ ബിൽ നിയമസഭയിലവതരിപ്പിച്ച് എൽദോസ് പി. കുന്നപ്പിള്ളിൽ, എം. എൽ. എ. സംസ്ഥാനത്തെ അസംഘടിത മേഖലയിൽ ജോലി ചെയ്യുന്ന അതിഥി തൊഴിലാളികൾക്ക് ജോലിസ്ഥിരത ഉറപ്പാക്കുന്നതിനും മിനിമം വേതനം ഉറപ്പുവരുത്തുന്നതിനും അവരുടെ സംരക്ഷണവും ക്ഷേമവും ഉറപ്പുവരുത്തുന്നതിനും ഈ മേഖലയിലെ ചൂഷണം തടയുന്നതിനും, അതിഥി തൊഴിലാളികളുടെ രജിസ്ട്രേഷൻ നടപ്പാക്കുന്നതിനും, കേരള അതിഥി തൊഴിലാളി ക്ഷേമനിധി ബോർഡ് എന്ന പേരിൽ ഒരു ബോർഡ് രൂപീകരണം വ്യവസ്ഥ ചെയ്യുന്ന ബിൽ നിയമസഭയിൽ അവതരിപ്പിച്ചു.
ബോർഡിന്റെ കർത്തവ്യങ്ങൾ
(1) സംസ്ഥാനത്തെ അതിഥി തൊഴിലാളികളുടെ ജോലി സ്ഥിരത ഉറപ്പാക്കുന്നതിനും മിനിമം വേതനം ഉറപ്പുവരുത്തുന്നതിനും അവരുടെ സംരക്ഷണവും ക്ഷേമവും ഉറപ്പുവരുത്തുന്നതിനും ഈ മേഖലയിലെ ചൂഷണം തടയുന്നതിനും ആവശ്യമായ നടപടികൾ സ്വീകരിക്കുക
(2) ഇത് സംബന്ധിച്ച ശുപാർശകൾ സർക്കാരിന് സമർപ്പിക്കുക.
3) സംസ്ഥാനത്തെ അസംഘടിത മേഖലയിൽ ജോലി ചെയ്യുന്ന അതിഥി തൊഴിലാളികൾക്കും അവരുടെ ആശ്രിതർക്കും ആവശ്യമായ ക്ഷേമപദ്ധതികൾ നടപ്പിലാക്കുക;
(4) സംസ്ഥാനത്തെ , അതിഥി തൊഴിലാളികൾക്ക് ക്ഷേമപെൻഷനുകൾ
നടപ്പിലാക്കുക;
(5) ക്ഷേമനിധി ബോർഡിൽ രജിസ്റ്റർ ചെയ്തിട്ടുള്ളവർ ക്ഷേമനിധിയിലേക്ക് അടയ്ക്കേണ്ട നിശ്ചിത വിഹിതവും നിശ്ചിത സർക്കാർ വിഹിതവും അടയ്ക്കുന്ന കാര്യം ഉറപ്പാക്കുക.
(6) അവശ്യമായ ഇൻഷ്വറൻസ് പരിരക്ഷ
(7) സംസ്ഥാനത്ത് എത്തിച്ചേരുന്ന മുഴുവൻ അതിഥി തൊഴിലാളികളുടെയും
രജിസ്ട്രേഷൻ ഉറപ്പാക്കുക.
( 8) ക്ഷേമനിധി ബോർഡിന്റെ പ്രവർത്തനത്തിനായി ക്ഷേമനിധി ബോർഡിന് ജില്ല അടിസ്ഥാനത്തിൽ ഉപസമിതികൾ രൂപീകരിക്കേണ്ടതാണ്.
കേരളത്തിലെ അതിഥി തൊഴിലാളികളുടെ സാഹചര്യം സുരക്ഷിതമല്ല. ഈ തൊഴിലാളികൾ വിവിധ തരം ചൂഷണങ്ങൾക്ക് വിധേയമാകുന്നുണ്ട്. കൂടാതെ ജോലി സ്ഥിരതയും ഇല്ല. മേഖലയിൽ ജോലി ചെയ്യുന്നവരുടെ ജോലി സ്ഥിരത ഉറപ്പാക്കുന്നതിനും മിനിമം വേതം ഉറപ്പു വരുത്തുന്നതിനും അവരുടെ സംരക്ഷണവും ക്ഷേമവും ഉറപ്പുവരുത്തുന്നതിനും ഈ മേഖലയിലെ ചൂഷണം തടയുന്നതിനും ആവശ്യമായ നിയമില്ലാത്തതാണ് ഇതിന് കാരണം. ഇക്കാര്യങ്ങൾ അടിയന്തരമായി പരിഗണിച്ച് ഈ മേഖലയിൽ ജോലി ചെയ്യുന്നവരുടെ സുരക്ഷിതത്വവും ക്ഷേമവും ഉറപ്പാക്കേണ്ടത് സർക്കാരിന്റെ കർത്തവ്യമാണ്. ഈ ലക്ഷ്യം സാക്ഷാത്കരിക്കാൻ ഒരു ക്ഷേമനിധി ബോർഡ് രൂപീകരിക്കാൻ ഉദ്ദേശിച്ചുകൊണ്ടുള്ളതാണ് ഈ ബിൽ.
ബില്ലിലെ വ്യവസ്ഥകൾക്ക് അനുസരിച്ച് ക്ഷേമനിധി ബോർഡ് നിലവിൽ വരികയും പ്രവർത്തനക്ഷമമാവുകയും ചെയ്യുമ്പോൾ മാത്രമേ ഇതിന് വേണ്ടിവരുന്ന സാമ്പത്തിക ബാധ്യത എത്രയെന്നു കണക്കാക്കാൻ കഴിയുകയുള്ളു. എങ്കിലും അതോറിറ്റിയുടെ പ്രാരംഭ ചെലവുകൾക്കായി 25 ലക്ഷം രൂപ സഞ്ചിതനിധിയിൽ നിന്നും ചെലവ് പ്രതീക്ഷിക്കുന്നു. കേരളത്തിൽ ഏറ്റവും കൂടുതൽ അതിഥി തൊഴിലാളികൾ ജോലി ചെയ്യുന്നത് പെരുമ്പാവൂരിലും പരിസരപ്രദേശങ്ങളിലും ആയിട്ടാണ് എന്നും എൽദോസ് പി. കുന്നപ്പിള്ളിൽ എംഎൽഎ അറിയിച്ചു .
