പെരുമ്പാവൂർ : പെരുമ്പാവൂരിലും പരിസര പ്രദേശങ്ങളിലും മഴ കുറഞ്ഞ സാഹചര്യത്തിൽ പെരിയാർ വാലി കനാലിലൂടെ ജലസേചനം ഡിസംബർ അവസാനത്തോടെ ആരംഭിക്കുമെന്ന് എൽദോസ് കുന്നപ്പിള്ളി എംഎൽഎ അറിയിച്ചു. എം.എൽ.എയൂടെ നിർദ്ദേശ പ്രകാരം തിങ്കളാഴ്ച ജല വിതരണത്തിൻ്റെ ട്രയൽ റൺ നടത്തി.
ജല വിതരണം എത്രയും വേഗത്തിൽ ആരംഭിച്ചു കർഷകരുടെയും ജനങ്ങളുടെയും കുടിവെള്ള പ്രശ്നത്തിന് പരിഹാരം ഉണ്ടാകണമെന്ന് എൽദോസ് കുന്നപ്പിള്ളി എം.എൽ.എ പെരിയാർ വാലി എക്സിക്യൂട്ടീവ് എഞ്ചിനീയറോട് ആവശ്യപ്പെട്ടിരുന്നു.
കാലാവർഷം അവസാനിച്ചതോടെ ജല ലഭ്യത കുറഞ്ഞത് മൂലം വരൾച്ച ശക്തമായിരിക്കുകയാണ്. പെരിയാർവാലി കനാലിലൂടെയുള്ള ജല ലഭ്യത അനുസരിച്ചു കൃഷി ചെയ്യുന്ന കർഷകർക്കുണ്ടാകുന്ന ബുദ്ധിമുട്ട് എം.എൽ.എ എക്സിക്യൂട്ടീവ് എഞ്ചിനീയറെ അറിയിച്ചു. കനാൽ വെള്ളത്തിൻ്റെ അപര്യാപ്തത മൂലം ജല അതോറിറ്റിയുടെ പമ്പിംഗ് സ്റ്റേഷനിൽ ജലവിതരണം ഭാഗീകമായി തടസപ്പെടുന്ന സ്ഥിതിയാണ് നിലവിലുള്ളതെന്നും എം.എൽ.എ ചൂണ്ടി കാട്ടി.
കാലാവർഷം ശക്തമായപ്പോൾ പല ഇടങ്ങളിലും കാനലിന്റെ വശങ്ങൾ ഇടിഞ്ഞിരുന്നു. ഇതിന്റെ പുനർനിർമ്മാണ പ്രവർത്തനങ്ങൾ അവസാന ഘട്ടത്തിൽ ആണ്. കനാലിന്റെ ശുചീകരണ ജോലികൾ ഭൂരിഭാഗവും ഇതിനോടകം പൂർത്തിയായി. തൊഴിലുറപ്പ് തൊഴിലാളികൾ ആണ് ശുചീകരണ പ്രവർത്തനങ്ങൾ നടത്തുന്നത്.
കനാലുകളുടെ വശങ്ങൾക്കുള്ളിൽ നിൽക്കുന്ന മരങ്ങൾ വെട്ടി നീക്കണമെന്നും എംഎൽഎ പെരിയാർ വാലിക്ക് നിർദ്ദേശം നൽകിയിട്ടുണ്ട്. തൊഴിലുറപ്പ് തൊഴിലാളികൾക്ക് ഇത് നീക്കം ചെയ്യുന്നതിന് ബുദ്ധിമുട്ട് ഉണ്ടെന്ന് പരാതി ഉയർന്നിരുന്നു. ഇതേ തുടർന്നാണ് എംഎൽഎ നിർദ്ദേശം നൽകിയത്.
