കോതമംഗലം : നേര്യമംഗലത്ത് വനപാലകരെ ആക്രമിച്ച് പരിക്കേൽപ്പിച്ചയാള്‍ അറസ്റ്റിൽ. കഞ്ഞിക്കുഴി കീരിത്തോട് പകുതിപ്പാലം ഭാഗത്ത് കുമരംകുന്നേൽ വീട്ടിൽ പ്രജീഷ് (33), നെയാണ് ഊന്നുകൽ പോലീസ് അറസ്റ്റ് ചെയ്തത്. വനപാലകരുടെ ഔദ്യോഗിക കൃത്യനിർവ്വഹണം തടസ്സപ്പെടുത്തിയതിനും, ദേഹോപദ്രവം ഏൽപ്പിച്ചതിനും രജിസ്റ്റർ ചെയ്ത കേസിലാണ് അറസ്റ്റ്. ഇയാളും ഭാര്യയും കഴിഞ്ഞ ദിവസം ചെമ്പൻപാറ ഭാഗത്തുള്ള നഗരംപാറ ഫോറസ്റ്റ് ഓഫീസിൽ ചെന്ന് ഡെപ്യൂട്ടി റേഞ്ച് ഫോറസ്റ്റ് ഓഫീസറെയും വനിതാ ബീറ്റ് ഫോറസ്റ്റ് ഓഫീസറെയും ആക്രമിക്കുകയും, ഓഫീസിന്‍റെ ജനൽ എറിഞ്ഞുടയ്ക്കുകയുമായിരുന്നു.
പ്രജീഷ് നഗരംപാറ റിസർവ്വ് ഫോറസ്റ്റിൽ പാംപള ഭാഗത്ത് അനധികൃതമായി കൈയ്യേറി ഷെഡ് വച്ച് കെട്ടിയത് ഫോറസ്റ്റ് ഉദ്യോഗസ്ഥർ പൊളിച്ചു നീക്കിയിരുന്നു. കഞ്ഞിക്കുഴി പോലീസ് സ്റ്റേഷനിലെയും അടിമാലി പോലീസ് സ്റ്റേഷനിലെയും നിരവധി കേസുകളിലെ പ്രതിയാണ് ഇയാൾ. അന്വഷണ സംഘത്തിൽ സബ്ബ് ഇൻസ്പെക്ടർമാരായ ശരത് ചന്ദ്രകുമാർ, ഷാജു ഫിലിപ്പ് എസ്.സി.പി.ഒ മാരായ ഷനിൽ, നസീമ എന്നിവരാണ് ഉണ്ടായിരുന്നത്
