കോതമംഗലം : പട്ടികവർഗ വികസന വകുപ്പിന്റെ അംബേദ്കർ സെറ്റിൽമെന്റ് സമഗ്ര വികസന പദ്ധതിയിൽ ഉൾപ്പെടുത്തി കുട്ടമ്പുഴ ഗ്രാമപഞ്ചായത്തിലെ ആറാം വാർഡിൽ ഉൾപ്പെട്ട തേര കോളനിയിൽ ഒരു കോടി രൂപ ചെലവഴിച്ചു നടപ്പിലാക്കിയ വിവിധ നിർമാണ പ്രവർത്തികളുടെ ഉദ്ഘാടനം 10/03/2024 ഞായറാഴ്ച ഉച്ച കഴിഞ്ഞ് 03 മണിക്ക് ബഹു. പട്ടികജാതി -പട്ടിക വർഗ, പിന്നാക്ക ക്ഷേമ, ദേവസ്വം, പാർലമെന്ററി കാര്യ വകുപ്പ് മന്ത്രി കെ. രാധാകൃഷ്ണൻ നിർവഹിക്കുമെന്ന് ആന്റണി ജോൺ എം എൽ എ അറിയിച്ചു.
തേര ആദിവാസി കോളനിയിൽ കുടിവെള്ള പദ്ധതികൾക്കായി 3 കിണറുകളും ,റോഡ് നിർമ്മാണം (359 മീറ്റർ കോൺക്രീറ്റിങ്ങ്), ബാംബൂ ഉൽപ്പന്നങ്ങളുടെ നിർമ്മാണ യൂണീറ്റ് കെട്ടിടം,ചാവടിപ്പുര കെട്ടിട നിർമ്മാണ മടക്കം ഒരു കോടി രൂപയുടെ വികസന പദ്ധതികളാണ് നടപ്പിലാക്കിയിട്ടുള്ളത്. നിർവഹണ ഏജൻസിയായ ഹാബിറ്റാറ്റാണ് നിർമ്മാണ പ്രവർത്തികൾ പൂർത്തീകരിച്ചത്.
