വീണ്ടും പുലിയുടെ കാൽപാടുകൾ, ഉറക്കം നഷ്ടപ്പെട്ട് പ്ലാമുടിക്കാർ; പുലി ആക്രമിച്ച വീട്ടമ്മയെ അവഗണിച്ചു അധികാരികളും.

• ജെറിൽ ജോസ് കോട്ടപ്പടി

കോട്ടപ്പടി : വീട്ടിൽ കിടന്നുറങ്ങാനോ, വീടിന്റെ പരിസരത്തോ , കൃഷിയിടത്തിലോ പോലും ധൈര്യമായി ഇറങ്ങാൻ കഴിയാത്ത അവസ്ഥയിലാണ് പ്ലാമുടി നിവാസികൾ. വീട്ടമ്മയെ പുലി ആക്രമിച്ചതുകൊണ്ട് പകൽ പോലും വെളിയിൽ ഇറങ്ങാൻ പറ്റാത്ത അവസ്ഥയിലാണ്. സ്ഥിരമായി പുലി വന്നു പോകുന്ന സ്ഥലങ്ങളിൽ രണ്ട് കെണിയൊരുക്കി കാത്തിരിക്കുകയാണ് വനപാലകർ. കൂടാതെ പുലിയെ കണ്ടെന്ന് പറയുന്ന സ്ഥലങ്ങളിലെല്ലാം നിരീക്ഷണ ക്യാമറകൾ സ്ഥാപിച്ചിട്ടുണ്ട്.

കൂടുതൽ ക്യാമറകൾ അനുവദിച്ച് കിട്ടുന്ന പക്ഷം പലയിടത്തായി സ്ഥാപിക്കുമെന്ന് വനം വകുപ്പ് അറിയിച്ചിട്ടുണ്ട്. അക്രമകാരിയായ പുലിയെ വെടിവെച്ചുകൊല്ലുക മാത്രമാണ് ഏക പോംവഴിയെന്നാണ് നാട്ടുകാർ അവകാശപ്പെടുന്നത്. ഇന്നലെ രാത്രി കരിപ്പ്ക്കാട്ടു ഇസഹാക്കിന്റ വീട്ടിൽ പുലിയുടെ കാൽപാടുകൾ കണ്ടെത്തിയത് നാട്ടുകാരിൽ ഭയം വർധിപ്പിച്ചിട്ടുണ്ട്.

പുലി ആക്രമണത്തിൽ പരിക്കേറ്റ വീട്ടമ്മ ആശുപത്രിയിൽ ആയി നാല് ദിവസം കഴിഞ്ഞു. ഇതുവരെ ഫോറസ്റ്റ് ഡിപ്പാർട്ട്മെന്റ് നിന്നും ആരും ആശുപത്രിയിൽ എത്താത്തത് വ്യാപക പ്രതിഷേധം ഉയർത്തിയിട്ടുണ്ട്.