കോട്ടപ്പടി : പ്ലാമുടിയിൽ വീണ്ടും പുലി ആക്രമണം. തുടർച്ചയായ നാലാം ദിവസമാണ് വളർത്തുമൃഗങ്ങൾക്കെതിരെ പുലിയുടെ ആക്രമണമുണ്ടാകുന്നത്. കഴിഞ്ഞ ദിവസം ബൈക്ക് യാത്രികനാണ് പുലിയെ കണ്ടത്. വെള്ളിയാഴ്ച രാത്രി ഒൻപത് മണിയോടെ ബൈക്കിൽ പോകുകയായിരുന്ന കരിപ്പേലിൽ എൽദോസ് ആണ് പുലിയെ കണ്ടത്. ഇയാളുടെ മുന്നിലൂടെ പുലി റോഡിന് കുറുകെ കടക്കുകയായിരുന്നുവെന്ന് പറയുന്നു. ഇന്നലെ രാത്രി പ്ലാമൂടിയിൽ പുലി വന്ന് പട്ടിയെയും, പശുവിനെയും ആക്രമിക്കുകയും, കാട്ടുപന്നിയുടെ കുഞ്ഞിനെ പിടികൂടി കൊല്ലുകയും ചെയ്‌തിരുന്നു. ഇരയെ ഉപേക്ഷിച്ചു പുലി കടന്നുകളയുകയും വനംവകുപ്പ് സ്ഥലത്തെത്തി പന്നിക്കുഞ്ഞിനെ കൊണ്ടുപോകുകയും ചെയ്‌തു.
ശനിയാഴ്ച്ച രാത്രി കല്ലുളിയിൽ കൈതകണ്ടം അപ്പുവിൻ്റെ പശുവിനെയും വളർത്തുനായയേയുമാണ് പുലി ആക്രമിച്ചത്. രാത്രി ഒന്നരയോടെ നായയുടെ ശബ്ദം കേട്ട് പുറത്തിറങ്ങിയപ്പോൾ തങ്ങൾ പുലിയെ നേരിട്ട് കണ്ടെന്നാണ് അപ്പുവും കുടുംബവും പറയുന്നത്. കഴിഞ്ഞ ദിവസം ഇതേ ഭാഗത്ത് പുലിയെ കണ്ടതിനെത്തുടർന്ന് പിടികൂടാൻ വനംവകുപ്പ് കൂട് സ്ഥാപിച്ചതിന് പിന്നാലെയാണ് സമീപത്തുതന്നെ വീണ്ടും പുലിയെ കണ്ടത്. തുടർച്ചയായ ദിവസങ്ങളിൽ നാട്ടിലിറങ്ങുന്നത് ഒരു പുലി തന്നെയാകാമെന്നാണ് നാട്ടുകാരുടെ അനുമാനം. പ്ലാമുടിയിൽ പുലിയെ പിടികൂടാൻ വെളളിയാഴ്ചയാണ് കൂട് സ്ഥാപിച്ചത്.
