കോതമംഗലം : പിണ്ടിമന പഞ്ചായത്തിലെ പന്ത്രണ്ടാം വാർഡിൽ വെറ്റിലപ്പാറ ഭാഗത്ത് മെയിൻ റോഡ് ഭാഗത്ത് കഴിഞ്ഞ ദിവസം കാട്ടാനയിറങ്ങി വ്യാപകമായി കൃഷി നശിപ്പിച്ചു. പാട്ടത്തിനെടുത്ത് കൃഷി ചെയ്ത ചാത്തൻ ചിറയിൽ സി.പി. കുഞ്ഞുമോൻ്റെ കുലക്കാത്ത നൂറോളം ഏത്തവാഴകളും, കൂർക്ക കൃഷികളുമാണ് കാട്ടാന നശിപ്പിച്ചത്.കൃഷിഭവൻ വഴി ഏത്തവാഴകൾ ഇൻഷൂർ ചെയ്തതാണ് ആശ്വാസമായി കർഷകർ കാണുന്നത്. വെറ്റിലപ്പാറ ഭാഗത്തെ കർഷകരെ പൂർണ്ണമായും വിള ഇൻഷൂറൻസ് പദ്ധതിയിൽ ഉൾപ്പെടുത്തുന്നതിനുള്ള നപടികൾ ആരംഭിച്ചതായി കൃഷിഭവൻ അധികൃതർ വ്യക്തമാക്കി. ആനകൾ നശിപ്പിച്ച വാഴത്തോട്ടം പഞ്ചായത്ത് പ്രസിഡൻ്റ് ജെസ്സി സാജുവിൻ്റെ നേതൃത്വത്തിൽ വിദ്യാഭ്യാസ ആരോഗ്യ സ്റ്റാൻ്റിംഗ് ചെയർമാൻ മേരി പീറ്റർ, കൃഷി ഓഫീസർ ഇ.എം.അനീഫ, കൃഷി അസിസ്റ്റൻ്റ് വി.കെ.ജിൻസ് കാർഷിക വികസന സമിതിയംഗങ്ങളായ കെ.കെ.വിശ്വനാഥൻ, എം.എസ്.ജോർജ് എന്നിവർ കൃഷിയിടം സന്ദർശിച്ചു.
