കോതമംഗലം:ആലുവ മൂന്നാർ രാജപാത ഗതാഗതത്തിനായി തുറന്ന് നൽകണമെന്നും രാജപാത സമരവുമായി ബന്ധപ്പെട്ട് ബിഷപ്പ് മാർ ജോർജ് പുന്നക്കോട്ടിലിനും, ജന പ്രതിനിധികൾക്കും, പൊതുജനങ്ങൾക്കും എതിരായി എടുത്ത കേസുകൾ പിൻവലിക്കണമെന്നും താലൂക്ക് വികസന സമിതി യോഗം
പ്രമേയത്തിലൂടെ ആവശ്യപ്പെട്ടു. ഇല്ലാത്ത അവകാശം സ്ഥാപിച്ചെടുക്കാനുള്ള വ്യഗ്രതയിലാണ് വനം വകുപ്പിലെ ചില ഉന്നത ഉദ്യോഗസ്ഥർ. ആലുവ – മൂന്നാർ രാജപ്പാതയുടെ ഭാഗമായ കോതമംഗലം- പെരുമ്പൻകുത്ത് റോഡ് നിലവിൽ പൊതുമരാമത്ത് വകുപ്പിന്റെ ആസ്തിയിൽ ഉള്ളതും വനം വകുപ്പിന് യാതൊരു അവകാശം ഇല്ലാത്തതുമാണ്. ഈ റോഡാണ് അനധികൃത മായി വനം വകുപ്പ് പൂയംകുട്ടിക്ക് സമീപം അടച്ചിട്ടുള്ളത്. ഈ പാത തുറന്നു നൽകണമെന്നുള്ള തികച്ചും ന്യായമായ ആവശ്യം അംഗീകരിക്കാൻ തയ്യാറാകാത്ത വനം വകുപ്പിന്റെ നിലപാട് പ്രതിക്ഷേധാർഹ മാണെന്നും ഈ നിലപാട് തിരുത്താൻ വനം വകുപ്പ് തയ്യാറാകണമെന്നും വികസന സമിതി യോഗം പ്രമേയത്തിലൂടെ ആവശ്യപ്പെട്ടു.
വടാട്ടുപാറ – പലവൻപടി പുഴയിൽ നിരവധി മുങ്ങി മരണങ്ങൾ ഉണ്ടാകുന്ന സാഹചര്യത്തിൽ ദുരന്ത നിവാരണ നിയമ പ്രകാരമുള്ള അടിയന്തിര നടപടികൾ സ്വീകരിക്കുന്നതിന് യോഗം തഹസിൽദാർ മാരെ ചുമതലപ്പെടുത്തി. കോതമംഗലം ടൗണില് വിവിധ വേദികളിലായി നടന്നു കൊണ്ടിരിക്കുന്ന കേരളോത്സവം വിജയകരമാക്കുന്നതിന് എല്ലാവരുടെയും സഹകരണം ഉണ്ടാകണമെന്ന് യോഗം നിർദ്ദേശിച്ചു.കോതമംഗലം മണ്ഡലത്തിലെ 5 പഞ്ചായത്തുകളിലെ വിവിധ പ്രദേശങ്ങളിൽ നേരിട്ടുകൊണ്ടിരിക്കുന്ന വന്യമൃഗശല്യത്തെ പ്രതിരോധിക്കുന്നതിനായി സർക്കാർ പ്രഖ്യാപിച്ചിട്ടുള്ള ഫെന്സിംഗ്, ഹാങ്ങിങ് ഫെൻസിങ്,ട്രഞ്ചിംഗ് ഉൾപ്പെടെയുള്ള വര്ക്കുകളുടെ , സമയബന്ധിതവും,കാര്യക്ഷമമായുമുള്ള പൂർത്തീകരണം ബന്ധപ്പെട്ട ഡി എഫ് ഒ മാർ ഉറപ്പുവരുത്തണമെന്നും യോഗം ആവശ്യപ്പെട്ടു. കോതമംഗലം മുനിസിപ്പാലിറ്റിയിലെ അമ്പലപ്പറമ്പ് പ്രദേശത്ത് അടിക്കടിയുണ്ടാകുന്ന വൈദ്യുതി തടസ്സം പരിഹരിക്കുന്നതിന് കെ എസ് ഇ ബി കാര്യ ക്ഷമമായ നടപടി സ്വീകരിക്കണമെന്നും യോഗം നിർദ്ദേശിച്ചു.
ടൗണിലെ വിവിധ ഭാഗങ്ങളില് ലഹരി വിരുദ്ധ നടപടികളുടെ ഭാഗമായുളള പരിശോധനകൾ ശക്തമാക്കുന്നതിന് എക്സൈസ് വകുപ്പിന് യോഗം നിര്ദ്ദേശം നല്കി.
പട്ടയ വിതരണത്തിനുളള നടപടികള് ത്വരിതവേഗത്തിലാക്കുന്നതിന് യോഗം തഹസില്ദാരെ ചുമതലപ്പെടുത്തി.
വേനല്ക്കാലം മുന്നില്കണ്ട് ടൗണിലെ വിവിധ പ്രദേശങ്ങളില് ഉണ്ടായിട്ടുളള കുടിവെളള വിതരണ പൈപ്പ് ലൈൻ പ്രശ്നത്തിന് പരിഹാര നടപടികള് വാട്ടര് അതോറിറ്റിയും,പി ഡബ്ലൂ ഡി സംയുക്തമായി കൈക്കൊളളണമെന്ന് യോഗം ആവശ്യപ്പെട്ടു.
മോട്ടോര് വാഹന വകുപ്പ് പിടിച്ചെടുത്ത്റവന്യു ടവറിനു സമീപം സൂക്ഷിച്ചിട്ടുളള പഴയ വാഹനങ്ങള് അടിയന്തിരമായി നീക്കം ചെയ്യുന്നതിന് നടപടി സ്വീകരിക്കണമെന്ന് എം.വി.ഡി യോട് യോഗം നിര്ദ്ദേശിച്ചു. വാരപ്പെട്ടി പഞ്ചായത്തില് സ്ട്രീറ്റ് ലൈറ്റ് മെയിന്റനന്സുമായി ബന്ധപ്പെട്ട നടപടികള് കെ.എസ്.ഇ.ബി എത്രയും വേഗം പൂര്ത്തീകരിക്കണമെന്ന് വാരപ്പെട്ടി ഗ്രാമ പഞ്ചായത്ത് പ്രസിഡന്റ് യോഗത്തില് ആവശ്യപ്പെട്ടു.കീരമ്പാറ പഞ്ചായത്തിൽ ഫെന്സിംഗ് സ്ഥാപിക്കുന്ന പ്രവർത്തി വേഗത്തിലാക്കണമെന്നും, ഇടവിട്ട് വൈദ്യുതി തടസ്സം നേരിടുന്നതില് പരിഹാരം ഉണ്ടാകണമെന്നും പാലമറ്റം വാട്ടര് ടാങ്ക് എസ്റ്റിമേറ്റ് തയ്യാറാക്കി നല്കണമെന്നും ബന്ധപ്പെട്ട വകുപ്പുകളോട് കീരമ്പാറ പഞ്ചായത്ത് പ്രസിഡന്റ് ആവശ്യപ്പെട്ടു.
യോഗത്തിൽ ആന്റണി ജോൺ എം എൽ. എ അധ്യക്ഷത വഹിച്ചു. തഹസിൽ ദാർ അനിൽകുമാർ എം,മുനിസിപ്പൽ ചെയർമാൻ ടോമി എബ്രഹാം,വാരപ്പെട്ടി ഗ്രാമ പഞ്ചായത്ത് പ്രസിഡന്റ് പി കെ ചന്ദ്ര ശേഖരൻ നായർ,കീരമ്പാറ ഗ്രാമ പഞ്ചായത്ത് പ്രസിഡന്റ് എം പി ഗോപി, ജില്ലാ പഞ്ചായത്ത് അംഗം റാണിക്കുട്ടി ജോർജ്, മുനിസിപ്പൽ സ്റ്റാൻഡിങ് കമ്മിറ്റി ചെയർമാൻ കെ എ നൗഷാദ്, വിവിധ രാഷ്ട്രീയ പാർട്ടി പ്രതിനിധികളായ എം എസ് എൽദോസ്, പി ടി ബെന്നി,എ ടി പൗലോസ്, തോമസ് വട്ടപ്പാറയിൽ, സാജൻ അമ്പാട്ട്,വിവിധ വകുപ്പ് മേധാവികൾ എന്നിവർ യോഗത്തിൽ പങ്കെടുത്തു.
