കോതമംഗലം: കാൽ പന്ത് കളിയിൽ കഴിവുള്ള കായിക പ്രതിഭകളെ വാർത്തെടുക്കുവാൻ മാർ അത്തനേഷ്യസ് കോളേജ് അസോസിയേഷൻ തുടക്കം കുറിച്ചു. കേരളത്തിന്റെ കായിക തലസ്ഥാനം ആയ കോതമംഗലത്തിന് പുത്തൻ പ്രതീക്ഷയുമായിട്ടാണ് മാർ അത്തനേഷ്യസ് ഫുട്ബോൾ സ്കൂൾ പ്രവർത്തനമാരംഭിച്ചിരിക്കുന്നത്. കോതമംഗലത്തെയും പരിസരപ്രദേശങ്ങളിലെയും കഴിവുറ്റ താരങ്ങളെ കണ്ടെത്തി മികച്ച പരിശീലനത്തിലൂടെ അവരെ വളർത്തിയെടുക്കുകയും ജില്ലാ അക്കാദമി ലീഗിലും സംസ്ഥാന അക്കാദമി ലീഗ്കളിലും കളിക്കാൻ താരങ്ങളെ പ്രാപ്തരാക്കുകയും മികച്ച പ്രകടനം കാഴ്ച വെക്കുന്നവരെ കേരള പ്രീമിയർ ലീഗ് പോലുള്ള മത്സരങ്ങൾക്ക് വഴി തുറന്നുനൽകുന്ന മാർ അത്തനേഷ്യസ് ഫുട്ബോൾ അക്കാദമിയുടെ ഒരു നഴ്സറി എന്ന കാഴ്ചപ്പാടിൽ ആണ് ഇങ്ങനെ ഒരു സംരംഭം തുടങ്ങാൻ മാനേജ്മെന്റ് തീരുമാനിച്ചിരിക്കുന്നത്.
അക്കാദമിയിൽ U-14, U-16, U – 18 ( MAFA Reserve ) കളിക്കാരെ ആയിരിക്കും പരിഗണിക്കുക.
മികച്ച 11 A സൈഡ് പുൽ മൈതാനതായിരിക്കും കുട്ടികൾക്ക് പരിശീലനം. ടെക്നിക്കൽ സെഷനുകൾ, ടാക്ടിക്കൽ സെഷനുകൾ, കണ്ടീഷനിംഗ് സെഷനുകൾ, വീഡിയോ ക്ലാസുകൾ,
സൈക്കോളജിക്കൽ ട്രെയിനിങ്, പരിശീലനം മത്സരങ്ങൾ, യോഗ ട്രെയിനിങ്,
റിക്കവറി സെഷനുകൾ (Swimming/ICE Bath) എന്നിവ അക്കാദമിയിലെ പരിശീലനത്തിന്റെ ഭാഗമായിരിക്കും. ജർമൻ കോച്ചിംഗ് കോഴ്സുകളും ഏഷ്യൻ ഫുട്ബോൾ കോൺഫെഡറേഷൻ ലൈസൻസുകളും ഓൾ ഇന്ത്യ ഫുട്ബോൾ ഫെഡറേഷൻ ലൈസൻസുകളും, ഫുട്സാൽ ലൈസൻസ് നേടിയ പരിശീലകരും ആയിരിക്കും അക്കാഡമിയിൽ കുട്ടികൾക്ക് പരിശീലനം നൽകുന്നത്.
അക്കാദമി പ്രവർത്തനം ആരംഭിക്കുന്നതോടെ എറണാകുളം ജില്ലയിലെ തന്നെ ആധുനിക സൗകര്യങ്ങളോടുകൂടിയ ഏറ്റവും വലിയ അക്കാദമി ആയിരിക്കും കോതമംഗലം മാർ അത്തനേഷ്യസ് ഫുട്ബോൾ സ്കൂൾ. കഴിവുള്ള താരങ്ങൾക്ക് സ്കോളർഷിപ്പ് നൽകി പരിശീലനം ചെയ്യുന്നതിന് ആവശ്യമായ സൗകര്യങ്ങൾ ചെയ്തു കൊടുക്കുക എന്നൊരു ലക്ഷ്യം കൂടി അക്കാദമി മുന്നോട്ടുവയ്ക്കുന്നു. എല്ലാവിധ സൗകര്യങ്ങളും സ്വന്തമായുള്ള കേരളത്തിലെ തന്നെ മികച്ച അക്കാദമി ആയിരിക്കും കോതമംഗലം എം. എ. യുടേത്.
