*കോതംഗലം*: ആഗോള സർവ്വ മത തീർത്ഥാടന കേന്ദ്രമായ കോതമംഗലം മാർ തോമ ചെറിയ പള്ളിയിൽ കബറടങ്ങിയിരിക്കുന്ന മഹാ പരിശുദ്ധനായ യൽ ദോ മാർ ബസേലിയോസ് ബാവായുടെ 337 – )o ഓർമ്മപ്പെരുന്നാൾ സമാപിച്ചു. പത്ത് ദിവസം നീണ്ടു നിന്ന പെരുന്നാളിൽ ലക്ഷക്കണക്കിന് തീർത്ഥാടകർ പരിശുദ്ധ ബാവായുടെ കബർ വണങ്ങി അനുഗ്രഹം പ്രാപിച്ചു. പരി.ബസേലിയോസ് ബാവ ഭാരതത്തിൽ കപ്പലിറങ്ങിയ തലശ്ശേരിയിൽ നിന്നും 2022 സെപ്തംബർ 22 ന് ആരംഭിച്ച പതാക ഘോഷയാത്ര കണ്ണൂർ, കോഴിക്കോട്, മലപ്പുറം തൃശൂർ, എറണാകുളം ജില്ലകളിലെ വിവിധ ദൈവാലയങ്ങളിൽ നിന്നും ജനപ്രതിനിധികളിൽ നിന്നും ഉജ്ജ്വലമായ സ്വീകരണങ്ങൾ ഏറ്റുവാങ്ങി 23 ന് വൈകിട്ട് 5 മണിക്ക് കോതമംഗലം പള്ളിയിൽ എത്തിച്ചേർന്നു. സെപ്തംബർ മാസം 24 ന് പരി.ബസേലിയോസ് ബാവ മലങ്കരയിൽ ആദ്യമായി വി. ബലിയർപ്പിച്ച പള്ളിവാസലിൽ നിന്നും ആരംഭിച്ച ഛായചിത്ര ഘോഷയാത്ര ഇടുക്കി ജില്ലയിലെ വിവിധ കേന്ദ്രങ്ങളിലെ സ്വീകരണങ്ങൾ ഏറ്റ് വാങ്ങി വൈകിട്ട് 5 മണിക്ക് കോതമംഗലത്ത് പരി. ബാവായുടെ കബറിങ്കൽ എത്തി. സെപ്തംബർ 25 ഞായറാഴ്ച 4 മണിക്ക് പരിശുദ്ധ ബാവായുടെ തൃപ്പാദസ്പർശനത്താലും തിരുശേഷിപ്പിനാലും അനുഗ്രഹീതവും പരിശുദ്ധന്റെ തൃക്കരങ്ങളാൽ അത്ഭുതം പ്രവർത്തിച്ചതുമായ കോഴിപ്പിള്ളി ചക്കാലക്കുടിയിലുള്ള വി. യൽദോ മോർ ബസേലിയോസ് ചാപ്പലിൽ ധൂപ പ്രാർത്ഥനയ്ക്കു ശേഷം പ്രദക്ഷിണമായി പള്ളിയിലെത്തി പരിശുദ്ധ ബാവായുടെ കബറിങ്കൽ ധൂപ പ്രാർത്ഥനയ്ക്കു ശേഷം കൃത്യം 5 മണിക്ക് പള്ളി വികാരി ഫാ.ജോസ് പരത്തുവയലിൽ പെരുന്നാൾ കൊടികയറ്റി. ശ്രേഷ്ഠ കാതോലിക്ക ആബൂൻ മോർ ബസേലിയോസ് തോമസ് പ്രഥമൻ ബാവായുടെ മഹനീയ കാർമ്മികത്വത്തിലും കോതമംഗലം മേഖലാധിപൻ അഭി.ഏലിയാസ് മോർ യൂലിയോസ് മെത്രാപ്പോലീത്തായുടേയും പരി . സഭയിലെ അഭിവന്ദ്യ പിതാക്കന്മാരായ ഡോ. എബ്രാഹാം മോർ സേവേറിയോസ് , മാത്യൂസ് മോർ ഈവാനിയോസ്, മാത്യൂസ് മോർ അപ്രേം, ഏലിയാസ് മോർ അത്താനാസിയോസ്, മർക്കോസ് മോർ ക്രിസോസ്റ്റമോസ്, മാത്യൂസ് മോർ അന്തീമോസ്, പരി. പാത്രിയാർക്കീസ് ബാവായുടെ മലങ്കര കാര്യ സെക്രട്ടറി അഭി. മർക്കോസ് മോർ ക്രിസ്റ്റോഫോറസ് എന്നീ മെത്രാപ്പോലീത്തന്മാരുടെ സഹകാർമ്മികത്വത്തിലും പെരുന്നാൾ ചടങ്ങുകൾ അനുഗ്രഹകരമായി നടത്തപ്പെട്ടു. വന്ദ്യരായ കോർ എപ്പിസ്കോപ്പന്മാർ, റമ്പാൻമാർ , വൈദീകർ, ശെമ്മാശന്മാർ, ശുശ്രൂഷകർ , സിസ്സ്റ്റേഴ്സ് എന്നിവർ പെരുന്നാൾ ശുശ്രൂഷകളിൽ ആദിയോടന്തം പങ്കെടുത്തു.
ഇടുക്കി എം.പി. ഡീൻ കുര്യാക്കോസ്, കോതമംഗലം എം.എൽ.എ. ആന്റണി ജോൺ , മുവാറ്റുപുഴ എം.എൽ.എ.മാത്യു കുഴൽനാടൻ, പെരുമ്പാവൂർ എം.എൽ.എ.എൽദോസ് കുന്നപ്പിള്ളി, ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ്, ബ്ലോക്ക് പഞ്ചായത്ത് പ്രസിഡന്റ് പി.എ.എം.ബഷീർ, മുനിസിപ്പൽ ചെയർമാൻ കെ.കെ. ടോമി, പ്രതിപക്ഷ നേതാവ് എ.ജി.ജോർജ്ജ്, മതമൈത്രി സംരക്ഷണ സമിതി കൺവീനർ കെ.എ നൗഷാദ്, മുനിസിപ്പൽ കൗൺസിലർമാർ , വിവിധ ഗ്രാമ പഞ്ചായത്ത് പ്രസിഡന്റുമാർ, മെമ്പർമാർ , എഫ്.ഐ.റ്റി. ചെയർമാൻ ആർ.അനിൽകുമാർ , മത സാമൂഹിക രാഷ്ട്രീയ മേഖലയിലെ പ്രമുഖരായ വ്യക്തിത്വങ്ങൾ പെരുന്നാളിൽ വന്ന് സംബന്ധിച്ചു.
കോതമംഗലം തഹസീൽദാർ റെയ്ചൽ കെ. വർഗീസ്, മുവാറ്റുപുഴ ഡി .വൈ .എസ് .പി , കോതമംഗലം സർക്കിൾ ഇൻസ്പെക്ടർ , സബ്ബ് ഇൻസ്പെക്ടർമാർ , പോലീസ് സേനാംഗങ്ങൾ, ട്രാഫിക് പോലീസ് ഉദ്യോഗസ്ഥർ, അഗ്നിശമന സേനാംഗങ്ങൾ, പൊതുമരാമത്ത് വകുപ്പ്, ആരോഗ്യ വകുപ്പ്, എക്സൈസ് വകുപ്പ്, കെ.സ്.ആർ.ടി.സി, കെ.സ്.ഇ.ബി, കോതമംഗലം വില്ലേജ് ഓഫീസർ , ഹെൽത്ത് ഇൻസ്പെക്ടർമാർ മുതലായ സർക്കാർ ഉദ്യോഗസ്ഥർ പെരുന്നാൾ പ്രവർത്തനങ്ങൾ ഏകോപിക്കുവാൻ നേതൃത്വം നൽകി.
കോതമംഗലം പ്രൈവറ്റ് ബസ് ഓപ്പറേറ്റേഴ്സ് അസ്സോസിയേഷൻ, ബസ് ജീവനക്കാർ, മർച്ചന്റ് അസ്സോസിയേഷൻ നേതാക്കൾ, വ്യാപാരികൾ, വിവിധ സ്ഥലങ്ങളിൽ നിന്നും വന്ന തീർത്ഥയാത്ര സംഘങ്ങൾ, വാദ്യമേളക്കാർ , ശബ്ദവും വെളിച്ചവും ക്രമീകരിച്ചവർ, മനോഹരമായ വൈദ്യുത ദീപാലങ്കാരങ്ങൾ ചെയ്തവർ എന്നിവരെല്ലാം പെരുന്നാൾ ചടങ്ങുകൾക്ക് മോടി കൂട്ടുവാൻ ആത്മാർത്ഥമായി പ്രവർത്തിച്ചു.
പള്ളിയും പരിസരവും വൃത്തിയായി സൂക്ഷിക്കുവാൻ അക്ഷീണ പ്രയത്നം നടത്തിയ ശുചിത്വ മിഷൻ, ഹരിതകർമ്മസേനാംഗങ്ങൾ, എംബിറ്റ്സ് എൻജിനീയറിംഗ് കോളേജിലെ എൻ.എസ്.എസ് വോളണ്ടിയർമാർ , വന്നു കൂടിയ തീർത്ഥാടക ലക്ഷങ്ങൾക്ക് രണ്ട് ദിവസങ്ങളിലായി സമൃദ്ധമായി ഭക്ഷണം ഉണ്ടാക്കി നൽകിയ അടിമാലി ഡിലൈറ്റ് ഏജൻസി , ഭക്ഷണം വിളമ്പി നൽകാൻ നേതൃത്വം നൽകിയ സന്നദ്ധ പ്രവർത്തകർ, എം.ബി.എം.എം ആശുപത്രി, ഡെന്റൽ കോളേജ്, എംബിറ്റ്സ് എൻജിനീയറിംഗ് കോളേജ്, നഴ്സിംഗ് കോളേജ്, നഴ്സിംഗ് സ്കൂൾ , മാർ ബേസിൽ ഹയർ സെക്കണ്ടറി സ്കൂൾ , സെന്റ്.മേരീസ് പബ്ലിക് സ്കൂൾ എന്നിവിടങ്ങളിലെ ജീവനക്കാർ എന്നിവരുടെ കൂട്ടായ പ്രവർത്തനങ്ങൾ പെരുന്നാൾ ക്രമമായും ഭംഗിയായി നടത്തുവാൻ വളരെയധികം സഹായിച്ചു. ഒക്ടോബർ 2, 3 തീയതികളിൽ 101 പൊൻ വെള്ളിക്കുരിശുകളുടെ അകമ്പടിയോടെ നടത്തപ്പെട്ട പ്രദക്ഷിണം നയനാനന്ദകരമായിരുന്നു. 337 വർഷങ്ങൾക്ക് മുൻപ് തന്റെ പൂർവ്വികർ ചക്കാലക്കുടിയിൽ നിന്നും പകൽവിളക്കിന്റെ അകമ്പടിയോടെ പരിശുദ്ധ ബാവയെ ചെറിയ പള്ളിയിലേക്ക് ആനയിച്ചതിന്റെ പൂർവ്വിക സ്മരണയെ പുതുക്കിക്കൊണ്ട് ചക്കാലനായരുടെ പിൻമുറക്കാരൻ സുരേഷ് കോൽ വിളക്കേന്തി പ്രദക്ഷിണത്തിന് അകമ്പടി സേവിച്ചു. ഒക്ടോബർ 4 ന് പതിവു പോലെ കബർ വണങ്ങാൻ കരിവീരന്മാർ എത്തി. പള്ളിക്കാര്യത്തിൽ നിന്നും പഴവും ശർക്കരയും നൽകി ഗജവീരന്മാരെ സ്വീകരിച്ചു. വൈകിട്ട് 4 മണിക്ക് കൊടിയിറങ്ങിയതോടു കൂടി പെരുന്നാൾ ചടങ്ങുകൾ സമാപിച്ചു.