കോതമംഗലം: പാതിവില തട്ടിപ്പില്‍ കബളിപ്പിക്കപ്പെട്ടവര്‍ കോതമംഗലത്ത് ഇടനിലക്കാരായി പ്രവര്‍ത്തിച്ച അക്കോവ എജന്‍സി ഓഫീസില്‍ പണം ചോദിച്ചെത്തി ബഹളം വച്ച് പ്രതിഷേധിച്ചു. ജില്ലയുടെ വിവിധ ഭാഗങ്ങളില്‍നിന്ന് ജനപ്രതിനിധികളടക്കം അന്പതോളം സ്ത്രീ പുരുഷന്‍മാരാണെത്തിയത്. വിമലഗിരി സ്‌കൂളിന് സമീപം അക്കോവ ഓഫീസിന് മുന്നിലാണ് സ്ത്രീകള്‍ ഉള്‍പ്പെടെയുള്ളവര്‍ എത്തി അടച്ച പണം തിരികെ തരണമെന്ന് ആവശ്യപ്പെട്ടത്. സ്ഥാപനത്തിന്റെ ഉത്തരവാദിത്വപ്പെട്ടവര്‍ സ്ഥലത്ത് ഉണ്ടായിരുന്നില്ല. പ്രതിഷേധവുമായെത്തിയവര്‍ തടഞ്ഞുവച്ച ജീവനക്കാരനെ പോലീസ് എത്തിയാണ് മോചിപ്പിച്ചത്. അനന്തു കൃഷ്ണന്റെ തട്ടിപ്പ് പദ്ധതിയിലേക്ക് അക്കോവ വഴി 525 പേര്‍ പാതി വിലക്ക് സ്‌കൂട്ടര്‍ വാങ്ങാന്‍ പണം അടച്ചിട്ടുണ്ടെന്ന് പോലീസ് പറഞ്ഞു. മൂന്ന് കോടിയോളം രൂപയുടെ ഇടപാട് നടന്നതായാണ് നിഗമനം. ഏതാനും പേര്‍ക്ക് സ്‌കൂട്ടര്‍ നല്‍കുകയും ചെയ്തിരുന്നു. പണം നല്‍കിയവരുടെ പരാതി പ്രകാരം അക്കോവയുടെ മേധാവി വി. സജികുമാറിനെതിരെ കോതമംഗലം പോലീസ് മൂന്ന് കേസ് രജിസ്റ്റര്‍ ചെയ്തിട്ടുണ്ട്. അനന്തുകൃഷ്ണനെതിരെ വി. സജികുമാറും പോലിസില്‍ പരാതി നല്‍കിയിട്ടുണ്ട്. കേസുകള്‍ ക്രൈംബ്രാഞ്ചിന് കൈമാറിയെന്ന് പോലീസ് പറഞ്ഞു. അക്കോവയ്ക്ക് പുറമെ മറ്റ് മൂന്ന് എജന്‍സികള്‍ കൂടി കോതമംഗലത്ത് അനന്തുകൃഷ്ണന് പണം കൈമാറിയിട്ടുണ്ട്. ഇവരുടെ ഓഫീസുകളിലും തട്ടിപ്പിന് ഇരയായവര്‍ പണം ചോദിച്ച് ബഹളം ഉണ്ടാക്കുന്നുണ്ട്. ഈ ഏജന്‍സികളും അനന്തുകൃഷ്ണനെതിരെ പോലീസിനെ സമീപിച്ചിരുന്നു. ഇതിന് പുറമെ ഗുണഭോക്താക്കള്‍ നേരിട്ട് 60 ഓളം പരാതികളും നല്‍കിയിട്ടുണ്ട്. കോതമംഗലത്ത് 2500 ഓളം പേര്‍ കബളിപ്പിക്കപ്പെട്ടിട്ടുള്ളതായി പോലിസ് പറഞ്ഞു.
