തിരുവനന്തപുരം / പെരുമ്പാവൂർ :അങ്കമാലി ശബരി റെയിൽവേ പdദ്ധതി അനിശ്ചിതമായി നീളുന്നത് മൂലം പൊതുജനങ്ങൾക്ക് ഉണ്ടാകുന്ന ബുദ്ധിമുട്ടുകളെ കുറിച്ചും , കേരളത്തിൻറെ പ്രതീക്ഷകൾ വിഫലമാകുന്നതിനെ കുറിച്ചും , റെയിൽവേ പദ്ധതി വേഗത്തിൽ കൊണ്ടുവരേണ്ടതിന്റെ ആവശ്യകതയിലേക്കും വസ്തുതകൾ അക്കമിട്ടു നിരത്തി എൽദോസ് കുന്നപ്പള്ളി എംഎൽഎ നിയമസഭയിൽ ശബരി റെയിൽവേയുടെ പൂർത്തീകരണം ആവശ്യപ്പെട്ടു .
കാൽ നൂറ്റാണ്ടിലേറെയായി കേരളം പ്രതീക്ഷയോടെ കാത്തിരിക്കുന്ന പദ്ധതിയാണ് ശബരി റെയിൽപാത .ഈ പദ്ധതി നടപ്പിലാക്കാൻ കഴിയാത്തത് പൊതുവേ സംസ്ഥാനത്തിന് അപമാനവും , വികസന വഴിയിലൂടെയുള്ള സംസ്ഥാനത്തിന്റെ മുന്നേറ്റത്തിനേറ്റ ഏറ്റവും കനത്ത പ്രഹരവുമാണ് .
നിലവിൽ 264 കോടി രൂപയുടെ നികുതിപ്പണം ഉപയോഗിച്ച് എട്ടു കിലോമീറ്റർ റെയിൽവേ പാതയും കാലടി റെയിൽവേ സ്റ്റേഷനും ഒരു കിലോമീറ്റർ ദൈർഘ്യത്തിൽ പെരിയാറിനു കുറുകെ റെയിൽവേ പാലവും നിർമ്മിച്ചു കഴിഞ്ഞതാണ് . ഇന്ന്
സ്റ്റേഷനും , പാലവും സാമൂഹ്യ വിരുദ്ധരുടെ താവളമായി മാറിയിരിക്കുകയാണെന്ന് എംഎൽഎ പറഞ്ഞു .ഈ പദ്ധതിയിലൂടെ കേരളത്തിന് പുതിയതായി 14 റെയിൽവേ സ്റ്റേഷനുകളും , ഇടുക്കി ജില്ലയ്ക്ക് റെയിൽവേ കണക്ടിവിറ്റിയും , ലഭ്യമാക്കുന്നതുമായ അങ്കമാലി ശബരി റെയിൽവേ തിരുവനന്തപുരത്തിനുള്ള സമാന്തര റെയിൽവേയായി വികസിപ്പിക്കാനാകുന്നതും, എറണാകുളം , ഇടുക്കി ,കോട്ടയം , പത്തനംതിട്ട , കൊല്ലം , തിരുവനന്തപുരം എന്നീ ജില്ലകളിലെ ഗതാഗത സൗകര്യങ്ങളിൽ വൻ വികസനം സാധ്യമാക്കുന്നതുമായ ,തും ,വിഴിഞ്ഞം തുറമുഖം വരെ നീട്ടാവുന്നതുമായ പദ്ധതിയാണ് . പെരുമ്പാവൂരിലെ 540 പ്ലൈവുഡ് വ്യവസായിക യൂണിറ്റുകൾക്കും , കോതമംഗലം നെല്ലിക്കുഴിയിലെ ഇന്ത്യയിലെ ഏറ്റവും വലിയ ഫർണിച്ചർ നിർമ്മാണ ക്ലസ്റ്ററിനും , മൂവാറ്റുപുഴ നെല്ലാടിലെ ഫുഡ് പാർക്കിനും, കേരളത്തിൽ ഉപയോഗിക്കുന്ന അരിയുടെ 80 ശതമാനവും സംസ്കരിക്കുന്ന കാലടിയിലെ അരിമില്ലുകൾക്കും , തൊടുപുഴയിലെ കിൻഫ്ര സ്പൈസസ് പാർക്കിനും , റെയിൽവേ സൗകര്യം ലഭ്യമാകുന്നതും , പൈനാപ്പിൾ , ഏലം , കുരുമുളക് , റബർ തുടങ്ങിയ കാർഷിക ഉൽപ്പന്നങ്ങൾ റോ റോ സർവീസിലൂടെ കയറ്റുമതി ചെയ്യുവാനും , അങ്കമാലി – ശബരി റെയിൽവേ പദ്ധതി സഹായകരമാണ് . പെരുമ്പാവൂരിൽ നിന്ന് ശരാശരി 500 ട്രക്ക് പ്ലൈവുഡും , ഇന്ത്യയുടെ പൈനാപ്പിൾ സിറ്റി ആയ വാഴക്കുളത്ത് നിന്ന് ശരാശരി 250 ട്രക്ക് പൈനാപ്പിളും , ദിനംപ്രതി ദേശീയ അന്തർദേശീയ മാർക്കറ്റുകളിലേക്ക് നിലവിൽ ബുദ്ധിമുട്ടി കയറ്റി അയക്കുന്നത് ഈ ശബരീ പാതയിലൂടെയായാൽ അത് കർഷകർക്ക് വളരെ സഹായകരമാകും .
25 വർഷമായി പുതിയ ഒരു റെയിൽവേ ലൈൻ പോലും നിർമിക്കാത്ത ഏക ദക്ഷിണേന്ത്യൻ സംസ്ഥാനമാണ് കേരളം . അങ്കമാലി – ശബരി റെയിൽവേ പാതയുടെ നിർമ്മാണ ചിലവ് പങ്കിടാൻ 7 /1/ 2021 ൽ സംസ്ഥാന സർക്കാർ ഉത്തരവ് പുറപ്പെടുവിച്ചിട്ടുണ്ട് . കൂടാതെ പുതുക്കിയ എസ്റ്റിമേറ്റ് റെയിൽവേയ്ക്ക് സമർപ്പിച്ച ശേഷം 23/3 2023 ല്‍ ബഹുമാനപ്പെട്ട മുഖ്യമന്ത്രി കേന്ദ്ര റെയിൽവേ മന്ത്രിക്ക് അങ്കമാലി ശബരി റെയിൽവേയുടെ നിർമ്മാണ ചെലവ് പങ്കിടുന്നത് സംബന്ധിച്ച റീഷുറൻസ് നൽകിയിട്ടുള്ളതാണ് സംസ്ഥാന ബജറ്റിൽ നിന്ന് വർഷം 400 കോടി രൂപ വച്ച് അഞ്ചുവർഷത്തേക്ക് അനുവദിച്ചോ , കൊങ്കൺ റെയിൽവേ പദ്ധതിക്ക് വേണ്ടി കേന്ദ്ര-സംസ്ഥാന സർക്കാരുകളുടെ SPV (കൊങ്കൺ റെയിൽവേ കോർപ്പറേഷൻ ) വിദേശ ധനകാര്യ സ്ഥാപനങ്ങളിൽ നിന്ന് ലോൺ എടുത്തത് പോലെ കെ ആർ ഡി സി എൽ വഴി ലോണെടുത്തോ , അങ്കമാലി ശബരി റെയിൽവേയ്ക്ക് വേണ്ടി ഫണ്ട് കണ്ടെത്താവുന്നതാണ് എന്ന് എംഎൽഎ സഭയിൽ പറഞ്ഞു .
അങ്കമാലി മുതൽ രാമപുരം വരെ 72 കിലോമീറ്റർ ദൂരത്തിൽ പദ്ധതിക്ക് വേണ്ടി റവന്യൂ വകുപ്പും റെയിൽവേയും ചേർന്ന് 2002ൽ കല്ലിട്ട് തിരിച്ചിട്ടുള്ളതാണ് . കല്ലിട്ട് തിരിച്ച സ്ഥലങ്ങൾ ആരും വാങ്ങാൻ പോലും കഴിയാതെയും , ഈടുവെച്ച് വായ്പ എടുക്കാൻ കഴിയാതെയും ,പുതിയ വീടുകൾ വയ്ക്കാൻ കഴിയാതെയും , സ്ഥലമുടമകൾ വലിയ പ്രതിസന്ധിയിലാണ് .
ആയതിനാൽ KRDSL തയ്യാറാക്കിയ അങ്കമാലി – ശബരി റെയിൽവേയുടെ പുതിയ എസ്റ്റിമേറ്റ് സംസ്ഥാന സർക്കാരിൻ്റെ കോംപിറ്റൻ്റ് അതോറിറ്റി അംഗീകരിക്കണമെന്നും , നിർമ്മാണ ചിലവ് പങ്കിടുന്നത് സംബന്ധിച്ച് റെയിൽവേയ്ക്ക് റീ അഷ്യുറൻസ് കത്ത് നൽകണമെന്നും ,എൽദോസ് കുന്നപ്പള്ളി എംഎൽഎ നിയമസഭയിൽ ആവശ്യപ്പെട്ടു . മുൻ മൂവാറ്റുപുഴ എംഎൽഎ ബാബു പോൾ കൺവീനർ ആയിട്ടുള്ള ഭരണപക്ഷത്തും പ്രതിപക്ഷത്തുമുള്ള ഇപ്പോഴത്തെയും മുൻപത്തെയും എംപിമാരും എംഎൽഎമാരും ഉൾപ്പെട്ട ശബരിപാത കടന്നുപോകുന്ന മുഴുവൻ സ്ഥലത്തെയും ജനപ്രതിനിധികൾ ഉൾപ്പെട്ട ശബരി റെയിൽവേ ആക്ഷൻ കൗൺസിലുകളുടെ ആവശ്യം എന്ന നിലയിൽ ഇക്കാര്യത്തിൽ ഉടൻ നടപടി സ്വീകരിച്ച് സഹായിക്കണമെന്ന് ഗവൺമെന്റിനോട് ശ്രദ്ധ ക്ഷണിക്കലിലൂടെ എൽദോസ് കുന്നപ്പള്ളി എംഎൽഎ അഭ്യർത്ഥിച്ചു .
