പെരുമ്പാവൂർ : മണ്ഡലത്തിലെ പ്രധാനപ്പെട്ട 7 ആരാധനാലയങ്ങളുടെ അടിസ്ഥാന സൗകര്യങ്ങൾ വികസിപ്പിക്കുന്നതിനായി എൽദോസ് കുന്നപ്പിള്ളി എംഎൽഎ നിർദ്ദേശിച്ച ആരാധനാലയങ്ങളിൽ ടൂറിസം വകുപ്പ് ഉദ്യോഗസ്ഥരും പദ്ധതിയുടെ എസ്റ്റിമേറ്റ് തയ്യാറാക്കുന്ന അജിത് അസോസിയേറ്റ്സും എം.എൽ.എയുടെ നേതൃത്വത്തിൽ സന്ദർശനം നടത്തി. മണ്ഡലത്തിലെ 7 ആരാധനാലയങ്ങളാണ് പദ്ധതിക്കായി നിർദ്ദേശിച്ചത്. കേന്ദ്ര സർക്കാരിന്റെ പ്രസാദ്, സ്വദേശി ദർശൻ പദ്ധതികളിലേക്ക് സമർപ്പിക്കുന്നതിനുള്ള വിശദമായ റിപ്പോർട്ട് തയ്യാറാക്കുന്നത് മുന്നോടിയായാണ് ജനപ്രതിനിധിയും ഉദ്യോഗസ്ഥരും സന്ദർശനം നടത്തിയത്. ഇതിന് ശേഷം പദ്ധതിക്ക് ആവശ്യമായ എസ്റ്റിമേറ്റ് തയ്യാറാക്കി കേന്ദ്ര സർക്കാരിന് സമർപ്പിക്കും. കേന്ദ്ര സർക്കാർ പദ്ധതികൾ ആയത് കൊണ്ട് സംസ്ഥാന ടൂറിസം വകുപ്പ് മുഖേനയാണ് പദ്ധതി സമർപ്പിക്കേണ്ടത്.
മണ്ഡലത്തിലെ പ്രധാനപ്പെട്ട 7 ആരാധനാലയങ്ങളുടെ ഭൗതിക സാഹചര്യങ്ങൾ ലോക നിലവാരത്തിലേക്ക് ഉയർത്തുന്നതിനാണ് പദ്ധതി തയ്യാറാക്കിയത്. 900 വർഷം പഴക്കമുള്ള സൗത്ത് വല്ലം ജുമാ മസ്ജിദ്, കല്ലിൽ ക്ഷേത്രം, ചുവർ ചിത്രങ്ങൾ കൊണ്ട് സമ്പന്നമായ വല്ലം സെന്റ് തെരാസസ് ഫൊറോനാ ചർച്ച്, ഇരിങ്ങോൾ കാവ്, കുറുപ്പംപടി സെന്റ് മേരീസ് കത്തീഡ്രൽ, ചേലാമറ്റം ശ്രീകൃഷ്ണ സ്വാമി ക്ഷേത്രം, കീഴില്ലം ശ്രീ മഹാദേവ ക്ഷേത്രം എന്നീ ആരാധനലയങ്ങളാണ് പദ്ധതിയിലേക്ക് എം.എൽ.എ നിർദ്ദേശിച്ചത്.
പ്രധാനപ്പെട്ട ഹിന്ദു ക്ഷേത്രങ്ങള്, ക്രൈസ്തവ ദേവാലയങ്ങള്, മുസ്ലിം ആരാധനാലയങ്ങൾ എന്നിവയ്ക്ക് ചുറ്റുമുള്ള പ്രദേശങ്ങളില് തീര്ഥാടകര്ക്കും വിനോദസഞ്ചാരികള്ക്കുമായി അടിസ്ഥാന സൗകര്യങ്ങള് ഒരുക്കുകയെന്നതാണ് പദ്ധതികളുടെ ലക്ഷ്യം. അദ്ധ്യാത്മക തീർത്ഥാടനത്തെ ശക്തിപ്പെടുത്തുക എന്ന ലക്ഷ്യത്തോടെയാണ് പദ്ധതിക്ക് തുടക്കം കുറിച്ചത്. തീർത്ഥാടകർക്കുള്ള പ്രാഥമിക സൗകര്യങ്ങളോരുക്കുക, ഭക്ഷണം, താമസം തുടങ്ങിയവക്കുള്ള സൗകര്യങ്ങൾ ഒരുക്കുക, കമ്യൂണിറ്റി ഹാൾ, വിവിധോദ്ദേശ്യഹാൾ, ശൗചാലയങ്ങൾ, പാർക്കിങ് സ്ഥലം, സൗന്ദര്യവൽക്കരണം തുടങ്ങിയ പ്രവർത്തനങ്ങൾക്കാണ് പണം അനുവദിക്കുന്നത്.
