NEWS

മികവിന്റെ കേന്ദ്രങ്ങളായി തിരഞ്ഞെടുത്തിട്ടുള്ള കോതമംഗലം മണ്ഡലത്തിലെ വിവിധ സ്കൂളുകളുടെ നിർമ്മാണ പ്രവർത്തനങ്ങളുമായി ബന്ധപ്പെട്ട അവലോകന യോഗം ചേർന്നു: ആന്റണി ജോൺ എംഎൽഎ.

Published

3 years ago

January 17, 2020

kothamangalamnews.com

കോതമംഗലം: പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി മികവിന്റെ കേന്ദ്രങ്ങളായി തിരഞ്ഞെടുത്തിട്ടുള്ള കോതമംഗലം മണ്ഡലത്തിലെ വിവിധ സ്കൂളുകളുടെ നിർമ്മാണ പുരോഗതിയുമായി ബന്ധപ്പെട്ട് ഉന്നത തല അവലോകന യോഗം ആന്റണി ജോൺ എംഎൽഎയുടെ അധ്യക്ഷതയിൽ കോതമംഗലം പി ഡബ്ല്യൂ ഡി റസ്റ്റ് ഹൗസിൽ ചേർന്നു. യോഗത്തിൽ ജില്ലാ പഞ്ചായത്ത് മെമ്പർ കെ എം പരീത്, പൊതു വിദ്യാഭ്യാസ സംരക്ഷണ യജ്ഞം ജില്ലാ കോ ഓർഡിനേറ്റർ ജോർജ് ബാസ്റ്റിൻ, അസിസ്റ്റന്റ് എക്സിക്യൂട്ടീവ് എഞ്ചിനീയർ ധന്യ ജനാർദ്ദനൻ, അസിസ്റ്റന്റ് എഞ്ചിനീയർമാരായ ലാലു ഇ ബി,ആൻഡ്രൂ ഫ്രാൻസിസ്,ദിനേശ് റ്റി എം,ബ്ലോക്ക് പ്രോഗ്രാമിങ്ങ് ഓഫീസർ എസ് എം അലിയാർ,ഹെഡ്മാസ്റ്റർമാരായ മൈമൂന കെ,പി അലിയാർ,വർഗീസ് മാത്യൂ,പി റ്റി എ പ്രസിഡന്റുമാരായ കെ എം കെരീം,സലാം കാവാട്ട്,കൈറ്റ്,വാസ്കോസ് ഏജൻസികളുടെ പ്രതിനിധികൾ,കോൺട്രാക്ടറുമാർ തുടങ്ങിയവർ പങ്കെടുത്തു.

പൊതു വിദ്യാഭ്യാസം മെച്ചപ്പെടുത്തുന്നതിന്റെ ഭാഗമായി കോതമംഗലം മണ്ഡലത്തിലെ തെരഞ്ഞെടുത്ത സ്കൂളുകളിൽ വിവിധ സ്കീമുകളിലായി നടന്നു വരുന്ന നിർമ്മാണ പ്രവർത്തനങ്ങൾ യോഗം വിലയിരുത്തി. മികവിന്റെ കേന്ദ്രം പദ്ധതിയിൽ ഉൾപ്പെടുത്തി 5 കോടി രൂപ അനുവദിച്ചിട്ടുള്ള ചെറുവട്ടൂർ മോഡൽ ഗവൺമെന്റ് ഹയർ സെക്കന്ററി സ്കൂൾ, മികവിന്റെ കേന്ദ്രം പദ്ധതിയിൽ തന്നെ ഉൾപ്പെടുത്തി 3 കോടി രൂപ അനുവദിച്ചിട്ടുള്ള പല്ലാരിമംഗലം ഗവൺമെന്റ് വൊക്കേഷണൽ ഹയർ സെക്കന്ററി സ്കൂൾ,2.86 കോടി രൂപ അനുവദിച്ചിട്ടുള്ള ജി എച്ച് എസ് നെല്ലിക്കുഴി,പദ്ധതി ഇനത്തിൽ ഉൾപ്പെടുത്തി 1 കോടി അനുവദിച്ചിട്ടുള്ള ജി എൽ പി എസ് ഇളങ്ങവം,കിഫ്ബി പശ്ചാത്തല വികസനത്തിൽ ഉൾപ്പെടുത്തി 1കോടി അനുവദിച്ചിട്ടുള്ള ജി വി എച്ച് എസ് എസ് നേര്യമംഗലം,1.5 കോടി രൂപ അനുവദിച്ചിട്ടുള്ള മാതിരപ്പിള്ളി ഗവൺമെന്റ് വൊക്കേഷണൽ ഹയർ സെക്കന്ററി സ്കൂൾ,86 ലക്ഷം രൂപ അനുവദിച്ചിട്ടുള്ള ജി എച്ച് എസ് പിണവുർകുടി,34 ലക്ഷം രൂപ അനുവദിച്ചിട്ടുള്ള ഗവൺമെന്റ് യു പി സ്കൂൾ തട്ടേക്കാട്,15 ലക്ഷം രൂപ അനുവദിച്ച കോഴിപ്പിളളി ഗവൺമെന്റ് എൽ പി എസ്,5 ലക്ഷം രൂപ അനുവദിച്ചിട്ടുള്ള ജി എച്ച് എസ് എസ് പൊയ്ക എന്നീ സ്കൂളുകളിലെ നിർമ്മാണ പ്രവർത്തനങ്ങളാണ് യോഗം വിലയിരുത്തിയത്.

പ്രസ്തുത സ്കൂളുകളിൽ നടന്നു വരുന്ന നിർമ്മാണ പ്രവർത്തനങ്ങൾ വേഗത്തിലാക്കുന്നതിനും മാർച്ച് മാസം 31-ാം തിയതിക്കു മുമ്പ് നിർമ്മാണ പ്രവർത്തനങ്ങൾ പൂർത്തീയാക്കുവാനും യോഗത്തിൽ ധാരണയായതായി ആന്റണി ജോൺ എംഎൽഎ അറിയിച്ചു.

NEWS

കെ – ഫോൺ പദ്ധതി : കോതമംഗലം മണ്ഡല തല ഉദ്ഘാടനം ജൂൺ 5 ന് മുഖ്യമന്ത്രി പിണറായി വിജയൻ നിർവ്വഹിക്കും: ആന്റണി ജോൺ എം എൽ എ

Published

1 day ago

June 2, 2023

kothamangalamnews.com

കോതമംഗലം :കെ – ഫോൺ പദ്ധതിയുടെ കോതമംഗലം മണ്ഡല തല ഉദ്ഘാടനം ജൂൺ 5 ന് മുഖ്യമന്ത്രി പിണറായി വിജയൻ നിർവ്വഹിക്കുമെന്ന് ആന്റണി ജോൺ എം എൽ എ അറിയിച്ചു. ജൂൺ 5 ന് 3 മണിക്ക് മാതിരപ്പള്ളി ഗവ.വൊക്കേഷണൽ ഹയർ സെക്കന്ററി സ്കൂളിൽ വച്ചാണ് മണ്ഡല തല ഉദ്ഘാടനം .

ഇന്റർനെറ്റ് ഒരു അവകാശമായി പ്രഖ്യാപിച്ച് കൊണ്ട് സാർവ്വത്രിക ഇന്റർനെറ്റ് ലഭ്യത ഉറപ്പ് വരുത്തുക എന്ന ലക്ഷ്യവുമായി സംസ്ഥാന സർക്കാർ വിഭാവനം ചെയ്തിട്ടുള്ള പദ്ധതിയാണ് കേരള ഫൈബർ ഒപ്റ്റിക് നെറ്റ് വർക്ക് (കെ-ഫോൺ ) . നാട്ടിൻപുറങ്ങളിൽ കുറഞ്ഞ ചെലവിൽ ഗുണമേന്മയുള്ള ഇന്റർനെറ്റ് കുറഞ്ഞ ചെലവിൽ എത്തിക്കുന്ന പദ്ധതിയുടെ ഭാഗമായി മണ്ഡലത്തിലെ 100 ബി പി എൽ കു ടുംബങ്ങൾക്ക് സൗജന്യമായി ഇന്റർനെറ് കണക്ഷൻ ഈ മാസം തന്നെ ലഭ്യമാക്കും. നിലവിൽ കോതമംഗലത്തെ വിവിധ സ്ഥാപനങ്ങളിലും, ഓഫീസുകളിലും സ്കൂളുകളിലുമായി 150 ഓളം കേന്ദ്രങ്ങളിൽ കെ. ഫോൺ സേവനം ലഭ്യമാകുന്നുണ്ട്. തുടർച്ചയിൽ കൂടുതൽ ബി പി എൽ കുടുംബങ്ങൾക്ക് സൗജന്യമായും , മറ്റുള്ളവർക്ക് കുറഞ്ഞ ചെലവിലും ഇന്റർനെറ്റ് കണക്ഷൻ ലഭ്യമാക്കുമെന്നും എം എൽ എ പറഞ്ഞു.

NEWS

കനിവ് ഭവനത്തിന്റെ താക്കോൽ കൈമാറി

Published

3 days ago

May 31, 2023

kothamangalamnews.com

കവളങ്ങാട്: സിപിഐ എം നേര്യമംഗലം ലോക്കൽ കമ്മിറ്റി നിർമിച്ച് നൽകിയ കനിവ് ഭവനത്തിൻ്റെ താക്കോൽ സംസ്ഥാന കമ്മിറ്റിയംഗം ഗോപി കോട്ടമുറിക്കൽ കുടുംബത്തിന് കൈമാറി. വാഹനാപകടത്തിൽ മരണപെട്ട സിപിഐ എം നേര്യമംഗലം ടൗൺ ബ്രാഞ്ചംഗം കിളിയേലിൽ സന്തോഷിൻ്റെ കുടുംബത്തിനാണ് വീട് നിർമിച്ചു നൽകിയത്. നേര്യമംഗലത്ത് നടന്ന ചടങ്ങിൽ ലോക്കൽ കമ്മിറ്റിയംഗം പി എം കണ്ണൻ അധ്യക്ഷനായി. സിപിഐ എം കവളങ്ങാട് ഏരിയാ സെക്രട്ടറി ഷാജി മുഹമ്മദ്, ആൻ്റണി ജോൺ എംഎൽഎ, സിപിഐ എം ലോക്കൽ സെക്രട്ടറി കെ ഇ ജോയി, ഏരിയാ കമ്മിറ്റിയംഗങ്ങളായ കെ ബി മുഹമ്മദ്‌, ഷിജോ അബ്രഹാം, അഭിലാഷ് രാജ്, എ കെ സിജു എന്നിവർ സംസാരിച്ചു.

NEWS

നെല്ലിക്കുഴി ഉപതിരഞ്ഞെടുപ്പിൽ അരുൺ സി ഗോവിന്ദ് വെന്നിക്കൊടി പാറിച്ചു ; തോൽവിയുടെ ഞെട്ടലിൽ ബിജെപി

Published

3 days ago

May 31, 2023

kothamangalamnews.com

നെല്ലിക്കുഴി : നെല്ലിക്കുഴി പഞ്ചായത്ത് തൃക്കാരിയൂർ ആറാം വാർഡ് ബിജെപിയുടെ സീറ്റ് എൽഡിഎഫ് പിടിച്ചെടുത്തു. 99 വോട്ടിൻ്റെ തകർപ്പൻ ഭൂരിപക്ഷത്തിനാണ് സിപിഐ എം സ്ഥാനാർത്ഥി അരുൺ സി ഗോവിന്ദ് വെന്നിക്കൊടി പാറിച്ചത്. കോൺഗ്രസ് മൂന്നാം സ്ഥാനത്തായി. ബിജെപി സ്ഥാനാർഥി ഉണ്ണികൃഷ്ണൻ മാങ്ങോടിനെ 99 വോട്ടുകൾക്കാണ് അരുൺ സി ഗോവിന്ദൻ പരാജയപ്പെടുത്തിയത്. തിരഞ്ഞെടുപ്പ് ഫലം പുറത്തുവന്നതോടെ നെല്ലിക്കുഴി പഞ്ചായത്തിലെ എൽഡിഎഫിന്റെ അംഗബലം 14 ആയി ഉയർന്നു. എൽഡിഎഫ്- 14, യുഡിഎഫ് -5, ബിജെപി – 2 എന്നിങ്ങനെയാണ് നിലവിലെ കക്ഷിനില.

ബിജെപിയുടെ സിറ്റിംഗ് സീറ്റായിരുന്ന ആറാം വാർഡിൽ കഴിഞ്ഞ തവണ സനൽ പുത്തൻപുരയ്ക്കൽ 190 വോട്ടുകൾക്കാണ് വിജയിച്ചത്. നെല്ലിക്കുഴി പഞ്ചായത്തിലെ ബിജെപിക്ക് കൂടുതൽ സ്വാധീനമുള്ള വാർഡുകളിൽ ഒന്നാണ് തുളുശ്ശേരിക്കവല ഉൾപ്പെടുന്ന ആറാം വാർഡ്. ബിജെപി തൃക്കാരിയൂർ മേഖല പ്രസിഡന്റും ജനകീയനുമായിരുന്ന ഉണ്ണികൃഷ്ണൻ മാങ്ങോടിന്റെ അപ്രതീക്ഷിത പരാജയത്തിന്റെ ഞെട്ടലിലാണ് ബിജെപി നേതൃത്വം.

തിരഞ്ഞെടുപ്പ് ഫലം;

വോട്ട് രേഖപ്പെടുത്തിയവർ: 1398

അരുൺ സി ഗോവിന്ദ്
(എൽഡിഎഫ്) : 640

ഉണ്ണികൃഷ്ണൻ മാങ്ങോട്
(ബിജെപി): 541

വിജിത്ത് വിജയൻ
(യുഡിഎഫ്): 217

ഭൂരിപക്ഷം: 99 (എൽഡിഎഫ്)