കോതമംഗലം :കഴിഞ്ഞ 10 വർഷത്തിൽ കോതമംഗലത്ത് സാധ്യമായത് വികസന വിപ്ലവമാണെന്ന് വ്യവസായ വകുപ്പ് മന്ത്രി പി. രാജീവ്. കോതമംഗലത്തെ അയ്യങ്കാവ് ഗവ. ഹൈസ്ക്കൂളിൽ സംസ്ഥാന സർക്കാരിന്റെ പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി മൂന്ന് കോടി രൂപ ചെലവിൽ പുതുതായി നിർമ്മിച്ച സ്മാർട്ട് സ്കൂൾ കെട്ടിടം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ചരിത്രത്തിൽ മുമ്പെങ്ങും ഇല്ലാത്ത വിധം കോതമംഗലത്തെ എല്ലാ മേഖലയിലും വികസന മുന്നേറ്റങ്ങൾ പ്രകടമാണ്. നമ്മുടെ സംസ്ഥാനത്ത് പൊതുവിദ്യാഭ്യാസ രംഗത്ത് വലിയ മാറ്റമാണ് കഴിഞ്ഞ വർഷങ്ങളിൽ സംഭവിച്ചത്. ആ മാറ്റത്തിന്റെ മറ്റൊരുദാഹരണമാണ് അയ്യങ്കാവ് സ്കൂളിലെ ഈ പുതിയ സ്മാർട്ട് കെട്ടിടവും ക്ലാസ് മുറികളുമെന്നും മന്ത്രി പറഞ്ഞു.
ചടങ്ങിൽ ആന്റണി ജോൺ എം.എൽ.എ അധ്യക്ഷനായി, കോതമംഗലം നഗരസഭാ ചെയർപേഴ്സൺ ഭാനുമതി രാജു മുഖ്യപ്രഭാഷണം നടത്തി.
പി.ടി.എ പ്രസിഡന്റ് എസ്.സതീഷ്, പ്രൊഫ. ബേബി എം. വർഗീസ്, എഫ്.ഐ.ടി ചെയർമാൻ ആർ. അനിൽ കുമാർ, പൊതുമരാമത്ത് സ്ഥിരം സമിതി ചെയർമാൻ ജോർജ് അമ്പാട്ട്, സ്കൂൾ ഹെഡ്മിസ്ട്രസ് ശാന്ത പി. അയ്യപ്പൻ, നഗരസഭാ കൗൺസിലർമാരായ അരുൺ പി. ബോബൻ, പി.ആര് ഉണ്ണികൃഷ്ണൻ, ആദർശ് കുര്യാക്കോസ്, സീത വിജയൻ, ജാൻസി മാത്യു, കുമാരി അശോകൻ, കുത്തുകുഴി സഹകരണ ബാങ്ക് പ്രസിഡന്റ് കെ.കെ വർഗീസ്, മുൻ ബാങ്ക് പ്രസിഡന്റ് അഡ്വ. വി.എം ബിജു കുമാർ, മുൻ കൗൺസിലർ വിദ്യ പ്രസന്നൻ, കുത്തുകുഴി യുവജന സമാജം ഗ്രന്ഥശാല പ്രസിഡന്റ് കെ.പി മോഹനൻ, പൂർവ്വ വിദ്യാർത്ഥി പ്രതിനിധി എൻ.അജയകുമാർ, സ്കൂൾ മാനേജ്മെന്റ് കമ്മിറ്റി പ്രതിനിധികൾ, അധ്യാപകർ, തുടങ്ങിയവർ ചടങ്ങിൽ പങ്കെടുത്തു.
