ഡീൻ കുര്യാക്കോസ് എം പി ഇടപെട്ടു;നാട്ടുകാരുടെ വഴിയടച്ച് ദേശീയപാതയിൽ നവീകരണ പ്രവൃത്തികൾ നടത്തരുതെന്ന് പ്രോജക്ട് ഡയറക്ടർ പി.പ്രദീപ്കുമാർ

കോതമംഗലം : പ്രതിഷേധം ശക്തമായതോടെ ഡീൻ കുര്യാക്കോസ് എംപിയുടെ ഇടപെടലിനെ തുടർന്ന്നേര്യമംഗലം വില്ലാംചിറയിൽ നാട്ടുകാരുടെ വഴിയടച്ച്

ദേശീയപാതയിൽ നവീകരണ പ്രവൃത്തികൾ നടത്തരുതെന്ന് ദേശീയപാതാ അതോറിറ്റി പ്രോജക്ട് ഡയറക്ടർ പി. പ്രദീപ്കുമാർ കരാറുകാർക്ക് നിർദ്ദേശം നല്കി.വില്ലാംചിറയിൽ

25 കുടുംബങ്ങളുടെ വീട്ടിലേക്കുള്ള വഴിയടച്ചാണ് ദേശീയപാത നവീകരണ പ്രവൃത്തികൾ നടന്നു വരുന്നത്. കുടുംബങ്ങളുടെ സഞ്ചാര സ്വാതന്ത്ര്യം നിഷേധിക്കപ്പെട്ടതോടെ ഇവർ പ്രതിഷേധവുമായി രംഗത്ത് എത്തി.

75 വർഷത്തിൽ അധികമായി ഉപയോഗിച്ചിരുന്ന

വഴികളാണ് നിർമ്മാണ പ്രവൃത്തികളെ തുടർന്ന് അടഞ്ഞു പോയതെന്ന് നാട്ടുകാർ പറഞ്ഞു. വില്ലാഞ്ചിറയിൽ ഒരു വശം അഗാധമായ കൊക്കയാണ്.

നിലവിലെ ദേശീയ പാതയിൽ നിന്ന് ചരിവിലൂടെ മൂന്നിടത്തായി നിർമ്മിച്ചിരുന്ന മൺപാതയാണ് 25 കുടുംബങ്ങൾ ഇക്കാലമത്രയും സഞ്ചാരമാർഗ്ഗമായി ഉപയോഗിച്ചിരുന്നത്. ദേശീയ പാതയുടെ നവീകരണ പ്രവൃത്തികളുടെ ഭാഗമായി 50 അടിയോളം താഴ്ചയിൽ നിന്ന് കോൺക്രീറ്റ് ഭിത്തികൾ നിർമ്മിച്ചതോടെ കുടുംബങ്ങളുടെ സഞ്ചാര മാർഗ്ഗം അടഞ്ഞു പോകുകയായിരുന്നു. പ്രതിഷേധം ശക്തമായതോടെ

ജനപ്രതിനിധികളും പൊതുപ്രവർത്തകരും ഇടപെട്ട് കരാറുകാരുമായി നടത്തിയ

ചർച്ചയിൽ ഇവർക്കെല്ലാം റാമ്പ് കെട്ടി വഴി നൽകാമെന്ന് ഉറപ്പ് നല്കിയെങ്കിലും അത് പാലിച്ചില്ല. നിർമ്മാണ പ്രവൃത്തികളെ തുടർന്ന് ഇത്രയും കുടുംബങ്ങളുടെ കുടിവെള്ള വിതരണ പൈപ്പുകളും തകർന്നു. ഇതോടെ ഇവിടെ ശുദ്ധജല വിതരണവും മുടങ്ങി. ഇത് മനുഷ്യാവകാശ ലംഘനമാണെന്ന്

കുടുംബങ്ങൾ പറയുന്നു. പ്രതിഷേധം ശക്തമായതോടെ ഡീൻ കുര്യാക്കോസ് എം പി വിഷയത്തിൽ ഇടപെട്ടു. ഇതിനെ തുടർന്ന് ചൊവ്വാഴ്ച ദേശീയപാത അതോറിറ്റി പ്രോജക്ട് ഡയറക്ടർ പി. പ്രദീപ്കുമാർ, കരാർ കമ്പനിയുടെ ഉദ്യോഗസ്ഥർ എന്നിവരുമൊത്ത് സ്ഥലം സന്ദർശിച്ച് കുടുംബങ്ങളുടെ പരാതി പരിശോധിച്ചു. കുടുംബങ്ങളുടെ പരാതിയിൽ കഴമ്പുണ്ടെന്ന് ബോധ്യമായതിനെ

തുടർന്ന് ഡീൻ കുര്യാക്കോസ് എം പി യുടെ നേതൃത്വത്തിൽ പ്രോജക്ട് ഡയറക്ടർ പി. പ്രദീപ്കുമാർ,

കരാർ കമ്പനിയുടെ ഉദ്യോഗസ്ഥർ,

മുൻ പഞ്ചായത്ത്‌ പ്രസിഡന്റ് സൈജന്റ് ചാക്കോ, യുഡിഎഫ് നേര്യമംഗലം മണ്ഢലം ചെയർമാൻ ജെയ്മോൻ ജോസ്, കൺവീനർ പി എം എ കരീം എന്നിവർ നടത്തിയ ചർച്ചയിൽ വഴിയടച്ച് നിർമ്മാണ പ്രവൃത്തികൾ നടത്തരുതെന്ന്

പ്രോജക്ട് ഡയറക്ടർ പി. പ്രദീപ്കുമാർ കരാർ കമ്പനിക്ക് നിർദ്ദേശം നല്കി. കുടുംബങ്ങളുടെ സഞ്ചാരം സാധ്യമാക്കും വിധം റാമ്പ് നിർമ്മിച്ചു നല്കാനും തകർന്ന കുടിവെള്ള പൈപ്പുകൾ മാറ്റി സ്ഥാപിച്ച് കുടിവെള്ള വിതരണം പുനസ്ഥാപിക്കാനും

പ്രോജക്ട് ഡയറക്ടർ നിർദ്ദേശം നല്കി.