കോതമംഗലം:- ഭൂതത്താൻകെട്ടിൽ നിർമ്മാണം നടന്നു വരുന്ന മിനി ജലവൈദ്യുത പദ്ധതി 2021 മെയ് മാസത്തിൽ കമ്മീഷൻ ചെയ്യുമെന്ന് ബഹു:വൈദ്യുതി വകുപ്പ് മന്ത്രി എം എം മണി നിയമസഭയിൽ വ്യക്തമാക്കി. ഭൂതത്താൻകെട്ടിൽ നടക്കുന്ന മിനി വൈദ്യുത പദ്ധതിയുടെ സിവിൽ,ഇലക്ട്രോ മെക്കാനിക്കൽ പ്രവർത്തികളുടെ നിലവിലെ സ്ഥിതിയും,പ്രസ്തുത പ്രൊജക്ട് വേഗത്തിൽ പൂർത്തീകരിച്ച് സമയ ബന്ധിതമായി കമ്മീഷൻ ചെയ്യുവാൻ നടപടി സ്വീകരിക്കണമെന്നും ആവശ്യപ്പെട്ട് ആന്റണി ജോൺ എംഎൽഎ ഉന്നയിച്ച നിയമസഭ ചോദ്യത്തിന് മറുപടി പറയുമ്പോൾ ആണ് ബഹു:മന്ത്രി ഇക്കാര്യം വ്യക്തമാക്കിയത്‌. കേരളത്തിൽ ആദ്യമായി നടപ്പിലാക്കുന്ന ബൾബ് ടൈപ്പ് ടർബൈൻ പദ്ധതിയാണ് ഭൂതത്താൻകെട്ടിൽ നടപ്പിലാക്കുന്നതെന്നും സമയ ബന്ധിതമായി പദ്ധതി കമ്മീഷൻ ചെയ്യുന്നതിനു വേണ്ട നടപടി സ്വീകരിക്കണമെന്നും എംഎൽഎ നിയമസഭയിൽ ആവശ്യപ്പെട്ടു.
ഭൂതത്താൻകെട്ട് മിനി വൈദ്യുത പദ്ധതിയുടെ 92.90% പ്രവർത്തികളും പൂർത്തിയായതായും,സിവിൽ വർക്കുകളുടെ ഭാഗമായിട്ടുള്ള പവർ ഹൗസ് നിർമ്മാണം 98% പണികളും, ഇലക്ട്രോ മെക്കാനിക്കൽ പ്രവർത്തികകളുടെ 86. 17% പ്രവർത്തികളും പൂർത്തീകരിച്ചതായും മന്ത്രി പറഞ്ഞു.231.21 കോടി രൂപയുടെ പദ്ധതിയാണ് ഇവിടെ നടപ്പിലാക്കുന്നതെന്നും,ഈ പദ്ധതിയുടെ ഉല്പാദന ശേഷി 83.5 മില്യൻ യൂണിറ്റാണെന്നും മന്ത്രി പറഞ്ഞു.പവർ ഹൗസ് ഒഴികെയുള്ള എല്ലാ സിവിൽ വർക്കുകളും പൂർത്തീകരിച്ചതായും,പവർ ഹൗസിന്റെ അവസാന ഘട്ട സിവിൽ വർക്കുകളും,ജനറേറ്റർ അസംബ്ലിങ്ങ് പണികളും പൂർത്തീകരിച്ചു കൊണ്ടിരിക്കുകയാണെന്നും മന്ത്രി പറഞ്ഞു.നിർമ്മാണ പ്രവർത്തികൾ വേഗത്തിൽ പൂർത്തിയാക്കി 2021 മെയ് മാസത്തിൽ പദ്ധതി കമ്മീഷൻ ചെയ്യുമെന്നും വൈദ്യുതി വകുപ്പ് മന്ത്രി എം എം മണി ആന്റണി ജോൺ എംഎൽഎയെ നിയമസഭയിൽ അറിയിച്ചു.
