കോതമംഗലം: ബഷീർ ദിനത്തിൽ പാഠപുസ്തകത്തിലെ കഥാകാരനെ കുട്ടികൾക്ക് പരിചയപ്പെടാനായി. എട്ടാം ക്ലാസിലെ കേരള പാഠാവലി പാഠപുസ്തകത്തിലെ അനുഭവക്കുറിപ്പിന്റെ എഴുത്തനുഭവങ്ങളുമായി കഥാകൃത്ത് പി. സുരേന്ദ്രൻ ആണ് കോതമംഗലം സെൻറ് അഗസ്റ്റിൻസ് ഗേൾസ് ഹയർ സെക്കണ്ടറി സ്കൂളിൽ സാഹിത്യ സമാജത്തിന്റെ ഈ വർഷത്തെ പ്രവർത്തന ഉദ്ഘാടനം നിർവഹിക്കാൻ എത്തിച്ചേർന്നത്.കുട്ടികളിൽ മാനുഷിക മൂല്യങ്ങൾ വളർത്തുന്നതിന് വായന സഹായിക്കുമെന്ന് അദ്ദേഹം പറഞ്ഞു. കുട്ടികൾ തയ്യാറാക്കിയ ബഷീർ പതിപ്പ് പ്രകാശനം ചെയ്യുകയും അവർ വരച്ച അദ്ദേഹത്തിന്റെ ഛായാ ചിത്രം സമ്മാനിക്കുകയും ചെയ്തു.
ദുബായ് കെഎംസിസി സാഹിത്യ പുരസ്കാര ജേതാവായ അദ്ദേഹത്തെ പ്രധാനാധ്യാപിക സിസ്റ്റർ റിനി മരിയ പൊന്നാടയണിയിച്ചു ആദരിച്ചു. PTA പ്രസിഡന്റ് സോണി മാത്യു പാമ്പക്കൽ, എം പി ടി എ പ്രസിഡന്റ് ഷാനി മാർട്ടിൻ, അദ്ധ്യാപകരായ സിസ്റ്റർ ജൂലി,ടിഷു ജോസഫ് , ജിൽസി മാത്യു, വിദ്യാർത്ഥി പ്രതിനിധി അന്ന എം എൽദോ എന്നിവർ സംസാരിച്ചു.
