കോതമംഗലം: ചരിത്രം ഉറങ്ങുന്ന വൈക്കത്തിന്റെ മണ്ണില് ചരിത്രം സൃഷ്ടിച്ച് 63 കാരി. കോതമംഗലം വാരപ്പെട്ടിയില് മോളേല് എം.എം മത്തായിയുടെ ഭാര്യ റുബി മത്തായി ആണ് ആലപ്പുഴ ചേര്ത്തല കുമ്പേല് കടവില് നിന്നും 9 കിലോമീറ്റര് അതിസാഹസികമായി നീന്തി കോട്ടയം ജില്ലയിലെ വൈക്കം ബീച്ചില് എത്തി ചേര്ന്ന് റെക്കോര്ഡ് നേടിയത്. അതി ശക്തമായ ഒഴുക്കും തിരമാലകളും പല ഘട്ടത്തിലും റൂബിയുടെ റെക്കോര്ഡിന് തടസ്സം സൃഷ്ടിച്ചെങ്കിലും അതിനെയെല്ലാം അതിജീവിച്ച് റെക്കോര്ഡ് നേട്ടം കൈവരിക്കുകയായിരുന്നു.
2 മണിക്കൂര് 7 മിനിറ്റ് കൊണ്ടാണ് റൂബി വൈക്കം ബീച്ചില് നീന്തി കയറിയത്. ഡോള്ഫിന് ക്ലബ്ബില് നീന്തല് പരിശീലനത്തിന് ശേഷം കോച്ച് ബിജു തങ്കപ്പനാണ് റൂബിയുടെ കുടുംബവുമായി ബന്ധപ്പെട്ട് കഴിവിനെ ബേദ്ധ്യപെടുത്തി റിക്കോര്ഡ് നേടുന്നതിന് പിന്തുണ നല്കിയത്. ഭര്ത്താവ് മത്തായിയും മക്കളായ ബാസില്, ബ്ലെസ്സി എന്നിവര് അമ്മയ്ക്ക് പൂര്ണ്ണ പിന്തുണയുമായി എത്തി. അതി ശക്തമായ കുത്തൊഴുക്കുള്ള മൂവാറ്റുപുഴയാറിലാണ് റൂബി 6 മാസം പരിശീലനം നേടിയത്.
പ്രായം ഒന്നിനും തടസ്സമല്ല, മനസ്സിന്റെ ശക്തിയാണ് പ്രധാനം എന്ന വിശ്വാസത്തിലായിരുന്നു റൂബി മത്തായി.വേമ്പനാട്ട് കായല് നീന്തുന്ന ഏറ്റവും പ്രായം കൂടിയ വനിത ആണ് റൂബി. വൈക്കം ബീച്ചില് നടന്ന അനുമോദന യോഗം നഗരസഭ ചെയര്മാന് അബ്ദുല്സലാം റാവുത്തര് ഉദ്ഘാടനം ചെയ്തു. റെക്കോര്ഡിന് സാക്ഷ്യം വഹിക്കാന് സഹ നീന്തല് താരങ്ങളും നാട്ടുകാരും വിവിധ സാംസ്കാരിക-സാമൂഹിക രാഷ്ട്രീയ മണ്ഡലങ്ങളിലെ നിരവധി പേര് പങ്കെടുത്തു.
