കോതമംഗലം: നാഷണൽ എൻ ജി ഒ കോൺഫഡറേഷൻ ഡിജിറ്റൽ ട്രാൻസ്ഫോർമേഷൻ പ്രോജക്ടിന്റെ ഭാഗമായി 50% സബ്സിഡിയോട് കൂടി സന്നദ്ധ സംഘടനകൾക്കും , വിദ്യാർത്ഥികൾക്കും നൽകുന്ന ലാപ്ടോപ്പിന്റെ വിതരണോൽഘാടനം കോതമംഗലം രൂപത വികാരിജനറാൾ മോൺ. ഫ്രാൻസിസ് കീരംപാറ നിർവ്വഹിച്ചു. കോതമംഗലം രൂപതയിൽ ചേർന്ന സമ്മേളനത്തിൽ സർദാർ പട്ടേൽ ഇൻസ്റ്റിറ്റ്യൂട്ട് ഓഫ് അഡ്വാൻസ്‌ഡ് റിസേർച്ച് ആൻ്റ് ഡവല്മെൻറ് സ്റ്റഡീസ് ചെയർപേഴ്സൻ ഇന്ദിര കെ. നായർ അധ്യക്ഷതവഹിച്ചു . നാഷണൽ എൻജിഒ കോൺഫെഡറേഷൻ കോഡിനേറ്റർ അനന്തു കൃഷ്ണൻ പദ്ധതി വിശദീകരണം നടത്തി. ഫാ. അരുൺ വലിയതാഴത്ത് , പ്രസാദ് വാസുദേവ്, അഡ്വ. തോമസ് മാത്യു , ജാൻസി ജോഷി, ജയൻ റാത്തപ്പിള്ളിൽ, ലിറ്റി റോണി എന്നിവർ പ്രസംഗിച്ചു .
ഇന്ത്യയിലെ സന്നദ്ധസംഘടനകളുടെ കൂട്ടായ്മയാണ് നാഷണൽ എൻ.ജി.ഒ കോൺഫെഡറേഷൻ . കോൺഫെഡറേഷനിൽ അഫിലിയേറ്റ് ചെയ്തിട്ടുള്ള സംഘാനകൾ വഴിയാണ് ഈപദ്ധതികൾ നടപ്പിലാക്കുക. 40000 രൂപയുടെ ലാപ്പ്ടോപ്പ് 50 ശതമാനം സബ്സീഡിയോടുകൂടി 20000 രൂപക്കാണ് നൽകിയത്. ഇതിന്റെ ആദ്യ ഘട്ട വിതരണത്തിൽ 67 പേർക്ക് ലാപ്‌ടോപ്പ് നൽകി.
കേരള ലേബർമൂവ്മെൻറിന്റെ സഹകരണത്തോടെയാണ് രൂപതയിൽ പ്രോഗ്രാം സംഘടിപ്പിച്ചത്.
നാഷണൽ എൻ ജി ഒ ഫെഡറേഷൻ്റെ സഹകരണത്തോടെ ലാപ്പ്ടോപ്പ് കൂടാതെ കോഴികൂട് , തയ്യൽമെഷീൻ തുടങ്ങിയവയും 50%സബ്സിഡിനിരക്കിൽ വിതരണംചെയ്യുമെന്ന് കെ.എൽ എം രൂപത ഡയറക്ടർ ഫാ. അരുൺ വലിയതാഴത്ത് പറഞ്ഞു.
