കുട്ടമ്പുഴ : വടാട്ടുപാറയിൽ വീണ്ടും കാട്ടാന ആക്രമണം; കൃഷി വിളകൾ നശിപ്പിച്ചു. ഇന്ന് പുലർച്ചെ മൂന്ന് മണിയോടുകൂടി വടാട്ടുപാറ റോക്ക് ജംഗ്ഷനിൽ വാഴക്കുളം വീട്ടിൽ ചാക്കോച്ചന്റെ പുരയിടത്തിനോട് ചേർന്ന കൃഷിയിടത്തിലെ വിളകളാണ് കാട്ടാന നശിപ്പിച്ചത്. അരയേക്കറോളം വരുന്ന കൃഷിയിടത്തിലെ വാഴ, കപ്പ, ചേന തുടങ്ങിയ വിളകളാണ് വെളുപ്പിനെത്തിയ കാട്ടാന നശിപ്പിച്ചത്. ഒറ്റക്ക് വന്ന കാട്ടാനയാണ് കൃഷികൾ നശിപ്പിച്ചതെന്ന് വീട്ടുകാർ പറയുന്നു.
കഴിഞ്ഞ ദിവസം (ബുധനാഴ്ച്ച ) പുലർച്ചെ വടാട്ടുപാറയിൽ വീടിനോട് ചേർന്ന് കെട്ടിയിരുന്ന പോത്തിനെ കാട്ടാന ചവിട്ടി കൊന്നിരുന്നു. ഈ കാട്ടാന തന്നെയാകാം ഇന്ന് കൃഷികൾ നശിച്ചത് എന്ന സംശയവും വീട്ടുകാർ പങ്കുവെക്കുന്നു. കാട്ടാനയുടെ ആക്രമണം വർദ്ധിച്ചുവരുന്ന ഈ സാഹചര്യത്തിൽ ഫെൻസിംഗ് ശക്തമാക്കി തങ്ങളുടെ ജീവനും സ്വത്തിനും വന്യമൃഗങ്ങളിൽ നിന്നും സംരക്ഷണം ഒരുക്കണമെന്നാണ് പ്രദേശവാസികൾ ആവശ്യപ്പെടുന്നത്.
