കോതമംഗലം : ആലുവ റൂറൽ ജില്ലയിൽ കഴിഞ്ഞ ദിവസം പോലീസ് നടത്തിയ പ്രത്യേക പരിശോധനത്തിൽ കണ്ടെത്തിയത് 855 ഗതാഗത നിയമലംഘനങ്ങൾ. റേഞ്ച് ഡി ഐ ജി തോംസൺ ജോസിൻ്റെ നിർദ്ദേശപ്രകാരം റൂറൽ ജില്ലാ പോലീസ് മേധാവി ഡോ വൈഭവ് സക്സേനയുടെ നേതൃത്വത്തിലായിരുന്നു പരിശോധന. മദ്യപിച്ച് വാഹനമോടിച്ചതിന് 194 പേർ പിടിയിലായി. ഇതിൽ 26 വലിയ വാഹനങ്ങളും, 168 മറ്റ് തരത്തിലുള്ള വാഹനങ്ങളും ഉൾപ്പെടും. അമിതവേഗതയിൽ വാഹനമോടിച്ച 37 ഡ്രൈവർമാർ പിടിയിലായി. അപകടകരമായി വാഹനമോടിച്ച 87 പേരെ പിടികൂടി. ഇതിൽ പതിമൂന്നെണ്ണം വലിയ വാഹനങ്ങൾ ഓടിച്ചവരാണ്. അനധികൃത പാർക്കിംഗിന് 383 പേർക്കെതിരെ നടപടി സ്വീകരിച്ചു. ഇതിൽ 255 വലിയ വാഹനങ്ങളും 128 മറ്റ് വാഹനങ്ങളും ഉൾപ്പെടും. ലെയിൻ ട്രാഫിക്ക് നിയമങ്ങൾ ലംഘിച്ച 93 ഡ്രൈവർമാർക്കെതിരെ നടപടി സ്വീകരിച്ചു. ഡ്രൈവിംഗ് ലൈസൻസില്ലാതെ വാഹനമോടിച്ച 24 പേർ പിടിയിലായി. അമിതഭാരം കയറ്റിയ 35 വാഹനം കസ്റ്റഡിയിലെടുത്തു.
ആലുവ, മുനമ്പം, പെരുമ്പാവൂർ ,മുവാറ്റുപുഴ, പുത്തൻകുരിശ് സബ്ഡിവിഷനുകളിൽ പ്രത്യേക സംഘമായിട്ടായിരുന്നു പോലീസ് പരിശോധന. മൂവായിരത്തിലേറെ വാഹനങ്ങളാണ് ഒറ്റ ദിവസം പരിശോധിച്ചത്. പരിശോധന വരും ദിവസങ്ങളിലും തുടരും ഗതാഗത നിയമലംഘനങ്ങൾ നടത്തുന്നവർക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചു.
