കോതമംഗലം :ജില്ലാ പഞ്ചായത്തിന്റെ നേതൃത്വത്തിൽ കാർഷിക വികസന കർഷക ക്ഷേ ക്ഷേമവകുപ്പിന്റെ സഹകരണത്തോടെ സംഘടിപ്പിച്ചിട്ടുള്ള നേര്യമംഗലം ഫാം ഫെസ്റ്റ് ജനപങ്കാളിത്വംകൊണ്ട് ശ്രദ്ധേയമായി.
സ്കൂൾ വിദ്യാർഥികളും കർഷകരും അടക്കം നിരവധി ആളുകളാണ് ഫാമിലേക്ക് എത്തിക്കൊണ്ടിരിക്കുന്നത്. സ്റ്റാളുകളും, കുതിര സവാരി, ഫാമിലെ നാടൻ വിഭവങ്ങളടക്കമുള്ള ഫുഡ് കോർട്ട്, കുട്ടികളുടെ കാർഷിക ക്വിസ് മത്സരം, പെരിയാർ തീരത്തെ അതി മനോഹര കാഴ്ച്ചകൾ , സംയോജിത ഫാമിംഗ് കാഴ്ചകൾ, പുഴയിറമ്പിലൂടെയുള്ള നടത്തം, സൂര്യകാന്തി തോട്ടത്തിലെ സെൽഫി തുടങ്ങി വിശാലമായ ഫാമിൽ കാണാനും അനുഭവിക്കാനും ഒത്തിരിയുണ്ട്. വിവിധ കലാപരിപാടികളും കാർഷിക സെമിനാറുകളും കാർഷിക പ്രദർശനങ്ങളും, ഫൊട്ടോഗ്രഫി മത്സരങ്ങളുമെല്ലാം ഫാം ഫെസ്റ്റിന്റെ ഭാഗമായി ഒരുക്കിയിട്ടുണ്ട്. ഫെസ്റ്റിനോട് അനുബന്ധിച്ച് സംയോജിത കൃഷിരീതികൾ എന്ന വിഷയത്തിൽ റിട്ട. കൃഷി അസിസ്റ്റൻ്റ് ഡയറക്ടർ ബിജുമോൻ സക്കറിയ കാർഷിക സെമിനാറിന് നേതത്വം നൽകി. കർഷകർക്ക് കാർഷിക ഉപകരണങ്ങൾ സൗജന്യമായി സർവീസ് ചെയ്യാനുള്ള സൗകര്യങ്ങൾ കൃഷിവകുപ്പ് എൻജിനീയറിങ് വിഭാഗം ഒരുക്കിയിട്ടുണ്ട്. പച്ചക്കറി, ഫലവൃക്ഷതൈകൾ, അലങ്കാര സസ്യങ്ങൾ, വിത്തുകൾ, കാർഷിക ഉപകരണങ്ങൾ, മൂല്യവർധിത ഉൽപന്നങ്ങൾ തുടങ്ങിയ കാർഷിക ഉപാധികൾ എല്ലാം ഒരു കുടക്കീഴിൽ ലഭിക്കും വിധമാണ് സ്റ്റാളുകൾ ഒരുക്കിയിട്ടുള്ളത്.
നേര്യമംഗലം ജില്ലാ കൃഷിത്തോട്ടത്തോടൊപ്പം ഒക്കൽ സംസ്ഥാന വിത്ത് ഉൽപ്പാദന കേന്ദ്രം, ഫാം ഇൻഫർമേഷൻ ബ്യൂറോ, സംസ്ഥാന വിത്ത് ഉൽപാദന കേന്ദ്രം ആലുവ, കേരള കാർഷിക സർവ്വകലാശാല – ഓടക്കാലി സുഗന്ധ വ്യജ്ഞന ഗവേഷണ കേന്ദ്രം, കുട്ടമ്പുഴ കൃഷിഭവൻ, തട്ടേക്കാട് ഫാർമേഴ്സ് പ്രൊഡുസർ കമ്പനി, ഖാദി, വനശ്രീ, ഡോ. എം.എസ് സ്വാമിനാഥൻ റിസേർച്ച് ഫൗണ്ടേഷൻ, പോത്തനിക്കാട് പഞ്ചായത്ത്, കുടുംബശ്രീ, കേരള അഗ്രോ ഇൻഡസ്ട്രീസ് കോർപറേഷൻ, കൃഷി വകുപ്പ് ഗ്രീൻ കോതമംഗലം, വിവിധ ഫാർമർ പ്രൊഡ്യൂസർ കമ്പനികൾ, കൃഷിക്കൂട്ടങ്ങൾ,ബാങ്കുകൾ, വിവിധ സ്വകാര്യ- സഹകരണ സ്ഥാപനങ്ങൾ തുടങ്ങിയവയുടെ സ്റ്റാളുകൾ ഒരുക്കിയിട്ടുണ്ട്. ഫാം ഫെസ്റ്റ് സന്ദർശിക്കുന്നതിന് സ്കൂൾ വിദ്യാർത്ഥികൾക്കും പൊതുജനങ്ങൾക്കും ടൂറിസ്റ്റ് വിദേശികൾക്ക് അടക്കം എല്ലാവർക്കും പ്രവേശനമുണ്ട്. നാല് ദിവസം നീളുന്ന ഫെസ്റ്റ് നാളെ (9/12) സമാപിക്കും. രാവിലെ 9 മുതൽ വെകിട്ട് 5 വരെയാണ് പ്രദർശനം. ഇന്ന് (8-12-24 ) 6.30-ന് നേര്യമംഗലം വ്യാപാരി വ്യവസായി ഏകോപന സമിതി സ്പോണസർ ചെയ്യുന്ന പാലാ സൂപ്പർ ബീറ്റ്സിൻ്റെ ഗാനമേളയും ഒരുക്കിയിട്ടുണ്ട്.
